ಜೆಪಿಸಿ ವರದಿಯಲ್ಲಿ ವಾಜಪೇಯಿ ಹೆಸರು ಅಸಂಬದ್ಧ ಕ್ರಮ: ಜಸ್ವಂತ್

5

ಜೆಪಿಸಿ ವರದಿಯಲ್ಲಿ ವಾಜಪೇಯಿ ಹೆಸರು ಅಸಂಬದ್ಧ ಕ್ರಮ: ಜಸ್ವಂತ್

Published:
Updated:

ನವದೆಹಲಿ (ಪಿಟಿಐ): 2ಜಿ ಹಗರಣ ಕುರಿತು ಜಂಟಿ ಸಂಸದೀಯ ಸಮಿತಿ (ಜೆಪಿಸಿ) ತನಿಖೆ ಮಾಡಿ ಸಿದ್ಧಪಡಿಸಿರುವ ಕರಡು ವರದಿಯಲ್ಲಿ ಮಾಜಿ ಪ್ರಧಾನಿ ವಾಜಪೇಯಿ ಅವರ ಹೆಸರನ್ನು ಸೇರಿಸಿರುವುದಕ್ಕೆ ಬಿಜೆಪಿ ನಾಯಕ ಜಸ್ವಂತ್ ಸಿಂಗ್ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. `2 ಜಿ ಹಗರಣ ಕುರಿತು ವಾಜಪೇಯಿ ಅವರ ಆಡಳಿತ ಅವಧಿಯಲ್ಲಿ ತಪ್ಪು ಹುಡುಕುತ್ತಿರುವ ಜೆಪಿಸಿಯ ಕ್ರಮ ಅಸಂಬದ್ಧ ಹಾಗೂ ಹಾಸ್ಯಾಸ್ಪದ' ಎಂದು ಜಸ್ವಂತ್ ಅವರು ಲೇವಡಿ ಮಾಡಿದ್ದಾರೆ.

`ನಾನು ವಾಜಪೇಯಿ ಸರ್ಕಾರದಲ್ಲಿ ಹಣಕಾಸು ಸಚಿವನಾಗಿದ್ದೆ ಎಂಬ ಕಾರಣಕ್ಕೆ ಈ ಹೇಳಿಕೆ ನೀಡುತ್ತಿಲ್ಲ. ಆದರೆ ಇಂತಹ ಅಸಂಬದ್ಧ ದಾಖಲೆ ಬಿಡುಗಡೆ ಮಾಡುವ ಅಗತ್ಯವಿರಲಿಲ್ಲ' ಎಂದು ಜೆಪಿಸಿ ಸದಸ್ಯರೂ ಆಗಿರುವ ಜಸ್ವಂತ್ ಸಿಂಗ್ ಸೋಮವಾರ ಸಂಸತ್ತಿನ ಹೊರಗಡೆ ಸುದ್ದಿಗಾರರಿಗೆ ತಿಳಿಸಿದ್ದಾರೆ.



`ಎನ್‌ಡಿಎ ಸರ್ಕಾರ ಅಂದಿನ ದೂರಸಂಪರ್ಕ ಸಚಿವ ಜಗಮೋಹನ್ ಮತ್ತು ಹಣಕಾಸು ಸಚಿವ ಯಶವಂತ ಸಿನ್ಹಾ ಅವರ ವಿರೋಧದ ನಡುವೆಯೂ ಟೆಲಿಕಾಂ ಕಂಪೆನಿಗಳಿಗೆ ರಿಯಾಯಿತಿ ಅನುದಾನ ನೀಡಿದ್ದೇಕೆ?' ಎಂಬ ಸುದ್ದಿಗಾರರ ಪ್ರಶ್ನೆಗೆ ಜಸ್ವಂತ್ ಸಿಂಗ್, `ಇದೊಂದು ಗೊಂದಲದ ಪ್ರಶ್ನೆಯಾಗಿದೆ' ಎಂದು ಹಾರಿಕೆ ಉತ್ತರ ನೀಡಿದರು.



2ಜಿ ಹಗರಣಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸುತ್ತಿರುವ ಜೆಪಿಸಿ ಎನ್‌ಡಿಎ ಸರ್ಕಾರದ ಅವಧಿಯಲ್ಲಿ ಟೆಲಿಕಾಂ ಕಂಪೆನಿಗಳಿಗೆ ರಿಯಾಯಿತಿ ಅನುದಾನ ನೀಡಿರುವುದನ್ನು ಪ್ರಶ್ನಿಸಿತ್ತು.

`ವರದಿಯಲ್ಲಿ ವಾಜಪೇಯಿ ಹೆಸರಿಲ್ಲ'

ನವದೆಹಲಿ (ಪಿಟಿಐ): 2ಜಿ ಹಗಣರ ಕುರಿತು ಜೆಪಿಸಿ ಸಿದ್ಧಪಡಿಸಿರುವ ಕರಡು ವರದಿಯಲ್ಲಿ ಮಾಜಿ ಪ್ರಧಾನಿ ವಾಜಪೇಯಿ ಹೆಸರು ಸೇರಿಸಲಾಗಿದೆ ಎಂಬ ಬಿಜೆಪಿ ನಾಯಕರ ಆರೋಪವನ್ನು ಜೆಪಿಸಿ ಅಧ್ಯಕ್ಷ ಪಿ.ಸಿ.ಚಾಕೊ ತಳ್ಳಿ ಹಾಕಿದ್ದಾರೆ. `ಜೆಪಿಸಿ ವರದಿಯಲ್ಲಿ ಯಾವುದೇ ನಾಯಕರ ಹೆಸರನ್ನು ಪ್ರಸ್ತಾಪಿಸಿಲ್ಲ. ಇದು ಕೇವಲ ಕಪೋಲಕಲ್ಪಿತ ವಾದ' ಎಂದು ಚಾಕೊ ಸ್ಪಷ್ಟಪಡಿಸಿದ್ದಾರೆ.

 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry