ಗುರುವಾರ , ಮಾರ್ಚ್ 4, 2021
26 °C

ಜ್ಯೋತಿಷ ನಿಷೇಧಕ್ಕೆ ಕುಂವೀ ಒತ್ತಾಯ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಜ್ಯೋತಿಷ ನಿಷೇಧಕ್ಕೆ ಕುಂವೀ ಒತ್ತಾಯ

ಬೆಂಗಳೂರು: ‘ಸರ್ಕಾರ ಜ್ಯೋತಿಷಿಗಳನ್ನು ಭಯೋ­­ತ್ಪಾ­ದಕರೆಂದು ಘೋಷಿಸಿ, ಜ್ಯೋತಿಷ­ವನ್ನು ನಿಷೇಧಿಸಬೇಕು’ ಎಂದು ಸಾಹಿತಿ ಕುಂ.­ವೀರಭದ್ರಪ್ಪ ಹೇಳಿದರು. ಕನ್ನಡ ಮತ್ತು ಸಂಸ್ಕೃತಿ ನಿರ್ದೇಶನಾಲಯವು ಶುಕ್ರವಾರ ನಯನ ಸಭಾಂಗಣದಲ್ಲಿ ಆಯೋಜಿ­ಸಿದ್ದ ‘ಬಸವ ಜಯಂತಿ’ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.



‘ಈಗ ರಸ್ತೆಗೊಂದು ದೇವಸ್ಥಾನ ನಿರ್ಮಾಣ­ವಾ­ಗಿವೆ. ಅಲ್ಲಿ ಕಂದಾಚಾರ, ಮೂಢನಂಬಿಕೆಗಳು ಅವ್ಯಾ­­ಹತವಾಗಿ ನಡೆಯುತ್ತಿವೆ. ಜ್ಯೋತಿಷಿಗಳು ಇಂದು ನಮ್ಮ ದಿನಚರಿಯನ್ನೇ ನಿರ್ದೇಶನ ಮಾಡು­­ವಷ್ಟು ಬೆಳೆದಿದ್ದಾರೆ’ ಎಂದು ವ್ಯಂಗ್ಯವಾಡಿದರು.



‘ಬಸವಣ್ಣ, ಅಂಬೇಡ್ಕರ್‌, ಮಹಾತ್ಮಗಾಂಧಿ ವಿಶ್ವ­ಮಾನವರು. ವೀರಶೈವ ಕೇವಲ ಒಂದು ಜಾತಿಯಲ್ಲ.  ಲಿಂಗಧಾರಿಗಳ ಅಥವಾ ಪುರೋ­ಹಿ­ತರ ಸ್ವತ್ತಲ್ಲ. ಬಸವಣ್ಣ ಇಡೀ ಮಾನವ ಧರ್ಮ­ವನ್ನು ಪೋಷಿಸುವ ತತ್ವವನ್ನು ಬೋಧಿಸಿದ್ದಾರೆ. ಅಂತಹ ಬಸವಣ್ಣನನ್ನು ಕುದುರೆ ಮೇಲೆ ಕೂರಿಸಿ, ಒಂದು ಕಿರೀಟವಿಟ್ಟು ವೈಭವೀಕರಿ­ಸುತ್ತಿರುವುದು ದುರದೃಷ್ಟವಾಗಿದೆ’ ಎಂದು ವಿಷಾದಿಸಿದರು.



‘ಇಂದಿನ 21 ನೇ ಶತಮಾನದ ಆಧುನಿಕ ಕಾಲ­ದ­ಲ್ಲಿಯೂ ನಮ್ಮ ಸಾಮಾಜಿಕ ಪರಂಪರೆ ಬದ­ಲಾ­ಗಿಲ್ಲ. ಮೂಢನಂಬಿಕೆ, ಜಾತಿ ವ್ಯವಸ್ಥೆ ಹೆಚ್ಚಾಗಿ, ಸಮಾ­ಜ­ದಲ್ಲಿ ಭಯಾನಕವಾದ ಪರಿಸ್ಥಿತಿಯಿದೆ. ನಮ್ಮ ಸ್ವಾಭಿಮಾನ, ಆತ್ಮಾಭಿಮಾನವನ್ನು ಕೆಣಕು­ವಂ­­ತಹ ಪದ್ಧತಿಗಳು ಆಚರಣೆಯಲ್ಲಿವೆ’ ಎಂದರು.



‘ನಮ್ಮ ಸಮಾಜದಲ್ಲಿ ನಾಯಿ, ಹಂದಿ­ಯಂ­ತಹ ಪ್ರಾಣಿಗಳಿಗೆ ನೀಡಿದ ಸ್ಥಾನವನ್ನು ಮನುಷ್ಯ­ನಿಗೆ ನೀಡುತ್ತಿಲ್ಲ. ಮನುಷ್ಯನನ್ನು ಮನುಷ್ಯನನ್ನಾಗಿ ನೋಡದೆ, ಅತ್ಯಂತ ಕೀಳು ರೀತಿಯಲ್ಲಿ ನೋಡಲಾ­ಗು­ತ್ತಿದೆ. ದಲಿತರ ಸ್ಪರ್ಶದಿಂದ ಎಲ್ಲವೂ ಅಪವಿತ್ರಗೊಳ್ಳುತ್ತದೆ ಎಂಬ ಭಾವನೆ ಅನಾದಿ­ಕಾಲ­ದಿಂದ ಇಂದಿನವರೆಗೂ ನಡೆದುಕೊಂಡು ಬಂದಿ­ರು­ವುದು ನಮ್ಮ ಸಮಾಜದ ದುರಂತ­ವಾ­ಗಿದೆ’ ಎಂದು ಹೇಳಿದರು.



‘ಕಾಯಕ, ದಾಸೋಹ ತತ್ವ ಬಸವಣ್ಣ ಬೋಧಿ­­ಸಿದ ಎರಡು ಅದ್ಭುತ ಪರಿಕಲ್ಪನೆಗಳು. ಯಾವ ಕೆಲಸವೂ ಕೀಳಲ್ಲ. ಸಮಾಜದ ಎಲ್ಲ ಕೆಲಸ­ಗಳೂ ಪವಿತ್ರವಾದವು ಹಾಗೂ ತನ್ನಲ್ಲಿರುವು­ದನ್ನು ದೀನ, ದುರ್ಬಲರಿಗೆ ದಾನ ಮಾಡಬೇ­ಕೆಂದು ಹೇಳಿದ ತತ್ವಗಳು ಅನುಕರಣೀಯ’ ಎಂದರು.



ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆ ಮಾಲತಿ ಪಟ್ಟಣ­ಶೆಟ್ಟಿ ಮಾತನಾಡಿ, ‘ಬಸವಣ್ಣ ಮಹಾನ್‌ ಮಾನ­ವ­ತಾ­­ವಾದಿ. ಆದರೆ, ಬಸವಣ್ಣನ ವಚನಗಳು ಹೆಚ್ಚು ಪರಿಚಿತವಾಗಿಲ್ಲ ಎಂಬುದು ದುಃಖಕರ ಸಂಗತಿ’ ಎಂದು ಹೇಳಿದರು.



‘ಬಸವಣ್ಣ ಮತ್ತು ಇತರೆ ಶರಣರ ಇತಿ­ಹಾಸ­ವನ್ನು ಪರಿಚಯಿಸುವ ಕೃತಿಗಳನ್ನು ಎಲ್ಲ ಭಾಷೆ­ಗಳಲ್ಲಿ ಮುದ್ರಿಸಬೇಕಾದ ಅಗತ್ಯವಿದೆ. ಸಮಗ್ರ ವಚನ ಸಾಹಿತ್ಯವು ಎಲ್ಲ ಭಾಷೆಗಳಲ್ಲಿಯೂ ಅನುವಾದವಾಗಬೇಕು’ ಎಂದರು.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.