ಶನಿವಾರ, ಮೇ 8, 2021
26 °C

ಟ್ಯಾಗೋರ್‌ರ ಅಪೂರ್ವ ಕಲಾಕೃತಿಗಳ ವಿಶ್ವ ಪರ್ಯಟನೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ನವದೆಹಲಿ (ಪಿಟಿಐ): ಕವಿ ರವೀಂದ್ರನಾಥ ಟ್ಯಾಗೋರ್‌ರ 150ನೇ ಜನ್ಮ ದಿನಾಚರಣೆ ಪ್ರಯುಕ್ತ ಅವರ ಹಲವು ಅಪೂರ್ವ ಕಲಾಕೃತಿಗಳ ವಿಶ್ವ ಪರ್ಯಟನೆ ಆರಂಭವಾಗಲಿದೆ. ಈ ಕಲಾಕೃತಿಗಳು ಮುಂದಿನ ಏಳೆಂಟು ತಿಂಗಳುಗಳ ಕಾಲ ವಿಶ್ವದ ಅನೇಕ ದೇಶಗಳಲ್ಲಿ `ದಿ ಲಾಸ್ಟ್ ಹಾರ್ವಿಸ್ಟ್~ ಹೆಸರಿನಲ್ಲಿ ಪ್ರದರ್ಶನವಾಗಲಿದೆ.



ನವದೆಹಲಿ ರಾಷ್ಟ್ರೀಯ ಸಂಗ್ರಹಾಲಯ, ಶಾಂತಿನಿಕೇತನ ಮತ್ತಿತರ ಚಿತ್ರಕಲಾ ಗ್ಯಾಲರಿಗಳಲ್ಲಿರುವ ಟ್ಯಾಗೋರ್‌ರ ವಿಶೇಷ ಕಲಾಕೃತಿಗಳನ್ನು ಈ ವಿಶ್ವ ಪರ್ಯಟನೆಗೆ ಆಯ್ಕೆ ಮಾಡಲಾಗಿದೆ. `ಶಾಂತಿ ಮತ್ತು ಪ್ರೇಮ~ ಸಂದೇಶವನ್ನು ಸಾರಲು ವಿಶ್ವದ ಅನೇಕ ನಗರಗಳಲ್ಲಿ ಪ್ರದರ್ಶಿತಗೊಳ್ಳುವ ಈ ಕಲಾಕೃತಿಗಳು ಚಿತ್ರಕಲಾ ಪ್ರೇಮಿಗಳ ಮನತಣಿಸಲಿದೆ.



ಟ್ಯಾಗೋರ್ ಅವರು ಭೇಟಿ ನೀಡಿದ್ದ ವಿವಿಧ ದೇಶಗಳ ಸ್ಥಳಗಳು ಇಲ್ಲವೆ ಅವರಿಗೆ ಒಂದಲ್ಲಾ ಒಂದು ವಿಧದಲ್ಲಿ ನಂಟು ಹಾಕಿಕೊಂಡ ನಗರಗಳಲ್ಲಿ ಈ ಕಲಾಕೃತಿಗಳು ಮಾರ್ಚ್ 2012ರ ವರೆಗೆ ಪ್ರದರ್ಶಿತವಾಗಲಿವೆ.|



ಬರ್ಲಿನಿನ ಎಂಟು ಚಿತ್ರಕಲಾ ಸಂಗ್ರಹಾಲಯ, ನೆದರ್‌ಲೆಂಡ್, ಫ್ರಾನ್ಸ್, ರೋಮ್, ನ್ಯೂಯಾರ್ಕ್, ಷಿಕಾಗೊ, ಸೋಲ್, ಲಂಡನ್ ಮತ್ತಿತರ ನಗರಗಳಲ್ಲಿ ಮೂರು ಹಂತದಲ್ಲಿ ಈ ಪ್ರದರ್ಶನ ನಡೆಯಲಿದೆ.

ಮೊದಲ ಹಂತದಲ್ಲಿ ಬರ್ಲಿನ್, ಲಂಡನ್, ಪ್ಯಾರಿಸ್ ಮತ್ತು ರೋಮ್‌ಗಳಲ್ಲಿ, ಎರಡನೇ ಹಂತದಲ್ಲಿ ನ್ಯೂಯಾರ್ಕ್ ಷಿಕಾಗೊ ಹಾಗೂ ಸೋಲ್‌ನಲ್ಲಿ ಮತ್ತು ಮೂರನೇ ಹಂತದಲ್ಲಿ ಲಂಡನ್ನಿನ ವಿಕ್ಟೋರಿಯಾ ಮತ್ತು ಅಲ್ಬರ್ಟ್ ಮ್ಯೂಸಿಯಂಗಳಲ್ಲಿ ಈ ಪ್ರದರ್ಶನ ಜರುಗಲಿದೆ.



ಇವುಗಳು ಸ್ವದೇಶಕ್ಕೆ ವಾಪಸಾದ ನಂತರ, ಮೇ 2012ರ ಹೊತ್ತಿಗೆ ವರ್ಷವಿಡೀ ಆಚರಿಸಲಾಗುತ್ತಿರುವ ಟ್ಯಾಗೋರ್‌ರ 150ನೇ ಜನ್ಮ ದಿನಾಚರಣೆ ಸಂಭ್ರಮದ ನಿಮಿತ್ತ ಕೇಂದ್ರ ಸಂಸ್ಕೃತಿ ಸಚಿವಾಲಯ ಕಾರ್ಯಕ್ರಮವೊಂದನ್ನು ಆಯೋಜಿಸಲಿದೆ.



ವಿವಿಧ ದೇಶಗಳಲ್ಲಿರುವ ಭಾರತೀಯ ರಾಯಭಾರ ಕಚೇರಿಗಳು ರವೀಂದ್ರರ ಪುತ್ಥಳಿ ಸ್ಥಾಪಿಸಲು ಉದ್ದೇಶಿಸಿದ್ದು, ಇದಕ್ಕಾಗಿ `ವಿಶ್ವ ಭಾರತಿ~ ಮೂಲಕ ಸಂಸ್ಕೃತಿ ಸಚಿವಾಲಯಕ್ಕೆ ಅವರ 15 ಪುತ್ಥಳಿಗಳನ್ನು ಒದಗಿಸುವಂತೆ ಮನವಿ ಸಲ್ಲಿಸಿವೆ. ಸಚಿವಾಲಯವು ರೂ 37.5 ಲಕ್ಷ ವೆಚ್ಚದಲ್ಲಿ ರವೀಂದ್ರರ ಸುಂದರ ಪುತ್ಥಳಿಯನ್ನು ಸಿದ್ಧಪಡಿಸಿದೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.