ಭಾನುವಾರ, ಮೇ 9, 2021
27 °C

ಡಿಎಂಕೆ ಬಹಿಷ್ಕಾರ- ಕರುಣಾನಿಧಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಚೆನ್ನೈ (ಪಿಟಿಐ): ಪುನರ್ವಸತಿ ಹಾಗೂ ರಾಜಕೀಯ ಪ್ರಕ್ರಿಯೆ ಪರಿಶೀಲನೆಗೆಂದು ಈ ವಾರ ಶ್ರೀಲಂಕಾಗೆ ಭೇಟಿ ನೀಡಲಿರುವ ಸರ್ವಪಕ್ಷ ನಿಯೋಗದಲ್ಲಿ ಡಿಎಂಕೆ ಭಾಗವಹಿಸುವುದಿಲ್ಲ ಎಂದಿರುವ ಪಕ್ಷದ ಅಧ್ಯಕ್ಷ ಎಂ.ಕರುಣಾನಿಧಿ, `ಇಂಥ ಭೇಟಿಗಳಿಂದ ಪ್ರಯೋಜನವಿಲ್ಲ ಎನ್ನುವುದು ಈ ಹಿಂದಿನ ಅನುಭವಗಳಿಂದ ತಿಳಿದಿದೆ~ ಎಂದಿದ್ದಾರೆ.



ಲೋಕಸಭೆಯಲ್ಲಿನ ವಿರೋಧ ಪಕ್ಷದ ನಾಯಕಿ ಸುಷ್ಮಾ ಸ್ವರಾಜ್ ನೇತೃತ್ವದ ಈ ನಿಯೋಗದಲ್ಲಿ ಸಂಸದ ಟಿ.ಕೆ.ಎಸ್.ಇಳಂಗೋವನ್ ಅವರು ಡಿಎಂಕೆಯ ಏಕೈಕ ಪ್ರತಿನಿಧಿಯಾಗಿದ್ದರು.



ಈ ಮೊದಲು 2010ರಲ್ಲಿ ತಮಿಳುನಾಡಿನ ಡಿಎಂಕೆ ಹಾಗೂ ಕಾಂಗ್ರೆಸ್ ಸಂಸದರ ನಿಯೋಗವು ಲಂಕಾಗೆ ಭೇಟಿ ನೀಡಿತ್ತು. ಆಗ ಕರುಣಾನಿಧಿ ಅವರ ಪುತ್ರಿ ಕನಿಮೊಳಿ, ಟಿ.ಆರ್.ಬಾಲು ಹಾಗೂ ವಿಡುತಲೈ ಚಿತುತೈಗಳ್ ಕಚ್ಚಿ ಸಂಸ್ಥಾಪಕ ಥೋಲ್ ತಿರುಮವಳವನ್ ಕೂಡ ನಿಯೋಗದಲ್ಲಿ ಇದ್ದರು.



ಆದರೆ ಈ ಬಾರಿ ಇದೇ 16ರಿಂದ 22ರವರೆಗೆ ಲಂಕಾಗೆ ತೆರಳುವ ನಿಯೋಗದಲ್ಲಿ ಡಿಎಂಕೆ ಹಾಗೂ ಎಐಎಡಿಎಂಕೆ ಪಕ್ಷಗಳು ಭಾಗಿಯಾಗುತ್ತಿಲ್ಲ.



ಲಂಕಾ ಭೇಟಿಗೆ ಅಸಮಾಧಾನ ವ್ಯಕ್ತಪಡಿಸಿದ್ದ ಎಐಎಡಿಎಂಕೆ ನಾಯಕಿ, ಮುಖ್ಯಮಂತ್ರಿ ಜಯಲಲಿತಾ, ಈ ನಿಯೋಗದಲ್ಲಿ ಇದ್ದ ಪಕ್ಷದ ಏಕೈಕ ಪ್ರತಿನಿಧಿ ಎ.ವಿಲಿಯಂ ರಾಬಿ ಬರ್ನಾರ್ಡ್ ಅವರನ್ನು ವಾಪಸ್ ಕರೆಸಿಕೊಂಡಿದ್ದರು.



ವ್ಯರ್ಥ ಭೇಟಿ: ಸರ್ವಪಕ್ಷ ನಿಯೋಗದ ಲಂಕಾ ಭೇಟಿಯನ್ನು `ವ್ಯರ್ಥ ಕಸರತ್ತು~ ಎಂದು ಎಂಡಿಎಂಕೆ ಭಾನುವಾರ ಟೀಕಿಸಿದೆ.



`ಉದ್ದೇಶಿತ ಭೇಟಿಯಿಂದ ಲಂಕಾ ತಮಿಳರಿಗೆ ಏನೂ ಉಪಯೋಗವಿಲ್ಲ~ ಎಂದು ಪಕ್ಷದ ಮುಖ್ಯಸ್ಥ ವೈಕೊ ಸುದ್ದಿಗಾರರಿಗೆ ತಿಳಿಸಿದರು.



ಮುಖ್ಯಮಂತ್ರಿ ಜಯಲಲಿತಾ ಅವರು ಈ ನಿಯೋಗದಿಂದ ತಮ್ಮ ಪಕ್ಷದ ಏಕೈಕ ಪ್ರತಿನಿಧಿಯನ್ನು ವಾಪಸ್ ಕರೆಸಿಕೊಂಡಿದ್ದಕ್ಕೆ ವೈಕೊ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.  

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.