ತರಳಬಾಳು ಹುಣ್ಣಿಮೆ ಮಹೋತ್ಸವಕ್ಕೆ ಶಿಗ್ಗಾವಿ ಸಜ್ಜು

ಶಿಗ್ಗಾವಿ (ಹಾವೇರಿ ಜಿಲ್ಲೆ): ಧಾರ್ಮಿಕ, ಸಾಮಾಜಿಕ ಚಿಂತನಾ ಸಮಾವೇಶ­ವೆಂದೇ ಹೇಳಲಾಗುವ ತರಳಬಾಳು ಹುಣ್ಣಿಮೆ ಮಹೋತ್ಸವ ಇದೇ 6 ರಿಂದ 9 ದಿನಗಳ ಕಾಲ ಇಲ್ಲಿ ನಡೆಯಲಿದ್ದು, ಸಿದ್ಧತೆಗಳು ಪೂರ್ಣಗೊಂಡಿವೆ.



ತಹಶೀಲ್ದಾರ್‌ ಕಚೇರಿ ಬಳಿ ೨೦ ಎಕರೆ ಪ್ರದೇಶದಲ್ಲಿ ಬೃಹತ್‌ ಪೆಂಡಾಲ್‌ ಹಾಕಲಾಗಿದ್ದು, ಅದ­­ರಲ್ಲಿ ಕನಕದಾಸ ಮಹಾಮಂಟಪ, ಸಂತ ಶಿಶುನಾಳ ಷರೀಫ್ ಮಹಾವೇದಿಕೆ ಮತ್ತು ರಾವಬಹದ್ದೂರ್ ಅರಟಾಳು ರುದ್ರ­ಗೌಡ ಮಹಾದ್ವಾರ ನಿರ್ಮಿಸಲಾಗಿದೆ.



ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಸ್ವಾಗತ ಕಮಾನುಗಳನ್ನು ಅಳವಡಿಸಲಾ­ಗಿದೆ. ಕಾರ್ಯಕ್ರಮಕ್ಕೆ ಬರುವ ಗಣ್ಯರು  ಹಾಗೂ ಧಾರ್ಮಿಕ ಮುಖಂಡರಿಗೆ ಸ್ವಾಗತ­ಕೋರುವ ಬ್ಯಾನರ್‌, ಬಂಟಿಂಗ್ಸ್‌ ಹಾಗೂ ಫ್ಲೆಕ್ಸ್‌ಬೋರ್ಡ್‌ಗಳು ಎಲ್ಲೆಡೆ  ರಾರಾಜಿಸುತ್ತಿವೆ.



‘ಸಮಾರಂಭದಲ್ಲಿ ೨೫ ರಿಂದ ೩೦ ಸಾವಿರ ಜನರಿಗೆ ಆಸನದ ವ್ಯವಸ್ಥೆ ಕಲ್ಪಿಸಲಾಗಿದೆ. ಪ್ರತಿ ನಿತ್ಯವೂ ಸುಮಾರು ೧೫ ರಿಂದ ೨೦ ಸಾವಿರ ಜನರು ಬರುವ ನಿರೀಕ್ಷೆ ಇದ್ದು, 9ನೇ ದಿನ ಒಂದು ಲಕ್ಷಕ್ಕೂ ಅಧಿಕ ಜನರು ಬರುವ ಸಾಧ್ಯತೆ­ಯಿದೆ’ ಎಂದು ಸ್ವಾಗತ ಸಮಿತಿ ಕಾರ್ಯಾ­ಧ್ಯಕ್ಷ ಬಸವರಾಜ ಬೊಮ್ಮಾಯಿ ಹೇಳಿದರು.



ಪ್ರತಿ ನಿತ್ಯ ಕಾರ್ಯಕ್ರಮಕ್ಕೆ ಬರಲಿ­ರುವ ಶರಣರಿಗೆ, ಸಾಹಿತಿಗಳಿಗೆ ಹಾಗೂ ಸ್ವಾಮೀಜಿಗಳಿಗೆ ಮತ್ತು ರಾಜಕಿಯ ಮುಖಂಡ­ರಿಗೆ ಶಿಗ್ಗಾವಿ ಪಟ್ಟಣದ ಗಣ್ಯರ ಮನೆಯಲ್ಲಿ ವಸತಿ ಕಲ್ಪಿಸಲಾ­ಗಿದೆ. ಅಲ್ಲದೇ, ರಾಜ್ಯ, ರಾಷ್ಟ್ರ ಮಟ್ಟದ ಗಣ್ಯರಿಗೆ ಹಾವೇರಿ, ಹುಬ್ಬಳ್ಳಿ ನಗರದಲ್ಲಿ ವಸತಿ ಸೌಲಭ್ಯ ವ್ಯವಸ್ಥೆ ಹಾಗೂ ಗಣ್ಯ­ರನ್ನು ಕರೆತರಲು ವಾಹನ ವ್ಯವಸ್ಥೆ ಮಾಡಲಾಗಿದೆ.



ಕೃಷಿ ಪ್ರದರ್ಶನ, ಹೋಟೆಲ್‌, ಪುಸ್ತಕ ಪ್ರದ­ರ್ಶನ ಹಾಗೂ ವ್ಯಾಪಾರ ಸೇರಿ­ದಂತೆ ಇತರ ವಹಿವಾಟಿಗೆ 200ಕ್ಕೂ ಹೆಚ್ಚು ಮಳಿಗೆಗಳನ್ನು  ತೆರೆಯಲಾಗಿದೆ. ಕಾರ್ಯ­ಕ್ರಮಕ್ಕೆ ಬರುವ ಜನರ ಮನ­ರಂಜನೆ­ಗಾಗಿ ೬ ರಿಂದ ೭ ಎಕರೆ ಭೂಮಿ­ಯಲ್ಲಿ ಮನರಂಜನಾ ಆಟದ ಸಾಮಗ್ರಿ­ಗಳ ವ್ಯವಸ್ಥೆ ಮಾಡಲಾಗಿದೆ.



‘ವಿವಿಧ ರಾಜ್ಯಗಳ ರಾಜಕೀಯ ಮುಖಂಡರು, ನಾಡಿನ ವಿವಿಧ ಮಠಾ­ಧೀಶರು, ಸಾಹಿತಿಗಳು, ಕವಿಗಳು, ಜಾನ­ಪದ ಕಲಾವಿದರು ಈ ಕಾರ್ಯಕ್ರಮಕ್ಕೆ ಬರ­­ಲಿದ್ದಾರೆ’ ಎಂದು ಬುಧವಾರ ಸಿದ್ಧತೆ­ಗಳ ವೀಕ್ಷಿಸಿದ ವಿಧಾನ ಪರಿಷತ್ ಸದಸ್ಯ ಸೋಮಣ್ಣ ಬೇವಿನಮರದ, ಸಿರಿಗೆರೆ ತರಳ­ಬಾಳು ಆಡಳಿತಾಧಿಕಾರಿ ಡಾ.­ಸಿದ್ಧೇ­ಶ್ವರ ಸ್ವಾಮೀಜಿ, ಜಿಲ್ಲಾ ಪಂಚಾಯ್ತಿ ಸದಸ್ಯ ಬಿ.ಟಿ.ಇನಾಮತಿ ತಿಳಿಸಿದ್ದಾರೆ.