ತೆಲಂಗಾಣ ರಚನೆ: ಆಂಧ್ರ ಮುಖ್ಯಮಂತ್ರಿ ಧರಣಿ

ನವದೆಹಲಿ (ಪಿಟಿಐ): ತೆಲಂಗಾಣ ರಾಜ್ಯ ರಚನೆ ವಿರೋಧಿಸಿ ಆಂಧ್ರ­ಪ್ರದೇಶದ ಮುಖ್ಯಮಂತ್ರಿ ಎನ್‌. ಕಿರಣ್‌ ಕುಮಾರ್‌ ರೆಡ್ಡಿ ಅವರು ನವದೆಹಲಿಯ ಜಂತರ್‌ ಮಂತರ್‌ ಮುಂದೆ ಬುಧವಾರ ಐದು ತಾಸಿಗೂ ಹೆಚ್ಚು ಕಾಲ ಧರಣಿ ನಡೆಸಿದರು.  ಅಲ್ಲದೆ ರಾಷ್ಟ್ರಪತಿ ಪ್ರಣವ್‌ ಮುಖರ್ಜಿ ಅವರನ್ನು ಭೇಟಿ ಮಾಡಿ, ಆಂಧ್ರಪ್ರದೇಶವನ್ನು ವಿಭಜನೆ­ ತಡೆಯು­ವಂತೆ ಮನವಿ ಮಾಡಿ­ಕೊಂಡರು.



ನಂತರ ಮಾತನಾಡಿದ ಅವರು, ‘ರಾಜ್ಯದ ಶೇ 75– 80ರಷ್ಟು ಜನರು ರಾಜ್ಯ ಇಬ್ಭಾಗವಾಗುವುದನ್ನು ವಿರೋ­ಧಿ­ಸಿ­ದ್ದಾರೆ. ಜನರ ಈ ಆಶಯವನ್ನು ಗೌರವಿಸಿರುವ ರಾಜ್ಯ ವಿಧಾನ­ಮಂಡಲವು ಮಸೂದೆ ವಿರೋಧಿಸುವ ನಿರ್ಣಯ ಕೈಗೊಂಡಿದೆ. ಈ ವಿಷಯ­ವನ್ನು ನಾವು ರಾಷ್ಟ್ರಪತಿ ಅವರಿಗೂ ಮನವರಿಕೆ ಮಾಡಿದ್ದು, ತಮ್ಮ ಪರಮಾ­ಧಿಕಾರ ಬಳಸಿ ರಾಜ್ಯ ವಿಭಜನೆಯನ್ನು ತಡೆಯುವಂತೆ ಕೋರಿದ್ದೇವೆ’ ಎಂದರು.



ಧರಣಿ ಆರಂಭಿಸುವುದಕ್ಕೂ ಮೊದಲು ರಾಜ್‌ಘಾಟ್‌ಗೆ ತೆರಳಿ ಗಾಂಧಿ ಅವರ ಚಿತಾಭಸ್ಮ ಸ್ಮಾರಕಕ್ಕೆ ಅವರು ನಮಿಸಿದರು. ಧರಣಿಯಲ್ಲಿ ಸೀಮಾಂಧ್ರ ಭಾಗದ ಹಲವು ಶಾಸಕರು ಮತ್ತು ಸಚಿವರು ಭಾಗವಹಿಸಿದ್ದರು. ಈ ಭಾಗದ ಕೇಂದ್ರ ಸಚಿವರಾದ ಎಂ. ಪಲ್ಲಂ ರಾಜು, ಕೆ. ಸಾಂಬಶಿವ ರಾವ್‌, ಡಿ. ಪುರಂದೇಶ್ವರಿ ಮತ್ತು ಕಿಲ್ಲಿ ಕೃಪಾರಾಣಿ ಅವರು ಕೆಲವು ಕಾಲ ಧರಣಿಯಲ್ಲಿ ಪಾಲ್ಗೊಂಡಿದ್ದರು.



ಸುದ್ದಿಸಂಸ್ಥೆಯೊಂದಿಗೆ ಮಾತನಾಡಿದ ಕೆ. ಸಾಂಬಶಿವ ರಾವ್‌, ‘ಸರ್ಕಾರ ಆಂಧ್ರ ಪುನರ್‌ರಚನೆ ಮಸೂದೆಯನ್ನು ಮಂಡಿಸ­ಬಾರದು’ ಎಂದರು. ‘ಸರ್ಕಾರ ಮಸೂದೆ ಮಂಡಿಸಿದರೆ ನಿಮ್ಮ ಮುಂದಿನ ನಡೆ ಏನು’ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ‘ನಾವು ಆ ಸಮಯದಲ್ಲಿ ಸೂಕ್ತ ನಿರ್ಧಾರ ಕೈಗೊಳ್ಳುವೆವು’ ಎಂದರು. ಈ ಮಸೂದೆಯು ಪ್ರಜಾಸತ್ತಾತ್ಮಕ ಆಶಯಕ್ಕೆ ವಿರುದ್ಧವಾದುದು ಎಂದ ಸಚಿವ ಎಂ. ಪಲ್ಲಂ ರಾಜು, ‘ಮಸೂದೆಯ ಈಗಿನ ಸ್ವರೂಪ ನೋಡಿದರೆ ಅದು ಆಂಧ್ರದ ಯಾವುದೇ ಭಾಗಕ್ಕೂ ನ್ಯಾಯ ಒದಗಿಸಿಲ್ಲ.

ಮುಖ್ಯ ಕಳವಳಕಾರಿ ಅಂಶವೆಂದರೆ ನೀರು ಹಂಚಿಕೆ ಮತ್ತು ಹೈದರಾಬಾದ್‌ ನಿವಾಸಿಗಳ ಭದ್ರತೆ. ಈ ವಿಷಯಗಳ ಬಗ್ಗೆ ಮಸೂದೆಯಲ್ಲಿ ಹೆಚ್ಚಿನ ಗಮನ ನೀಡಿಲ್ಲ’ ಎಂದು ದೂರಿದರು.