ಶುಕ್ರವಾರ, ಫೆಬ್ರವರಿ 26, 2021
28 °C

ಬಿಎಸ್‌ವೈ ಅಖಾಡಕ್ಕೆ; ಗರಿಗೆದರಿದ ಚಟುವಟಿಕೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬಿಎಸ್‌ವೈ ಅಖಾಡಕ್ಕೆ; ಗರಿಗೆದರಿದ ಚಟುವಟಿಕೆ

ಶಿವಮೊಗ್ಗ: ಚುನಾವಣೆಯಿಂದ ಚುನಾವಣೆಗೆ ರಾಜ್ಯ ಮತ್ತು ರಾಷ್ಟ್ರ ಮಟ್ಟದಲ್ಲಿ ಶಿವಮೊಗ್ಗ ಕ್ಷೇತ್ರ ಕುತೂಹಲ ಕೆರಳಿಸುತ್ತಲೇ ಬಂದಿದೆ. ಈ ಬಾರಿ ಲೋಕ­ಸಭಾ ಚುನಾವಣೆ ಇನ್ನಷ್ಟು ಕುತೂಹಲ ಮೂಡಿಸಿದ್ದು, ಈಗಾಗಲೇ ರಣರಂಗ ಸಿದ್ಧಗೊಂಡಿದೆ.



ಕಾಂಗ್ರೆಸ್‌, ಜೆಡಿಎಸ್‌ ಪಕ್ಷಗಳು ಅಭ್ಯರ್ಥಿಗಳಿಗಾಗಿ ತಡಕಾಡು­ತ್ತಿ­ರುವಾಗಲೇ ಮಾಜಿ ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಬಿಜೆಪಿ ಅಭ್ಯರ್ಥಿ­ಯಾಗು­ವುದಾಗಿ ಘೋಷಣೆ ಮಾಡಿ­ಕೊಂಡಿ­ದ್ದಾರೆ. ಈಗಾಗಲೇ ಅವರು ಕ್ಷೇತ್ರದಾದ್ಯಂತ ಬಿರುಸಿನ ಪ್ರಚಾರ ಕಾರ್ಯ ಕೈಗೊಂಡಿದ್ದಾರೆ. ಯಡಿಯೂರಪ್ಪ ಅಖಾಡಕ್ಕೆ ಇಳಿ­ದಿದ್ದ­ರಿಂದ ಪ್ರಮುಖವಾಗಿ ಕಾಂಗ್ರೆಸ್‌ –­ಜೆಡಿಎಸ್‌ ಪಕ್ಷಗಳಿಗೆ ಅಭ್ಯರ್ಥಿ ಆಯ್ಕೆ ಗೊಂದಲ ಏರ್ಪಟ್ಟಿದೆ. ಅದು ಸದ್ಯಕ್ಕೆ ಬಗೆಹರಿಯುವ ಲಕ್ಷಣಗಳು ಕಾಣುತ್ತಿಲ್ಲ.



ಕಳೆದ ವಿಧಾನಸಭೆಯಲ್ಲಿ ಕಳೆದು­ಕೊಂಡಿದ್ದನ್ನು ಲೋಕಸಭೆಯಲ್ಲಿ ಪಡೆದು­ಕೊಳ್ಳುವ ತಹತಹ ಬಿಜೆಪಿ­ಯದ್ದು. ಅಧಿಕಾರದ ರುಚಿ ಉಂಡವರಿಗೆ ತತ್ ಕ್ಷಣಕ್ಕೆ ಯಾವು­ದಾದರೂ ಒಂದು ಗೆಲುವು ಬೇಕಾಗಿದೆ. ಅದು ಈಗ ಯಡಿಯೂರಪ್ಪ ರೂಪದಲ್ಲಿ ಸಿಗುತ್ತ­ದೆಂಬ ಆತ್ಮವಿಶ್ವಾಸ ಬಿಜೆಪಿ ಪಕ್ಷದ ಪಾಳಯದಲ್ಲಿದೆ.

‘ಯಡಿಯೂರಪ್ಪ ಈಗಾಗಲೇ ಗೆದ್ದಾಗಿದೆ. ಇನ್ನೇನಿದ್ದರೂ ಗೆಲುವಿನ ಅಂತರದ ಲೆಕ್ಕಾಚಾರ ಅಷ್ಟೇ. ಮೋದಿ ಸರ್ಕಾರದಲ್ಲಿ ಅವರೇ ಮೊದಲ ಸಾಲಿನ ಮಂತ್ರಿ’ ಎಂದೇ ಬಿಜೆಪಿಯ ಎಲ್ಲಾ ನಾಯಕರಿಂದ ಅಬ್ಬರದ ಪ್ರಚಾರ ಸಾಗಿದೆ.



ಈಗಾಗಲೇ ಯಡಿಯೂರಪ್ಪ ಕೂಡ ಕ್ಷೇತ್ರ­ದಾ­ದ್ಯಂತ ಒಂದು ಸುತ್ತಿನ ಪ್ರವಾಸ ಕೈಗೊಂಡು, ಕಾರ್ಯ­ಕರ್ತರ ಸಭೆ ನಡೆಸಿದ್ದಾರೆ. ಭಾಷ­ಣ­ದಲ್ಲಿ ಜಿಲ್ಲೆಗೆ ತಾವು ಮಾಡಿದ ‘ಅಭಿವೃದ್ಧಿ’ಯನ್ನು ಮುಂದಿಟ್ಟು ಮತ­ಯಾಚಿಸುತ್ತಿದ್ದಾರೆ.



ಯಡಿಯೂರಪ್ಪ ಅವರ ‘ಫಲಾನುಭವಿ’ಗಳು ಅವರನ್ನು ಗೆಲ್ಲಿಸಿಕೊಳ್ಳಲು ಶತಾಯಗತಾಯ ಪ್ರಯತ್ನ ಮಾಡು­­ತ್ತಿದ್ದಾರೆ. ಪಕ್ಷದಿಂದ ಕೂಡ ಸಾಲು–ಸಾಲು ಸಭೆ­ಗಳು, ಮತದಾರರ ನೋಂದಣಿ, ಮನೆ–ಮನೆ ಭೇಟಿ ಮತ್ತಿತರ ಕಾರ್ಯಕ್ರಮಗಳು ಸಾಂಗವಾಗಿ ಸಾಗಿವೆ. ಮುಖಂಡರಾದ ಕೆ.ಎಸ್‌.ಈಶ್ವರಪ್ಪ, ಆಯ­ನೂರು ಮಂಜುನಾಥ, ಎಂ.ಬಿ.ಭಾನುಪ್ರಕಾಶ್, ಆರ್‌.­ಕೆ.­ಸಿದ್ದರಾಮಣ್ಣ ಮತ್ತಿತರೆಲ್ಲರಿಗೂ ಒಂದೊಂದು ಬೂತ್‌ನ ಜವಾಬ್ದಾರಿ ವಹಿಸಲಾಗಿದೆ. ಇವರೆಲ್ಲ ಎಷ್ಟೇ ದೊಡ್ಡ­ವ­ರಾದರೂ ಯಡಿಯೂರಪ್ಪ ಗೆಲ್ಲಿಸಲು ಬೂತ್‌ನಲ್ಲಿ ಪ್ರಭಾರಿಯಾಗಿ ಕೆಲಸ ಮಾಡಬೇಕಾಗಿದೆ.



ಮುಂದೆ ಚುನಾವಣಾ ಆಯೋಗದ ಲೆಕ್ಕದ ಕುಣಿಕೆಗೆ ಬೀಳದಿರಲು ಯಾವ ಹತಾರಗಳನ್ನು ಬಳಸ­ಬೇಕೆಂ­ಬುದರ ಬಗ್ಗೆ ಬಿಜೆಪಿ ಈಗಾಗಲೇ ಸ್ಪಷ್ಟ ಚಿಂತನೆ ನಡೆ­ಸಿದೆ. ನರೇಂದ್ರ ಮೋದಿ, ರಾಜನಾಥ ಸಿಂಗ್ ಮತ್ತಿ­ತರ ರಾಷ್ಟ್ರೀಯ ನಾಯಕರನ್ನು ಚುನಾವಣಾ ನೀತಿ ಸಂಹಿತೆ ಘೋಷಣೆ ಮುಂಚಿತವಾಗಿ ಕರೆಸಿಕೊಳ್ಳಲು ಆಲೋಚಿಸಿದೆ.



ಒಳಹೊಡೆತ ಸಾಧ್ಯತೆ: ಈ ಮಧ್ಯೆ ಯಡಿಯೂರಪ್ಪ ಅವರ ಪಕ್ಷ ಹಾರಾಟದಿಂದ ವೈಯಕ್ತಿಕವಾಗಿ ನಷ್ಟಕ್ಕೆ ಒಳಗಾದವರು ಅಷ್ಟು ಸುಲಭಕ್ಕೆ ಅವಮಾನ ಮರೆ­ಯುವ ಸ್ಥಿತಿಯಲ್ಲಿಲ್ಲ. ಹಾಗಾಗಿ, ಯಡಿಯೂರಪ್ಪ ಅವರಿಗೆ ಪಕ್ಷದಲ್ಲೇ ಒಳಹೊಡೆತ ಬೀಳುವ ಸಾಧ್ಯತೆ­ಗಳೂ ಇವೆ ಎಂಬ ಮಾತುಗಳು ಬಿಜೆಪಿ ಗರ್ಭ­ಗುಡಿಯಲ್ಲಿ ಕೇಳಿಬರುತ್ತಿವೆ.



ಇನ್ನು ಕಾಂಗ್ರೆಸ್‌, ಯಡಿಯೂರಪ್ಪ ಎದುರಿಗೆ ಪ್ರಬಲ ಪೈಪೋಟಿಗೆ ಪ್ರಾಮಾಣಿಕರನ್ನೇ ಹುಡುಕ­ಬೇಕಾ­ಗಿದೆ. ಜೆಡಿಎಸ್‌, ಇನ್ನೂ ಎಸ್‌.ಬಂಗಾರಪ್ಪ

ಮೇಲಿನ ಅನುಕಂಪದ ಅಲೆಯನ್ನೇ ನೆಚ್ಚಿಕೊಂಡು ಕುಳಿತಿದೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.