ಭಿತ್ತಿಯಮೇಲೆ ಪ್ರಕೃತಿ ಚಿತ್ರ

ಕಲಾಪ

`ಕಣ್ಣಿಗೆ ಕಂಡಿದ್ದನ್ನೆಲ್ಲ ಗೀಚುವುದು ಸಾಧ್ಯವಾಗದ ಮಾತು. ಏನೋ ಒಂದು ಗೆರೆ ಎಳೆದರೆ ಅದು ಕಲೆಯಾಗಲ್ಲ. ಕಲಾವಿದನಿಗೆ ಯಾವುದೇ ಮಿತಿಯಿಲ್ಲ. ಆದರೆ ಅವನ ಕಣ್ಣು ಸದಾ ಚಲನಶೀಲವಾಗಿರಬೇಕು.



ಕಣ್ಣಲ್ಲಿ ಕಂಡ ವಸ್ತು ಬಣ್ಣದಿಂದ ಮೆರುಗು ಪಡೆದು ಕ್ಯಾನ್ವಾಸ್ ಮೆಲೆ ರಾರಾಜಿಸಬೇಕಾದರೆ ಅವನು ಆ ವಸ್ತುವಿನ ಮೇಲೆ ಏಕಾಗ್ರತೆಯ ದೃಷ್ಟಿ ಬೆಳೆಸಿಕೊಳ್ಳಬೇಕು. ಕುಂಚ ಕೈಗೆತ್ತಿಕೊಳ್ಳುವಾಗ ಚಿತ್ತದ ಸುಖಕ್ಕೆ ಭಂಗ ಬರಬಾರದು. ಈ ಉದ್ದೇಶದಿಂದ ನಾನು ಬಾದಾಮಿ ಪಟ್ಟದ ಕಲ್ಲಿಗೆ ಆಗಾಗ ಭೇಟಿ ನೀಡುತ್ತೇನೆ. ಪ್ರಕೃತಿಯ ಬಗ್ಗೆ ಚಿತ್ರಿಸುವಾಗ ಪ್ರಕೃತಿಯ ಮಡಿಲಿಗಿಂತ ಬೇರೆ ತಾಣ ಬೇಕಾ...?



 ಎಷ್ಟೆಲ್ಲಾ ವಿಸ್ಮಯಗಳನ್ನು ತನ್ನ ಸೆರಗಿನ ತುದಿಗೆ ಕಟ್ಟಿಕೊಂಡಿದ್ದಾಳೆ ಪ್ರಕೃತಿ ಮಾತೆ. ಮೊಗೆದಷ್ಟು ವಿಷಯ ಅವಳಲ್ಲಿದೆ. ಆ ಬೆಟ್ಟ, ಬೆಳದಿಂಗಳು, ಹರಿವ ಜರಿಯ ನಿನಾದ, ಹಚ್ಚಹಸಿರು ಎಲ್ಲವು ನನ್ನ ಚಿತ್ರದ ಮೂಲವಾಗಿದೆ~ ಎಂದು ಮಾತಿಗಿಳಿಯುತ್ತಾರೆ ಕಾಂತರಾಜ್ ಎನ್. 



`ನಾನು ಬೆಂಗಳೂರಿನವ. ಕಲೆಯ ಬಗ್ಗೆ ಬಾಲ್ಯದಿಂದಲೂ ಒಲವಿತ್ತು. ಕಣ್ಣಲ್ಲಿ ತುಂಬಿಕೊಂಡ ಕನಸಿಗೆ ಸ್ಪಷ್ಟ ಚಿತ್ರಣ ನೀಡಲು ಈ ಪ್ರವೃತ್ತಿಯನ್ನೇ ಜೀವನವಾಗಿಸಿಕೊಂಡಿದ್ದೇನೆ. ಲ್ಯಾಂಡ್‌ಸ್ಕೇಪ್ ಮೇಲೆ ಜಲವರ್ಣ ಬಳಸಿ ಪ್ರಕೃತಿಯ ಸೌಂದರ್ಯವನ್ನು ಎಳೆ ಎಳೆಯಾಗಿ ಚಿತ್ರಿಸಿದ್ದೇನೆ. ಹೊಸತನವನ್ನು ಚಿತ್ರಿಸಬೇಕು ಎಂಬ ಹಂಬಲವಿದೆ. ಹಾಗಾಗಿ ಊರೂರು ಸುತ್ತುತ್ತೇನೆ. ಕಾಡುಮೇಡು ಅಲೆಯುತ್ತೇನೆ.



ಈವರೆಗೆ ಇಪ್ಪತ್ನಾಲ್ಕು ಗುಂಪು ಪ್ರದರ್ಶನ ನೀಡಿದ್ದೇನೆ. ಆದರೆ ಇತ್ತೀಚೆಗೆ ಜಲವರ್ಣ ಬಳಕೆ ಕಡಿಮೆಯಾಗುತ್ತಿದೆ. ಈ ಉದ್ದೇಶದಿಂದ ನಾನು ಜಲವರ್ಣ ಬಳಕೆ ಹೆಚ್ಚಿಸಿದ್ದೇನೆ. ತಂಪಾದ ಗಾಳಿ, ಸುಂದರ ಬೆಳದಿಂಗಳಿನ ಚಂದಮಾಮ ಚುಕ್ಕಿಗಳ ಮಧ್ಯೆ ಮಿನುಗುವಾಗ ಕಣ್ಣಲ್ಲಿ ಕನಸು ಮೂಡುವುದಲ್ಲದೇ ನನ್ನ ಕೈಗಳು ಕೂಡ ಸದ್ದಿಲ್ಲದೇ ಗೀಚಲು ಶುರು ಮಾಡುತ್ತದೆ.



ಆದರೆ ಏನೇ ಗೀಚಿದರು ಆ ಗೆರೆಯಲ್ಲಿ ನಾ ಕಂಡ ಭಾವನೆಗಳನ್ನು ವ್ಯಕ್ತಪಡಿಸಬೇಕು. ಆಗ ಅದು ಚಿತ್ರವಾಗಲು ಸಾಧ್ಯ~ ಎಂದು ಚಿತ್ರಕಲೆ ಬಗ್ಗೆ ತನ್ನದೇ ಆಗಿರುವ ಮಾತು ಹೇಳುತ್ತಾರೆ.



ಇವರ ಕೈಯಲ್ಲಿ ಮೂಡಿಬಂದಿರುವ ಪೂರ್ಣಚಂದ್ರನಾಗಿರಬಹುದು, ಪ್ರಕೃತಿಯ ವಿವಿಧ ರೂಪಗಳಾಗಿರಬಹುದು ನೋಡುವ ಕಣ್ಣಿಗೆ ಹಬ್ಬವೆಂದರೆ ತಪ್ಪಾಗಲಾರದು.

`ರಮ್ಯ ಪ್ರಕೃತಿಯ ಮಡಿಲಾದ ಕೊಡಗು ನನ್ನೂರು. ದೇಶ ಸುತ್ತಿ ನೋಡು ಕೋಶ ಓದಿ ನೋಡು ಎಂಬಂತೆ ಮೊದಲು ಈ ವಾಕ್ಯದ ಪರಿಪಾಲನೆ ಮಾಡಿದೆ.



ದಾರಿಯಲ್ಲಿ ಸಾಗುವಾಗ ಚಲಿಸುವಂತೆ ಕಾಣುವ ಮರಗಳು, ಅದರ ತೊಗಟೆಯ ವಿನ್ಯಾಸ, ಒಂದು ಎಲೆ ಹಿಡಿದರೆ ಅದರ ಒಳಗೆ ಚಿತ್ತಾರಗೊಂಡ ಗೆರೆಗಳು ಇವುಗಳೇ ನನಗೆ ಸ್ಫೂರ್ತಿ ತುಂಬಿದ್ದು~ ಎಂದು ಹೇಳುತ್ತಾರೆ ಸುಪ್ರಿಯಾ ಮೂರ್ತಿ.



ಅವರು ತಮ್ಮ ಚಿತ್ರಕ್ಕೆ ಯಾವುದೇ ಶೀರ್ಷಿಕೆ ಇಟ್ಟಿಲ್ಲ. `ನಾ ಕಂಡ ದೃಶ್ಯಕ್ಕೆ ಭಾವನೆಗಳನ್ನು ತುಂಬಿದ್ದೇನೆ. ಅದನ್ನು ನೋಡುವವರು ಕೂಡ ಅವರದೇ ಭಾವದಲ್ಲಿ ನೋಡಲಿ. ಆಗ ಚಿತ್ರಕ್ಕೆ ಸಾರ್ಥಕ್ಯ ಸಿಗುತ್ತದೆ~ ಎಂಬುದು ಅವರ ಮಾತು.



ಅವರು ಕೂಡ ಲ್ಯಾಂಡ್‌ಸ್ಕೇಪ್ ಮೇಲೆ ಜಲವರ್ಣ ಬಳಸಿ ಪ್ರಕೃತಿಯ ಚಿತ್ತಾರವನ್ನು ಚಿತ್ರಿಸಿದ್ದಾರೆ. ಕಲೆಯಲ್ಲಿಯೇ ಮುಂದುವರಿಯುವ ಕನಸು ಕಂಗಳು ಇವರದು. ಚಿತ್ರಕಲಾ ಪರಿಷತ್‌ನಲ್ಲಿ ಇಂದು (ಜೂನ್ 27) ಇವರ ಪ್ರದರ್ಶನ ನಡೆಯಲಿದೆ.