ಮುಗ್ಧ ಕಂದಮ್ಮಗಳ ಬದುಕು ದಾರುಣ

‘ಇಲ್ಲಿನ ಮಕ್ಕಳನ್ನು ಸಾಯಿಸಿರುವುದು ಕೇವಲ ಗುಂಡುಗಳು ಮತ್ತು ಷೆಲ್‌ಗಳಷ್ಟೇ ಅಲ್ಲ...!’

ಜಗತ್ತಿನ ಪ್ರಮುಖ ಹಕ್ಕು ರಕ್ಷಣಾ ಸಂಘಟನೆ ‘ಮಕ್ಕಳನ್ನು ರಕ್ಷಿಸಿ’, (ಸೇವ್‌ ಚಿಲ್ಡ್ರನ್‌) ಸಿರಿಯಾದ ಮಕ್ಕಳ ಆರೋಗ್ಯ ಸ್ಥಿತಿಗತಿಯ ಬಗ್ಗೆ ಅಧ್ಯಯನ ನಡೆಸಿ ಸಿದ್ಧಪಡಿಸಿರುವ ವರದಿಯಲ್ಲಿ ವ್ಯಕ್ತವಾಗಿರುವ ಈ ಅಭಿಪ್ರಾಯದ ಹಿಂದೆ ಸಾವಿರಾರು ಮಕ್ಕಳ ಸಂಕಟವಿದೆ.

ಹೊರಜಗತ್ತಿನ ತಿಳಿವಿನ ಆಚೆಯೇ ಉಳಿದು ಹೋದ ಅನೇಕ ವಿಷಯಗಳ ಬಗ್ಗೆ ಈ ವರದಿ ಬೆಳಕು ಚೆಲ್ಲುತ್ತದೆ. ಆ ವರದಿ ತೆರೆದಿಟ್ಟ ಕರಾಳ ಜಗತ್ತಿನ ಕೆಲವು ಚಿತ್ರಣಗಳು ಇಲ್ಲಿವೆ.



ಸಿರಿಯಾದಲ್ಲಿ ಕಳೆದ ಕೆಲವು ಸಮಯದಿಂದ ನಡೆಯುತ್ತಿರುವ ಆಂತರಿಕ ಸಂಘರ್ಷದಿಂದ ಹೊರ ಜಗತ್ತಿನ ಅರಿವಿಗೆ

ದಕ್ಕಿ­ರುವು­ದ­ಕ್ಕಿಂತ ಅನೇಕ ಪಟ್ಟು ಹೆಚ್ಚು ಭೀಕರ ಪರಿ­ಣಾಮ­ವನ್ನು ಅಲ್ಲಿನ ಮಕ್ಕಳು ಎದುರಿಸುತ್ತಿದ್ದಾರೆ. ಸಿರಿಯಾದ ಆರೋಗ್ಯ ವ್ಯವಸ್ಥೆ ಸಂಪೂರ್ಣ ಕುಸಿದು ಹೋಗಿದ್ದು, ಅಸಂಖ್ಯ ಮಕ್ಕಳು ಸಾವನ್ನಪ್ಪುತ್ತಿ­ದ್ದಾರೆ. ದೀರ್ಘಕಾಲೀನ ಮತ್ತು ತಡೆಗಟ್ಟ­ಬಹು­ದಾದ ರೋಗಗಳು ದೇಶದೆಲ್ಲೆಡೆ ತಾಂಡ­ವವಾಡುತ್ತಿವೆ.



ಆಂತರಿಕ ಸಂಘರ್ಷದ ಪ್ರಕ್ಷುಬ್ಧತೆಗೆ ಇದುವರೆಗೆ ಸುಮಾರು 10,000 ಮಕ್ಕಳು ಬಲಿಯಾಗಿದ್ದಾರೆ. 43 ಲಕ್ಷ ಮಕ್ಕಳು ಯಾವ ನೆರವೂ ಇಲ್ಲದೆ ಬಳಲುತ್ತಿದ್ದಾರೆ. 12 ಲಕ್ಷ ಮಕ್ಕಳು ಇಲ್ಲಿ ಬದುಕಲಾಗದೆ ನೆರೆಯ ದೇಶಗಳಲ್ಲಿ ಆಶ್ರಯ ಪಡೆದಿದ್ದಾರೆ.



ನಾಲ್ಕು ವರ್ಷಗಳ ಹಿಂದೆ 2011ರ ಮಾರ್ಚ್‌ನಲ್ಲಿ ಆರಂಭಗೊಂಡ ಈ ಆಂತರಿಕ ಸಂಘರ್ಷದಿಂದಾಗಿ ಸಿರಿಯಾದ ಆರೋಗ್ಯ ವ್ಯವಸ್ಥೆ ಸಂಪೂರ್ಣ ಛಿದ್ರವಾಯಿತು. ವೈದ್ಯಕೀಯ ವ್ಯವಸ್ಥೆಯೂ ಅಲ್ಲೋಲಕಲ್ಲೋಲ­ವಾಯಿತು. ಇದರ ದಾರುಣ ಪರಿಣಾಮ­ವನ್ನು ಲಕ್ಷಾಂತರ ಮುಗ್ಧ ಮಕ್ಕಳು ಅನುಭವಿಸುವಂತಾ­ಯಿತು. ಸೂಕ್ತ ಚಿಕಿತ್ಸೆ ಲಭ್ಯವಾಗದ ಕಾರಣ­ದಿಂದ ಕ್ಯಾನ್ಸರ್‌, ಮೂರ್ಛೆ­ರೋಗ, ಅಸ್ತಮಾ, ಸಕ್ಕರೆ ಕಾಯಿಲೆ, ಅಧಿಕ ರಕ್ತದೊತ್ತಡ, ಮೂತ್ರಪಿಂಡ ವೈಫಲ್ಯಗ­ಳಿಂದ ಸಾವಿರಾರು ಮಕ್ಕಳು ಅಸುನೀಗಿದ್ದಾರೆ.



ವೈದ್ಯಕೀಯ ವ್ಯವಸ್ಥೆಯ ಹಠಾತ್‌ ಕುಸಿತದಿಂದ ನಿಗದಿತ ಲಸಿಕೆ ನೀಡು­ವುದೂ ಸೇರಿದಂತೆ ಪ್ರಾಥಮಿಕ ಚಿಕಿತ್ಸೆ ಕೂಡ ದುರ್ಲಭವಾಗಿದೆ. ಇದರಿಂದ ಈಗಾಗಲೇ ಚಿಕಿತ್ಸೆ ಪಡೆದಿದ್ದ ಮತ್ತು ಪಡೆದುಕೊಳ್ಳುತ್ತಿರುವ ರೋಗಿಗಳೂ ಸಾವ­ನ್ನಪ್ಪುವಂತಾಯಿತು ಎಂದು ಈ ವರದಿ ಹೇಳುತ್ತದೆ.



ವರದಿ ರೂಪುಗೊಂಡ ಬಗೆ: ಈ ವರದಿ­ ಕೇವಲ ತನ್ನ ಅಧ್ಯಯವನ್ನಷ್ಟೆ ಅವಲಂಬಿಸಿಲ್ಲ. ಬದಲಿಗೆ ವಿಶ್ವ­ಸಂಸ್ಥೆ ಮತ್ತು ವಿಶ್ವ ಆರೋಗ್ಯ ಸಂಘಟನೆ, ರೋಗ ತಡೆ ಮತ್ತು ನಿಯಂತ್ರಣದ ಯೂರೋಪಿ­ಯನ್‌ ಸಂಘಟನೆ, ತಜ್ಞ ವೈದ್ಯರ ಅಭಿ­ಪ್ರಾಯ, ಬೇರೆ ಬೇರೆ ವೈದ್ಯ­ಕೀಯ ಸಂಶೋಧನೆಗಳು ಮತ್ತು ಸಿರಿಯಾ ಸರ್ಕಾರ ಸ್ವತಃ ಬಹಿರಂಗ­ಪಡಿ­ಸಿದ ಮಾಹಿತಿ... ಹೀಗೆ ಅನೇಕ ಮೂಲ­ಗಳಿಂದ ಸಂಗ್ರಹಿಸಿದ ಮಕ್ಕಳ ಪರಿ­ಸ್ಥಿತಿ­ಗಳ ವಿವರ­ಗಳನ್ನೆಲ್ಲ ಪರಿ­ಗಣಿಸಿದೆ.



ಈ ವರದಿಯ ವ್ಯಾಪ್ತಿ ಇಷ್ಟಕ್ಕೆ ಸೀಮಿತ­ಗೊಂಡಿ­ದ್ದರೆ ಅದು ಈಗಾಗಲೇ ಬಂದಿ­ರುವ ಹತ್ತು ವರದಿಗಳಲ್ಲಿ ಹನ್ನೊಂದ­­ನೆ­­ಯ­ದಾಗಿ ಸೇರಿಕೊಳ್ಳುತ್ತಿ­ತ್ತು. ಆದರೆ ‘ಮಕ್ಕ­­ಳನ್ನು ರಕ್ಷಿಸಿ’ ಸಂಘಟನೆ ಸ್ವತಃ ಕಣಕ್ಕಿ­ಳಿದು ಸ್ಥಿತಿಗತಿ ಪರಿಶೀಲಿಸಲು ನಿರ್ಧರಿಸಿತು. ಸಿರಿಯಾದಲ್ಲಿನ ಮಕ್ಕಳು, ಪಾಲ­ಕರು, ವೈದ್ಯಕೀಯ ಸೇವಾಸಂಸ್ಥೆ­ಗಳನ್ನು ಸಂದರ್ಶಿಸಿತು. ಇದರಿಂದ ಅವರಿಗೆ ಸಿರಿಯಾ­­ದಲ್ಲಿನ ಮಕ್ಕಳ ಆರೋಗ್ಯ ಪರಿ­ಸ್ಥಿತಿಯ ಸಮಗ್ರ ಚಿತ್ರಣ ದೊರಕಿತು. 



ಅಧ್ಯಯನದಿಂದ ದೊರಕಿದ ಈ ಚಿತ್ರವು ಹೊರಜಗತ್ತಿನಲ್ಲಿ ಬಿಂಬಿತ­ವಾಗಿ­ರು­ವುಕ್ಕಿಂತಲೂ ಅನೇಕ ಪಟ್ಟು ಭೀಕರವಾಗಿತ್ತು. ಅಮಾನವೀಯ­ವಾಗಿತ್ತು. ಗುಣಪಡಿಸಲಾಗದ ಕಾಯಿಲೆಗಳಿಂದ ಬಳಲುತ್ತಿರುವ ಮಕ್ಕಳ ದಾರುಣ ಬದುಕಿನ ಕೆಲವು ಅಧ್ಯಾಯ­ಗಳಷ್ಟೇ ಇದುವರೆಗೆ ದಾಖಲಾಗಿವೆ. ದಾಖಲಾಗದೆ ಉಳಿದ ಹೃದಯ ವಿದ್ರಾವಕ ಕಥನಗಳು ಇನ್ನೂ ಸಾಕಷ್ಟಿವೆ ಎಂಬ ಸಂಗತಿ ಅರಿವಾಯಿತು. ಈ ಸಂಗತಿಗಳನ್ನು ತನ್ನ ವರದಿಯಲ್ಲಿ  ಬಹಿರಂಗಪಡಿಸಲು ‘ಮಕ್ಕಳನ್ನು ರಕ್ಷಿಸಿ’ ಸಂಘಟನೆ ನಿರ್ಧರಿಸಿತು.



ವೈದ್ಯಕೀಯ ಜಗತ್ತಿನ ಕರಾಳ ಮುಖ: ಬಂಡುಕೋರರಿಂದ ಮುತ್ತಿಗೆ ಹಾಕಲ್ಪ­ಟ್ಟಿದ್ದ ಅಲೆಪ್ಪೊನಂತಹ ನಗರಗಳ­ಲ್ಲಂತೂ ವೈದ್ಯಕೀಯ ವ್ಯವಸ್ಥೆ ಅದೆಷ್ಟು ಕೆಟ್ಟದಾಗಿದೆ ಎಂದರೆ ಬಹುಪಾಲು ವೈದ್ಯರು ಆ ನಗರದಿಂದ ಪಲಾ­ಯನ ಮಾಡಿ­ದ್ದಾರೆ. ಇದ್ದ ಕೆಲವೇ ಕೆಲವು ವೈದ್ಯರು ಮನೆಗಳನ್ನೇ ಆಸ್ಪತ್ರೆ­ಗಳ­ನ್ನಾಗಿ ಪರಿವರ್ತಿಸಿ­ಕೊಂಡಿದ್ದಾರೆ. ಕೊಠಡಿಗಳು ಆಪ­ರೇಷನ್‌ ಥಿಯೇಟರ್‌­ಗಳಾಗಿ ಬದಲಾಗಿವೆ!

ತೀವ್ರ ರಕ್ತಸ್ರಾವದಿಂದ ಗಾಯಾಳು ಮಕ್ಕಳು ಸಾಯುವುದನ್ನು ತಪ್ಪಿಸಲು ಅವರಿಗೂ ಅಂಗಚ್ಛೇದ ಮಾಡುವುದರ ಹೊರತಾಗಿ ಬೇರೆ ಮಾರ್ಗಗಳಿಲ್ಲ.



ನೋವು ನಿವಾರಕ ಮಾತ್ರೆಗಳು ಮತ್ತು ಶಸ್ತ್ರಚಿಕಿತ್ಸೆಗೆ ಸಂಬಂಧಪಟ್ಟ ಔಷಧಗಳ ಕೊರತೆ ತೀವ್ರವಾಗಿದೆ. ವಿದ್ಯುತ್‌ ಶಕ್ತಿಯ ಕೊರತೆಯಿಂದ ಇನ್‌ಕ್ಯುಬೇಟರ್‌ನಲ್ಲಿ ಇರಿಸಲಾದ ನವಜಾತ ಶಿಶುಗಳು ಅಲ್ಲಲ್ಲೇ ಸಾಯು­ತ್ತಿವೆ. ಗಾಯಾಳು ಮಕ್ಕ­ಳೊಂದಿಗೆ ವೈದ್ಯ­ರಿ­ಲ್ಲದ ಖಾಲಿ ಆಸ್ಪತ್ರೆಗೆ ಬಂದ ದುಃಖ­ತಪ್ತ ಪಾಲಕರು ತಾವೇ ಕೃತಕ ಉಸಿರಾಟದ ಟ್ಯೂಬ್‌ಗಳನ್ನು ಮಕ್ಕಳಿಗೆ ಹಾಕುತ್ತಾರೆ. ಪ್ರಸವಪೂರ್ವ ಮತ್ತು ಹೆರಿಗೆ ಸಮಯ­ದಲ್ಲಿ ಮಹಿಳೆಗೆ ನೀಡಬೇಕಾದ ಆರೋಗ್ಯ ಸೇವೆಗಳು ಹೆಚ್ಚು ಕಡಿಮೆ ನಿಂತೇ ಬಿಟ್ಟಿದ್ದರಿಂದ ಯಾವುದೇ ವೈದ್ಯಕೀಯ ನೆರವಿಲ್ಲದೆ ಹೆರಿಗೆಯಾಗುತ್ತಿ­ರುವವರ ಸಂಖ್ಯೆ ಹೆಚ್ಚಿದೆ. ಆದರೆ ಕಳೆದ ಮೂರು ವರ್ಷಗಳಲ್ಲಿ ಶಸ್ತ್ರಚಿಕಿತ್ಸೆಯ ಸಹಾಯದಿಂದ ಹೆರಿಗೆಯಾದ ಮಹಿಳೆ­ಯರ ಪ್ರಮಾಣವೂ ಶೇ 45ರಷ್ಟು ಹೆಚ್ಚಿದೆ.



ವೈದ್ಯರ ಕೊರತೆಯಿಂದಾಗಿ ಈಗಷ್ಟೇ ವೈದ್ಯಕೀಯ ಪದವಿ ಮುಗಿಸಿ ಬಂದ­ವರೂ ನೂರಾರು ಶಸ್ತ್ರ­ಚಿಕಿತ್ಸೆ­ಯನ್ನು ಮಾಡಿದ್ದಾರೆ. ಇಲ್ಲಿ ಕೆಲ­ವೊಮ್ಮೆ ವೈದ್ಯಕೀಯ ವಿದ್ಯಾರ್ಥಿ­ಯೂ ಮಕ್ಕ­ಳಿಗೆ ಚಿಕಿತ್ಸೆ ನೀಡುವ ತಜ್ಞ­ವೈದ್ಯನಾಗುತ್ತಾನೆ.!



ಸ್ಪಾರೊ ವರದಿ: ನ್ಯೂಯಾರ್ಕ್‌ನ ಮೌಂಟ್‌ ಸಿನೈ­ನ­ಲ್ಲಿನ ಇಕಾಹ್ನ್‌ ವೈದ್ಯಕೀಯ ಸಂಸ್ಥೆಯ ಉಪ­ನಿರ್ದೇಶಕಿ ಡಾ.ಅನ್ನಿ ಸ್ಪಾರೊ ಅವರು ಸಿರಿಯಾ ಮಕ್ಕಳ ಆರೋಗ್ಯ ಪರಿ­ಸ್ಥಿತಿ ಕುರಿತು ಅಧ್ಯಯನ ನಡೆಸಿ­ದ್ದಾರೆ. ವಿಶ್ವ ಆರೋಗ್ಯ ಸಂಘಟನೆ (ಡಬ್ಲೂಎಚ್‌ಒ)ಯ ಅಧಿಕಾರಿ­ಗ­ಳು ಖಚಿತ­ಪಡಿ­ಸಿ­ರು­ವುದ­ಕ್ಕಿಂತ ಇಲ್ಲಿನ ರೋಗಿ­ಗಳ ಸಂಖ್ಯೆ ಮತ್ತು ಸೋಂಕು ಹಬ್ಬುವ ಭಯ ಹಲವು ಪಟ್ಟು ಹೆಚ್ಚಿದೆ ಎಂದು ಅವರು ತಮ್ಮ ಅಧ್ಯಯನದಲ್ಲಿ ಪ್ರತಿಪಾದಿ­ಸಿ­­ದ್ದಾರೆ. ಆದರೆ ಡಬ್ಲೂಎಚ್‌ಒ ಇದನ್ನು ಒಪ್ಪಿಲ್ಲ.



‘ಸಿರಿಯಾ ಪೋಲಿಯೊ ನಿರ್ಮೂಲನೆ­ಗೊಳಿ­ಸಿದ್ದ ದೇಶ­­­ವಾಗಿತ್ತು. ಆದರೆ ಅಲ್ಲಿ ಈಗ ಪೋಲಿಯೊ ಮರುಕಳಿಸಿದೆ. ಸಾಮಾ­ನ್ಯ­ವಾಗಿ ಜನರು ಅಲ್ಲಿನ ಯುದ್ಧ ಮತ್ತು ರಾಜ­ಕೀಯ ಪರಿಸ್ಥಿತಿಗಳ ಬಗ್ಗೆ ಮಹತ್ವ ನೀಡಿ ಮಾತನಾಡಿಕೊಳ್ಳು­ತ್ತಾರೆ. ಆದರೆ ಮನುಷ್ಯರ ಮೇಲೆ ಆಗುವ ಪರಿಣಾ­ಮ­ವನ್ನು ಗಣ­ನೆಗೆ ತೆಗೆದುಕೊ­ಳ್ಳುವುದೇ ಇಲ್ಲ’ ಎಂದು ಸ್ಪಾರೊ ಅಭಿಪ್ರಾಯಪಡುತ್ತಾರೆ.



‘ಮಕ್ಕಳನ್ನು ರಕ್ಷಿಸಿ’ ಸಂಘಟನೆಯ ಪ್ರಾದೇಶಿಕ ನಿರ್ದೇಶಕಿ ಮಿಸ್ಟಿ ಬಸ್‌ವೆಲ್‌ ಸಂದರ್ಶನವೊಂದ­ರಲ್ಲಿ ಸ್ಪಾರೊ ಅವರ ವರದಿಯ ಕುರಿತು ಮಾತನಾಡುತ್ತಾ ‘ಸ್ಪಾರೊ ಅವರ ಸಂಶೋಧನೆ ಪ್ರಸ್ತುತ­ವೆನಿಸುತ್ತದೆ. ಯಾಕೆಂದರೆ ಸಿರಿಯಾ­ದಲ್ಲಿ ಇಂದಿಗೂ ಹಲವಾರು ಮಕ್ಕಳು ಸಾಯು­ತ್ತಿದ್ದಾರೆ. ಗಾಯಾಳು­ಗಳಾ­ಗುತ್ತಿ­ದ್ದಾರೆ. ಅಂಗಹೀನ­ರಾಗು­ತ್ತಿ­ದ್ದರೆ’ ಎಂದಿದ್ದಾರೆ.