ಯುವ ಲೇಖಕರಿಂದ ಪ್ರಶಸ್ತಿ ವಾಪಸ್

ಬೆಂಗಳೂರು: ಸಂಶೋಧಕ ಎಂ.ಎಂ.ಕಲಬುರ್ಗಿ ಅವರ ಹತ್ಯೆ ಪ್ರಕರಣದ ತನಿಖೆ ವಿಳಂಬವಾಗುತ್ತಿದೆ ಎಂದು ಆರೋಪಿಸಿ ಆರು ಯುವ ಲೇಖಕರು ತಾವು ಪಡೆದಿದ್ದ 2010ನೇ ಸಾಲಿನ ಬೆಂಗಳೂರು ಮಹಾನಗರ ಸಾರಿಗೆ ನಿಗಮದ ‘ಅರಳು ಸಾಹಿತ್ಯ ಪ್ರಶಸ್ತಿ’ಯನ್ನು ಶನಿವಾರ ಹಿಂದಿರುಗಿಸಿದರು.

ಬೆಳಗಾವಿಯ ವೀರಣ್ಣ ಮಡಿವಾಳರ, ಮಂಡ್ಯದ ಟಿ. ಸತೀಶ್ ಜವರೇಗೌಡ, ಧಾರವಾಡದ ಸಂಗಮೇಶ ಮೆಣಸಿನಕಾಯಿ, ಉತ್ತರ ಕನ್ನಡದ ಹನುಮಂತ ಹಾಲಿಗೇರಿ, ರಾಯಚೂರಿನ ಚಿದಾನಂದ ಸಾಲಿ, ಶ್ರೀದೇವಿ ವಿ. ಆಲೂರ ಪ್ರಶಸ್ತಿ ವಾಪಸು ಮಾಡಿದವರು. ಬೆಂಗಳೂರು ಮಹಾನಗರ ಸಾರಿಗೆ ನಿಗಮದ ಈ ಪ್ರಶಸ್ತಿಕನ್ನಡ ಸಾಹಿತ್ಯ ಪರಿಷತ್ತು ನೀಡುತ್ತದೆ.
ಐವರು ಲೇಖಕರು ಸಾಹಿತಿ ಚಂದ್ರಶೇಖರ ಪಾಟೀಲ ಅವರೊಂದಿಗೆ ಬೆಳಿಗ್ಗೆ ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಪುಂಡಲೀಕ ಹಾಲಂಬಿ ಅವರನ್ನು ಭೇಟಿ ಮಾಡಿ, ಪ್ರಶಸ್ತಿ ಪತ್ರ, ಫಲಕ ಮತ್ತು ₹ 10 ಸಾವಿರ ನಗದು ಪುರಸ್ಕಾರದ ಚೆಕ್‌ನ್ನು ಹಿಂದಿರುಗಿಸಿದರು.

ಈ ವೇಳೆ ಹಾಲಂಬಿ ಅವರು ಪ್ರಶಸ್ತಿ ಹಿಂತಿರುಗಿಸದಂತೆ ಐದು ಜನರ ಮನವೋಲಿಸಲು ಪ್ರಯತ್ನ ಪಟ್ಟರಾದರೂ, ಅದು ಸಾಧ್ಯವಾಗಲಿಲ್ಲ. ‘ಕಲಬುರ್ಗಿ ಅವರು ನಮ್ಮ ಆರು ಜನರಿಗೂ ತುಂಬಾ ಆಪ್ತವಾಗಿದ್ದವರು. ಈ ಪ್ರಶಸ್ತಿಯನ್ನು ಅವರ ಸಮ್ಮುಖದಲ್ಲಿ ಪಡೆದ ಖುಷಿ,  ಸಾರ್ಥಕತೆ ನಮ್ಮಲ್ಲಿತ್ತು.  ಅವರ ಹತ್ಯೆ ಖಂಡಿಸಿ ಈ ಪ್ರಶಸ್ತಿ ವಾಪಸ್ ನೀಡಿದ್ದೇವೆ’ ಎಂದು  ವೀರಣ್ಣ ಮಡಿವಾಳರ ಹೇಳಿದರು.

ಕಣ್ಣೀರಿಟ್ಟ ಕಲಬುರ್ಗಿ ಪತ್ನಿ
ಧಾರವಾಡ: ‘ಒಂದು ತಿಂಗಳು ಕಳೆದರೂ ಪತಿಯ ಹಂತಕರು ಪತ್ತೆಯಾಗದೇ ಇರುವುದು ತೀವ್ರ ಬೇಸರ ತಂದಿದೆ’ ಎಂದು ಡಾ.ಎಂ.ಎಂ. ಕಲಬುರ್ಗಿ ಅವರ ಪತ್ನಿ ಉಮಾದೇವಿ, ತಮ್ಮನ್ನು ಶನಿವಾರ ಭೇಟಿಯಾದ ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಬಿ.ಕೆ.ಹರಿಪ್ರಸಾದ್ ಅವರ ಎದುರು ಕಣ್ಣೀರಿಟ್ಟರು.