ರಾತ್ರಿ ಮದ್ಯಪಾನಕ್ಕೆ ನಿರ್ಬಂಧ

ಟೊಕಿಯೋ (ಐಎಎನ್‌ಎಸ್): ಸೇನೆಯಲ್ಲಿ ಶಿಸ್ತು ತರುವ ದೃಷ್ಟಿಯಿಂದ ಇಲ್ಲಿನ ಅಮೆರಿಕ ನೌಕಾಪಡೆಯ ಸಿಬ್ಬಂದಿ ವರ್ಗ ರಾತ್ರಿ ವೇಳೆ ಮದ್ಯಪಾನ ಮಾಡುವುದನ್ನು ನಿಷೇಧಿಸಲಾಗಿದೆ.

ರಾತ್ರಿ 10ಗಂಟೆಯಿಂದ ಬೆಳಿಗ್ಗೆ 8 ಗಂಟೆ ಅವಧಿಯಲ್ಲಿ ನೌಕಾಪಡೆಯ ಸಿಬ್ಬಂದಿ ಮದ್ಯಪಾನ ಮಾಡುವಂತಿಲ್ಲ. ರಜಾದಿನಗಳಲ್ಲೂ ಈ ನಿಷೇಧ ಅನ್ವಯವಾಗುತ್ತದೆ.

ಕಳೆದ ತಿಂಗಳು ಒಕಿನವಾದಲ್ಲಿ ಅತ್ಯಾಚಾರ ಪ್ರಕರಣವೊಂದ ಹಿನ್ನೆಲೆಯಲ್ಲಿ ರಾತ್ರಿ 11 ಗಂಟೆಯಿಂದ ಬೆಳಿಗ್ಗೆ 5 ಗಂಟೆ ವರೆಗೆ ನಿಷೇಧಾಜ್ಞೆ ಹೇರಲಾಗಿತ್ತು.  ಆದರೂ ಅಮೆರಿಕದ ನೌಕಾ ಪಡೆ ಸಿಬ್ಬಂದಿ ಅಪರಾಧ ಕೃತ್ಯ ಎಸಗಿದ್ದಾರೆ ಎಂಬ ದೂರಿನ ಹಿನ್ನೆಲೆಯಲ್ಲಿ ಈ ಕ್ರಮ ತೆಗೆದುಕೊಳ್ಳಲಾಗಿದೆ.