ಲೋಕಪಾಲ ಸಭೆ ಬಹಿಷ್ಕರಿಸಬಾರದಿತ್ತು

ಬುಧವಾರ, ಜೂಲೈ 17, 2019
27 °C

ಲೋಕಪಾಲ ಸಭೆ ಬಹಿಷ್ಕರಿಸಬಾರದಿತ್ತು

Published:
Updated:

ಬೆಂಗಳೂರು: `ಬಾಬಾ ರಾಮದೇವ್ ಹಾಗೂ ಪ್ರತಿಭಟನಾ ನಿರತರನ್ನು ದೆಹಲಿ ಪೊಲೀಸರು ತೆರವುಗೊಳಿಸಿದ ಪ್ರಕರಣಕ್ಕೆ ವಿರೋಧ ವ್ಯಕ್ತಪಡಿಸಿದ ನಾಗರಿಕಸಮಾಜ ಪ್ರತಿನಿಧಿಗಳು ಲೋಕಪಾಲ್ ಮಸೂದೆ ಕರಡು ರಚನಾ ಸಮಿತಿಯ ಸಭೆಯನ್ನು ಬಹಿಷ್ಕರಿಸಬಾರದಿತ್ತು~ ಎಂದು `ಐ ಪೇಡ್ ಎ ಬ್ರೈಬ್~ (ಐಪಿಎಬಿ) ಆನ್‌ಲೈನ್ ಸಂಘಟನೆಯ ಸಂಯೋಜಕ ಟಿ.ಆರ್. ರಘುನಂದನ್ ಅಭಿಪ್ರಾಯಪಟ್ಟರು. 



  ನಗರದಲ್ಲಿ ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು `ಸಭೆಯನ್ನು ಬಹಿಷ್ಕರಿಸಿದ್ದರಿಂದಾಗಿ ಅಪೂರ್ವ ಅವಕಾಶವೊಂದು ಕೈ ತಪ್ಪಿದಂತಾಗಿದೆ. ಸಭೆಯಲ್ಲಿ ಭಾಗವಹಿಸಿ ಪ್ರತಿಭಟನೆ ನಡೆಸಿದ್ದರೆ ಅದಕ್ಕೆ ಸಾಕಷ್ಟು ಒತ್ತು ಸಿಗುತ್ತಿತ್ತು~ ಎಂದರು.



`ಜನ ಲೋಕಪಾಲ್ ಕಾಯ್ದೆ ಅಸ್ತಿತ್ವಕ್ಕೆ ಬರುವವರೆಗೆ ಸರ್ಕಾರದೊಂದಿಗೆ ನಿರಂತರ ಮಾತುಕತೆ ಅವಶ್ಯಕ. ಈ ಸಂದರ್ಭದಲ್ಲಿ ಯಾವುದೇ ಪ್ರಚೋದನೆಗೆ ನಾಗರಿಕ ಸಮಾಜದ ಪ್ರತಿನಿಧಿಗಳು ಹಾದಿ ತಪ್ಪಬಾರದು~ ಎಂದು ಅವರು ತಿಳಿಸಿದರು.



`ಕರಡು ರಚನೆಗೆ ಸಂಬಂಧಿಸಿದಂತೆ ಸರ್ಕಾರದೊಂದಿಗೆ ಅಣ್ಣಾ ಹಜಾರೆ ಹಾಗೂ ಪ್ರತಿನಿಧಿಗಳು ಚರ್ಚೆ, ಸಂಧಾನ ಮುಂದುವರಿಸಬೇಕು. ಅನೇಕ ಸಮಸ್ಯೆಗಳು ಸಭೆಯಲ್ಲಿ ಚರ್ಚೆಯಾಗಿದ್ದು ಕೆಲವು ಭಿನ್ನಾಭಿಪ್ರಾಯಗಳನ್ನು ಅಲ್ಲಿಯೇ ಬಗೆಹರಿಸಿಕೊಳ್ಳುವುದು ಸೂಕ್ತ~ ಎಂದು ಹೇಳಿದರು.



`ರಾಜ್ಯದ ಸಬ್‌ರಿಜಿಸ್ಟ್ರಾರ್ ಕಚೇರಿಗಳು ಲಂಚದ ಕೂಪಗಳಾಗಿರುವುದು ಐಪಿಎಬಿ ನಡೆಸಿದ ಅಧ್ಯಯನದಿಂದ ಬಹಿರಂಗಗೊಂಡಿದೆ. ಕಚೇರಿಯ ಸಿಬ್ಬಂದಿ ನೇರವಾಗಿ ಲಂಚ ಪಡೆಯುತ್ತಿರುವುದು 198 ವರದಿಗಳಲ್ಲಿ ಬಹಿರಂಗಗೊಂಡಿದೆ.113 ಪ್ರಕರಣಗಳಲ್ಲಿ ಬಿಲ್ಡರ್‌ಗಳು,ವಕೀಲರು, ಏಜೆಂಟರ ಮುಖಾಂತರ ಹಣ ಪಡೆಯಲಾಗಿದೆ. 42 ಪ್ರಕರಣಗಳಲ್ಲಿ ಲಂಚ ಪಡೆದಿರುವುದಕ್ಕೆ ಕಾರಣ ತಿಳಿದು ಬಂದಿಲ್ಲ~ ಎಂದು ಅವರು ತಿಳಿಸಿದರು.



`ಸಬ್‌ರಿಜಿಸ್ಟ್ರಾರ್ ಕಚೇರಿಗಳಲ್ಲಿ ವರ್ಗಾವಣೆ ಎಂಬುದು ಉದ್ಯಮವಾಗಿದೆ. 2004ರಿಂದ ಈವರೆಗೆ ವಿವಿಧ ಪಕ್ಷಗಳ ಅಧಿಕಾರಾವಧಿಯಲ್ಲಿ ಬೆಂಗಳೂರು ಸುತ್ತಮುತ್ತಲಿನ ಕಚೇರಿಗಳಲ್ಲಿ 1462 ವರ್ಗಾವಣೆಗಳಾಗಿವೆ.ವರ್ಗಾವಣೆಗಾಗಿ ಶಾಸಕರು ಸಂಸದರಿಂದ ಕೂಡ ಶಿಫಾರಸು ಪತ್ರ ತರಲಾಗಿದೆ~ ಎಂದರು.



 `ವರ್ಗಾವಣೆಗೆ ಸಂಬಂಧಿಸಿದಂತೆ ಕಾರಣ ಕೇಳಿದರೆ ಸಾರ್ವಜನಿಕ ಹಿತಾಸಕ್ತಿಯ ಕಾರಣ ನೀಡಲಾಗುತ್ತಿದೆ. ಹಾಗಾದರೆ ಸಾರ್ವಜನಿಕ ಹಿತಾಸಕ್ತಿಯಿಂದ ನಡೆದ ವರ್ಗಾವಣೆಯ ಬಗ್ಗೆ ಸಾರ್ವಜನಿಕವಾಗಿ ಸಂಬಂಧಪಟ್ಟವರು ಹೇಳಿಕೆ ನೀಡಬೇಕು~ ಎಂದು ಅವರು ಒತ್ತಾಯಿಸಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry