ಸೋಮವಾರ, ಆಗಸ್ಟ್ 10, 2020
24 °C

ವರದಕ್ಷಿಣೆ ಹೆಣ್ಣು ಭ್ರೂಣ ಹತ್ಯೆಗೆ ಕಾರಣ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ವರದಕ್ಷಿಣೆ ಹೆಣ್ಣು ಭ್ರೂಣ ಹತ್ಯೆಗೆ ಕಾರಣ

ಬೆಂಗಳೂರು:  `ಹೆಣ್ಣು ಭ್ರೂಣ ಹತ್ಯೆಯನ್ನು ಮಾಡಬಾರದೆಂದು ಕಾನೂನಿದ್ದರೂ ಸಹ ಅದರ ಪಾಲನೆಯಾಗುತ್ತಿಲ್ಲ. ಇದು ನೋವಿನ ಸಂಗತಿಯಾಗಿದೆ~ ಎಂದು ಸುಮಂಗಲಿ ಸೇವಾಶ್ರಮದ ಅಧ್ಯಕ್ಷೆ ಎಸ್.ಜಿ. ಸುಶೀಲಮ್ಮ ಹೇಳಿದರು.



ಮಹಿಳೆಯರಿಗಾಗಿ ಮಹಿಳಾ ವೇದಿಕೆಯು `ಸ್ತ್ರೀ ಭ್ರೂಣ ಹತ್ಯೆಯಲ್ಲಿ ಮಹಿಳೆಯರ ಪಾತ್ರ~ ಎಂಬ ವಿಷಯದ ಕುರಿತು ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಭಾಂಗಣದಲ್ಲಿ ಶುಕ್ರವಾರ ಏರ್ಪಡಿಸಿದ್ದ ವಿಚಾರ ಗೋಷ್ಠಿಯಲ್ಲಿ ಅವರು ಮಾತನಾಡಿದರು.



`ಹೆಣ್ಣುಮಗು ಹುಟ್ಟಿದರೆ, ವರದಕ್ಷಿಣೆ ನೀಡಬೇಕು, ಮದುವೆಗೆ ಸಾಕಷ್ಟು ಹಣವನ್ನು ಖರ್ಚು ಮಾಡಬೇಕು. ನಾವು ಪೋಷಣೆ ಮಾಡಿ ಬೇರೆಯವರ ಮನೆಗೆ ಕಳುಹಿಸಬೇಕೇ, ಎಂಬ ಧೋರಣೆಯಿಂದ ಇಂದು ಹೆಣ್ಣುಭ್ರೂಣ ಹತ್ಯೆಯನ್ನು ಮಾಡಲಾಗುತ್ತಿದೆ~ ಎಂದರು.



`ಈ ರೀತಿ ಭ್ರೂಣ ಹತ್ಯೆಯಿಂದ ಸಮಾಜದಲ್ಲಿ ಮತ್ತು ಪ್ರಕೃತಿಯಲ್ಲಿ ಅಸಮತೋಲನ ಕಂಡುಬರುತ್ತದೆ. ಆಗಲೂ ಅನುಭವಿಸುವುದು ಹೆಣ್ಣುಮಕ್ಕಳೇ ಆಗಿದ್ದಾರೆ. ಈ ರೀತಿ ಉಂಟಾಗುವ ಪರಿಸ್ಥಿತಿಗೆ ಸಮಾಜವೇ ಹೊಣೆಯಾಗುತ್ತದೆ~ ಎಂದು ಹೇಳಿದರು.



`ವೈದ್ಯರು ಮತ್ತು ಆಸ್ಪತ್ರೆಗಳಲ್ಲಿ ಹೆಣ್ಣು ಅಥವಾ ಗಂಡು ಎಂಬುದನ್ನು ಪರೀಕ್ಷಿಸಿ ಹೇಳುವುದನ್ನು ಬಿಡಬೇಕು. ಹೆಣ್ಣು ಭ್ರೂಣ ಹತ್ಯೆಗೆ ಅಪ್ಪ-ಅಮ್ಮ, ವೈದ್ಯರು, ನರ್ಸ್‌ಗಳು, ಸಮಾಜ ಎಲ್ಲರೂ ಹೊಣೆಯಾಗುತ್ತಾರೆ~ ಎಂದರು.

ಸಾಹಿತಿ ಬಿ.ಟಿ.ಲಲಿತಾನಾಯಕ್ ಮಾತನಾಡಿ, `ಹೆಣ್ಣಿನ ಬಗ್ಗೆ ತಿರಸ್ಕಾರ ಇಂದು ನಿನ್ನೆಯದಲ್ಲ. ಅನಾದಿ ಕಾಲದಿಂದಲೂ ಈ ಶೋಷಣೆ, ತಿರಸ್ಕಾರ ನಡೆದುಕೊಂಡು ಬಂದಿದೆ. ಸಮಾಜದ ಬೆಳವಣಿಗೆಗೆ ಹೆಣ್ಣು-ಗಂಡು ಇಬ್ಬರೂ ಬೇಕು. ಆಗಲೇ ಸಮತೋಲನವಾಗಲು ಸಾಧ್ಯವಾಗುತ್ತದೆ~ ಎಂದರು.



`ಹೆಣ್ಣುಮಕ್ಕಳಲ್ಲಿ ಸೌಂದರ್ಯ ಪ್ರಜ್ಞೆಗಿಂತ ಜ್ಞಾನ ಮತ್ತು ಅರಿವು ಹೆಚ್ಚಾಗಬೇಕು. ಆಗಲೇ ಅವರು, ತಮ್ಮ ಅಸ್ತಿತ್ವಕ್ಕಾಗಿ ಹೋರಾಟ ನಡೆಸಬಹುದು. ಅವರು ಶಿಕ್ಷಿತರಾಗಬೇಕು. ಆಗಲೇ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ಸಾಧ್ಯವಾಗುತ್ತದೆ~ ಎಂದರು.



ಕಾರ್ಯಕ್ರಮದಲ್ಲಿ ಅಂಕಣಕಾರರಾದ ಪ್ರೊ.ಬಿ.ನಾರಾಯಣಮ್ಮ, ಕರ್ನಾಟಕ ಆಡಳಿತ ನ್ಯಾಯ ಮಂಡಳಿಯ ನಿವೃತ್ತ ನ್ಯಾಯಾಂಗ ಸದಸ್ಯೆ ಟಿ.ಎನ್. ಮಂಜುಳಾದೇವಿ, ನಾರಾಯಣ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯ ವ್ಯವಸ್ಥಾಪಕ ಡಾ.ವಿ. ನಾರಾಯಣಸ್ವಾಮಿ ಮತ್ತಿತರರು ಭಾಗವಹಿಸಿದ್ದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.