ಶುಕ್ರವಾರ, ಏಪ್ರಿಲ್ 16, 2021
31 °C

ವಿಜಯದೊಂದಿಗೆ ಹೊಸ ಋತುವಿನ ಆರಂಭ ನಿರೀಕ್ಷೆ: ಶ್ರೀಕಾಂತ್

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಮುಂಬೈ (ಪಿಟಿಐ): `ಈ ಕ್ರಿಕೆಟ್ ಋತುವಿನ ಮೊದಲ ಪ್ರವಾಸವು ವಿಜಯದೊಂದಿಗೆ ಆರಂಭವಾಗಬೇಕು. ಅದೇ ನಮ್ಮ ನಿರೀಕ್ಷೆಯಾಗಿದೆ~ ಎಂದು ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿಯ (ಬಿಸಿಸಿಐ) ರಾಷ್ಟ್ರೀಯ ಆಯ್ಕೆ ಸಮಿತಿ ಮುಖ್ಯಸ್ಥ ಕೃಷ್ಣಮಾಚಾರಿ ಶ್ರೀಕಾಂತ್ ಹೇಳಿದ್ದಾರೆ.



`ಲಭ್ಯವಿರುವ ಉತ್ತಮ ಆಟಗಾರರನ್ನು ತಂಡಕ್ಕೆ ಆಯ್ಕೆ ಮಾಡಲಾಗಿದೆ. ತಂಡಕ್ಕೆ ಇದು ಈ ಋತುವಿನ ಮೊದಲ ವಿದೇಶ ಪ್ರವಾಸ. ಆದ್ದರಿಂದ ಸರಣಿ ವಿಜಯ ಸಾಧ್ಯವಾಗಬೇಕೆಂದು ಬಯಸುವುದು ಸಹಜ~ ಎಂದು ಅವರು ಬುಧವಾರ ಸುದ್ದಿಗಾರರಿಗೆ ತಿಳಿಸಿದರು.



`ಸಚಿನ್ ತೆಂಡೂಲ್ಕರ್ ಈ ಪ್ರವಾಸಕ್ಕೆ ಲಭ್ಯವಾಗುತ್ತಿಲ್ಲ. ಆದರೆ ಅವರು ಭಾರತದಲ್ಲಿ ನ್ಯೂಜಿಲೆಂಡ್ ವಿರುದ್ಧದ ಸರಣಿಯಲ್ಲಿ ಆಡುತ್ತಾರೆ~ ಎಂದ ಶ್ರೀಕಾಂತ್ `ಈಗ ಆಯ್ಕೆ ಮಾಡಿರುವ ತಂಡವು ಪ್ರಭಾವಿ ಬ್ಯಾಟಿಂಗ್ ಕ್ರಮಾಂಕವನ್ನು ಹೊಂದಿದೆ. ಬೌಲಿಂಗ್ ವಿಭಾಗದಲ್ಲಿಯೂ ಸಮರ್ಥರಿದ್ದಾರೆ. ಜಹೀರ್ ಖಾನ್ ಸೇರಿದಂತೆ ತಂಡದಲ್ಲಿರುವ ಎಲ್ಲ ಬೌಲರ್‌ಗಳೂ ಇತ್ತೀಚೆಗೆ ಒಳ್ಳೆಯ ಪ್ರದರ್ಶನ ನೀಡಿದ್ದಾರೆ~ ಎಂದು ವಿವರಿಸಿದರು.



ಜುಲೈ 21ರಿಂದ ಆಗಸ್ಟ್ 7ರವರೆಗೆ ಶ್ರೀಲಂಕಾದಲ್ಲಿ ನಡೆಯಲಿರುವ ಏಕದಿನ ಸರಣಿ ಹಾಗೂ ಒಂದು ಟ್ವೆಂಟಿ-20 ಪಂದ್ಯಕ್ಕೆ ತಂಡವನ್ನು ಆಯ್ಕೆ ಮಾಡಿದ ನಂತರ ಮಾತನಾಡಿದ ಅವರು `ಸೆಪ್ಟೆಂಬರ್ 18ರಿಂದ ಅಕ್ಟೋಬರ್ 7ರವರೆಗೆ ಶ್ರೀಲಂಕಾದಲ್ಲಿಯೇ ಟ್ವೆಂಟಿ-20 ವಿಶ್ವಕಪ್ ಕ್ರಿಕೆಟ್ ನಡೆಯಲಿದೆ.



ಅದನ್ನು ಕೂಡ ಗಮನದಲ್ಲಿ ಇಟ್ಟುಕೊಂಡು ತಂಡವನ್ನು ರಚಿಸಲಾಗಿದೆ. ಅದರ ನಡುವೆ ನ್ಯೂಜಿಲೆಂಡ್ ವಿರುದ್ಧದ ಸರಣಿ ಇದೆ. ವರ್ಷದ ಕೊನೆಯಲ್ಲಿ ಇಂಗ್ಲೆಂಡ್ ಕೂಡ ಇಲ್ಲಿಗೆ ಬರಲಿದೆ. ಆದ್ದರಿಂದ ಸುದೀರ್ಘವಾದ ಕ್ರಿಕೆಟ್ ಕಾರ್ಯಕ್ರಮವಿದೆ. ಆದ್ದರಿಂದ ಲಂಕಾ ಸರಣಿಯೊಂದಿಗೆ ಯಶಸ್ಸಿನ ಓಟ ಆರಂಭವಾಗಬೇಕು~ ಎಂದು ಹೇಳಿದರು.



`ಕೋಚ್ ಡಂಕನ್ ಫ್ಲೆಚರ್ ಜೊತೆಗೆ ಆಯ್ಕೆಗಾರರು ಮುಕ್ತ ಮನಸ್ಸಿನಿಂದ ಚರ್ಚೆ ಮಾಡಿದ್ದಾರೆ. ಕಳೆದ ಟೂರ್ನಿಯಲ್ಲಿ ಆದ ಕೆಲವು ತಪ್ಪುಗಳನ್ನು ಕೂಡ ತಿದ್ದುವ ಪ್ರಯತ್ನ ಮಾಡಲಾಗಿದೆ~ ಎಂದರು ಶ್ರೀಕಾಂತ್.

 

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.