ವಿಜೃಂಭಣೆಯ ಚನ್ನಕೇಶವ ಸ್ವಾಮಿ ಜಾತ್ರೆ

7

ವಿಜೃಂಭಣೆಯ ಚನ್ನಕೇಶವ ಸ್ವಾಮಿ ಜಾತ್ರೆ

Published:
Updated:
ವಿಜೃಂಭಣೆಯ ಚನ್ನಕೇಶವ ಸ್ವಾಮಿ ಜಾತ್ರೆ

ನಾಯಕನಹಟ್ಟಿ: ಇಲ್ಲಿನ ಚನ್ನಕೇಶವ ಸ್ವಾಮಿ ಉತ್ಸವವು ಭಾನುವಾರ ಸಂಭ್ರಮ, ಸಡಗರದಿಂದ ಜರುಗಿತು.

ಶನಿವಾರ ರಾತ್ರಿಯಿಂದಲೇ ಗ್ರಾಮದಲ್ಲಿರುವ ಚನ್ನಕೇಶವಸ್ವಾಮಿ ದೇವಸ್ಥಾನ ಬಳಿ ಭೂತನ ಹಲಗೆಗಳಿಗೆ ಪೂಜೆ ಸಲ್ಲಿಸಿ ಬೆಳಗಿನ ಜಾವ ಎಡೆಯನ್ನು ಹಾಕಲಾಯಿತು. ಆ ಎಡೆಯನ್ನು ಕೈಗಳನ್ನು ಉಪಯೋಗಿಸದೆ ಬಾಯಿ ಹಚ್ಚಿ ಸೇವಿಸಿದರು.



ಭಾನುವಾರ ಮಧ್ಯಾಹ್ನ ಚನ್ನಕೇಶವ ಸ್ವಾಮಿಯನ್ನು ಪಲ್ಲಕಿಯಲ್ಲಿ ಕೂರಿಸಿ ಗ್ರಾಮದ ಅಬ್ಬೇನಹಳ್ಳಿ ರಸ್ತೆಯಲ್ಲಿರುವ ಮರಡಿ ಗುಡಿಯ ಬಳಿ ಸಕಲ ವಾದ್ಯಗಳೊಂದಿಗೆ ಕೊಂಡೊಯ್ಯಲಾಯಿತು. ಅಲ್ಲಿ ಕುರಿಗಳನ್ನು ದೇವರ ಗುಡಿ ಸುತ್ತ ಸುತ್ತಿಸಿ ಜಾನುವಾರುಗಳಿಗೆ ಯಾವುದೇ ತೆರನಾದ ಕಾಯಿಲೆಗಳು ಬರದಂತೆ ರಕ್ಷಿಸಿ ಎಂದು ಹರಕೆಗಳನ್ನು ಸಲ್ಲಿಸಿದರು.



ಮಹಿಳೆಯರು ಉಪವಾಸದೊಂದಿಗೆ ಬಾಯಿ ಬೀಗ ಹಾಕಿಕೊಂಡು ಆರತಿ ಹಿಡಿದು ಹರಕೆ ಸಲ್ಲಿಸುತ್ತಿದ್ದುದು ವಿಶೇಷವಾಗಿತ್ತು.  ತರುವಾಯ ನೆರೆದಿದ್ದ ಭಕ್ತರಿಗೆ ಅನ್ನ ಸಂತರ್ಪಣೆ ಏರ್ಪಡಿಸಲಾಯಿತು. ಸಂಜೆ ಉತ್ಸವಮೂರ್ತಿಯನ್ನು ಪಲ್ಲಕ್ಕಿಯಲ್ಲಿ ಪ್ರತಿಷ್ಠಾಪಿಸಿ ಡೊಳ್ಳು ಮತ್ತು ಜಾನಪದ ವಾದ್ಯಗಳೊಂದಿಗೆ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆಯೊಂದಿಗೆ ತಂದು ಗುಡಿ ತುಂಬಿಸಲಾಯಿತು.



ಉತ್ಸವಕ್ಕೆ  ಗೌಡ ಕುರುಬರು ಬುಡಕಟ್ಟಿಗೆ ಸೇರಿದ ನೆರೆಯ ಆಂಧ್ರದ ಕಲ್ಯಾಣದುರ್ಗ, ಅಮರಾಪುರ, ಪಾವಗಡದ ವೈ.ಎನ್.ಹೊಸಕೋಟೆ, ದಾವಣಗೆರೆ ಜಿಲ್ಲೆಯ ಹೊನ್ನಾಳಿ ಮತ್ತು ನಾಯಕನಹಟ್ಟಿ ಹೋಬಳಿಯ ನೇರಲಗುಂಟೆ ಮತ್ತಿತರ ಗ್ರಾಮಗಳಿಂದ ಭಕ್ತರು ಆಗಮಿಸಿದ್ದರು.



ಗಮನಸೆಳೆದ ಭೂತನ ಹಲಗೆ ನೃತ್ಯ: ಚನ್ನಕೇಶವ ಸ್ವಾಮಿ ಜಾತ್ರಾ ಮಹೋತ್ಸವದಲ್ಲಿ ಭೂತನ ಹಲಗೆ ನೃತ್ಯ ಎಲ್ಲರ ಗಮನಸೆಳೆಯಿತು. ದೇವರ ಪಲ್ಲಕ್ಕಿಯ ಮುಂಭಾಗದಲ್ಲಿ ಹರಕೆಹೊತ್ತವರು ಉಗ್ರನರಸಿಂಹ, ಕೆಂಚಪ್ಪ, ಕರಿಯಪ್ಪನ ಭೂತನ ಹಲಗೆಗಳನ್ನು ಹಿಡಿದು ನೃತ್ಯವನ್ನು ಮಾಡುತ್ತಾ ಮಣೇವು ಹಾಡುತ್ತಾ ಬೆಲ್ಲ,ಬಾಳೆಹಣ್ಣುಗಳನ್ನು ಸೇವಿಸಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry