ಸೋಮವಾರ, ಜೂನ್ 14, 2021
26 °C
ಪಾಕ್‌ ಕ್ರಿಕೆಟ್‌ ತಂಡದ ಪರ ಜಯಘೋಷ

ವಿದ್ಯಾರ್ಥಿಗಳ ವಿರುದ್ಧ ಪ್ರಕರಣ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಮೀರತ್‌/ಶ್ರೀನಗರ (ಪಿಟಿಐ): ಪಾಕಿಸ್ತಾನ ಕ್ರಿಕೆಟ್‌ ತಂಡದ ಪರ ವಿಜಯೋತ್ಸವ ಆಚರಿಸಿದ 60 ಕಾಶ್ಮೀರಿ ವಿದ್ಯಾರ್ಥಿಗಳ ವಿರುದ್ಧ ಉತ್ತರ ಪ್ರದೇಶದ ಪೊಲೀಸರು ರಾಷ್ಟ್ರದ್ರೋಹದ ಪ್ರಕರಣ ದಾಖಲಿಸಿ ನಂತರ ಕೈಬಿಟ್ಟಿದ್ದಾರೆ.



ಮೀರತ್‌ನಲ್ಲಿಯ ಸ್ವಾಮಿ ವಿವೇಕಾ­ನಂದ ಸುಭಾರ್ತಿ ವಿ.ವಿಯಲ್ಲಿ ಅಧ್ಯಯನ ಮಾಡುತ್ತಿರುವ ಕಾಶ್ಮೀರದ  ವಿದ್ಯಾರ್ಥಿ­ಗಳ ಪೈಕಿ 60 ಜನ ಈಚೆಗೆ ನಡೆದ ಏಷ್ಯಾ ಕಪ್‌ ಕ್ರಿಕೆಟ್‌ನಲ್ಲಿ ಭಾರತ ತಂಡವನ್ನು ಸೋಲಿಸಿದ ಪಾಕಿಸ್ತಾನ ತಂಡದ ಪರ ಘೋಷಣೆ ಕೂಗಿದ್ದು ಕಳೆದ ಭಾನುವಾರ ವಿಜಯೋತ್ಸವ ಆಚರಿಸಿದ್ದರು.



ವಿ.ವಿ. ಕುಲಪತಿ ಪಿ.ಕೆ. ಗರ್ಗ್ ನೀಡಿದ ದೂರಿನ ಅನ್ವಯ ಮೀರತ್‌ ಪೊಲೀಸರು  ಈ ವಿದ್ಯಾರ್ಥಿಗಳ ವಿರುದ್ಧ ರಾಷ್ಟ್ರ­ದ್ರೋಹದ ಪ್ರಕರಣ ದಾಖಲಿಸಿದ್ದಾರೆ. ಮೇಲಾಗಿ ಈ ಬಗ್ಗೆ ಮ್ಯಾಜಿಸ್ಟ್ರೇಟ್‌ ತನಿಖೆಗೂ ಆದೇಶ ನೀಡಲಾಗಿದೆ.



ಪ್ರಾಥ­ಮಿಕ ತನಿಖೆಯ ನಂತರ 60 ವಿದ್ಯಾರ್ಥಿ­ಗಳನ್ನು ಮೂರು ದಿನಗಳ­ವರೆಗೆ ತರಗತಿಗಳಿಂದ ಅಮಾನತು­ಮಾಡಲಾ­ಗಿದ್ದು, ವಸತಿಗೃಹ ಖಾಲಿ ಮಾಡಲು  ಸೂಚನೆ ನೀಡಲಾಗಿದೆ.



ಜಮ್ಮು –ಕಾಶ್ಮೀರದ ರಾಜಕೀಯ ಮುಖಂಡರು ಉತ್ತರ ಪ್ರದೇಶ ಪೊಲೀಸರ ಕ್ರಮದ ಬಗ್ಗೆ ಆಕ್ರೋಶ ವ್ಯಕ್ತಪ­ಡಿಸಿದ ನಂತರ ಎಚ್ಚೆತ್ತುಕೊಂಡ ಸರ್ಕಾರ ವಿದ್ಯಾರ್ಥಿಗಳ ವಿರುದ್ಧ ಹೂಡಿದ್ದ ದೇಶದ್ರೋಹ ಆರೋಪ ಕೈಬಿಟ್ಟಿದೆ.



ಒಮರ್‌ ಆಕ್ರೋಶ

ಉತ್ತರ ಪ್ರದೇಶ ಪೊಲೀಸರ ಕ್ರಮಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಜಮ್ಮು ಮತ್ತು ಕಾಶ್ಮೀರ ಮುಖ್ಯಮಂತ್ರಿ ಒಮರ್‌ ಅಬ್ದುಲ್ಲ, ಇಂತಹ ಕಠಿಣ ಶಿಕ್ಷೆ ವಿದ್ಯಾರ್ಥಿಗಳ ಭವಿಷ್ಯಕ್ಕೆ ಮಾರಕವಾಗಿದ್ದು, ಈ ವಿದ್ಯಾರ್ಥಿಗಳನ್ನು ತಪ್ಪು ದಾರಿಗೆ ಎಳೆಯಲಾಗಿದೆ ಎಂದಿದ್ದಾರೆ.

ವಿದ್ಯಾರ್ಥಿಗಳ ವಿರುದ್ಧದ  ಕ್ರಮ ಕೈಬಿಡಲು ಉತ್ತರ ಪ್ರದೇಶ ಮುಖ್ಯಮಂತ್ರಿ ಅಖಿಲೇಶ್‌ ಯಾದವ್‌ ಅವರನ್ನು ಒಮರ್‌ ಒತ್ತಾಯಿಸಿದ್ದಾರೆ.

ಕಾಶ್ಮೀರದ ವಿರೋಧ ಪಕ್ಷ ಪಿಡಿಪಿ ಸಹ ಉತ್ತರ ಪ್ರದೇಶ ಸರ್ಕಾರದ ಕ್ರಮವನ್ನು ಟೀಕಿಸಿದ್ದು, ವಿವಿ ಅಧಿಕಾರಿಗಳು ಈ ವಿಷಯದಲ್ಲಿ ಕ್ಷಮೆ ಕೋರಬೇಕು ಎಂದಿದೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.