ಗುರುವಾರ , ಮೇ 13, 2021
17 °C

ಸಿಮೆಂಟಿಗಾಗಿ ಶ್ರಮಿಸಿದ ಕಥೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ದಶಕಗಳ ಹಿಂದೆ ದೇಶದಲ್ಲಿ ಕೆಲವೇ ಸಿಮೆಂಟ್ ತಯಾರಿಕೆ ಕಂಪನಿಗಳು ಇದ್ದವು. ದಕ್ಷಿಣ ಭಾರತದಲ್ಲಿಯಂತೂ ಹೆಚ್ಚಿನವು ಆಂಧ್ರಪ್ರದೇಶದ ಅಮ್ಮಸಂದ್ರ ಸುತ್ತಮುತ್ತ ಕೇಂದ್ರೀಕೃತವಾಗಿದ್ದವು. ಸಿಮೆಂಟ್ ಮಾರಾಟದ ಮಳಿಗೆಗಳೂ ಕೇವಲ ದೊಡ್ಡ ನಗರಗಳಲ್ಲಿಯಷ್ಟೇ ಇರುತ್ತಿದ್ದವು.



ಗ್ರಾಮೀಣ ಭಾಗದಲ್ಲಿರಲು ಚಿಕ್ಕ ನಗರಗಳು, ಪಟ್ಟಣಗಳ ಜನರು ತಾರಸಿ ಮನೆ ಕಟ್ಟಿಕೊಳ್ಳುವುದೆಂದರೆ ಅದೊಂದು ದೊಡ್ಡ ಸಾಧನೆಯ ಮಾತು ಎನ್ನುವಂತಾಗಿತ್ತು. ಹಳ್ಳಿಗಾಡಿನಲ್ಲಿ ಗುಡಿಸಲು, ನಾಡ ಹೆಂಚಿನ ಇರುವಂತೆ ಪಟ್ಟಣ, ಚಿಕ್ಕ ನಗರಗಳಲ್ಲಿ ಹೆಚ್ಚೆಂದರೆ ಕೆಂಪು ಬಣ್ಣದ ಮಂಗಳೂರು ಹೆಂಚಿನ ಮನೆಗಳಷ್ಟೇ ಕಾಣಸಿಗುತ್ತಿದ್ದವು. ದೊಡ್ಡ ನಗರಗಳಲ್ಲಿಯಷ್ಟೇ ಸಿಮೆಂಟಿನಿಂದ ಬಳಸಿ ನಿರ್ಮಿಸಿದ ತಾರಸಿ ಮನೆಗಳನ್ನು ಕಾಣಬಹುದಾಗಿದ್ದಿತು.



1960-70ರ ದಶಕದ ಮಾತು. ಆಗ ದೇಶದ ಕೆಲವೇ ರಾಜ್ಯಗಳಲ್ಲಿ ಸಿಮೆಂಟ್ ಕಂಪನಿಗಳಿದ್ದವು. ಅವುಗಳ ಉತ್ಪಾದನಾ ಸಾಮರ್ಥ್ಯವೂ ಬಹಳ ಕಡಿಮೆ ಇದ್ದಿತು. ಹಾಗಾಗಿ ಸಿಮೆಂಟ್ ಎಂಬುದು ಈಗಿನಂತೆ ಎಲ್ಲರಿಗೂ, ಎಲ್ಲ ಕಾಲಕ್ಕೂ, ಎಷ್ಟು ಬೇಕೆಂದರೆ ಅಷ್ಟು ಪ್ರಮಾಣದಲ್ಲಿ ಸಿಗುವ ಸಾಮಗ್ರಿ ಆಗಿರಲಿಲ್ಲ. ಆಗ ಸಾಮಾನ್ಯರಿರಲಿ ಹಣವಂತರೂ ಮನೆ, ಬಂಗಲೆ ಕಟ್ಟುವುದು, ಅದಕ್ಕಾಗಿ ಸಿಮೆಂಟ್ ಸಂಗ್ರಹಿಸುವುದು ಬಹಳ ಕಷ್ಟದ ಮಾತಾಗಿತ್ತು ಎನ್ನುತ್ತಾರೆ ಆ ಕಾಲದಲ್ಲಿ ಬಹಳ ಕಷ್ಟಪಟ್ಟು ಮನೆ ಕಟ್ಟಿದ ಹಿರಿಯರು.



1960ರ ದಶಕ ನೆರೆಯ ಪಾಕಿಸ್ತಾನದೊಂದಿಗಿನ ಯುದ್ಧದ ಸಮಯ. ಪಾಕ್ ಗಡಿಯಲ್ಲಿ, ಯುದ್ಧ ಭೂಮಿಯನ್ನು ಸಂಪರ್ಕಿಸುವ ಭಾಗದಲ್ಲಿ ಶತ್ರು ಸೇನೆ ಸೇತುವೆಗಳನ್ನು ಗುರಿಯಿಟ್ಟು ಉಡಾಯಿಸುತ್ತಿತ್ತು. ಹಾಗಾಗಿ ಆ ಸಮಯದಲ್ಲಿ ಉತ್ಪಾದನೆಯಾದ ಹೆಚ್ಚಿನ ಸಿಮೆಂಟ್ ಯುದ್ಧಭೂಮಿಗೆ, ಅಲ್ಲಿ ಸೇತುವೆ, ಬ್ಯಾರಕ್ ನಿರ್ಮಾಣಕ್ಕೆ ರವಾನೆಯಾಗುತ್ತಿತ್ತು. ಹಾಗಾಗಿ ನಾಗರಿಕರಿಗೆ, ಅದರಲ್ಲೂ ಮನೆ ನಿರ್ಮಾಣಕ್ಕೆ ಸಿಮೆಂಟ್ ಪಡೆಯುವುದೆಂದರೆ ಏಳು ಕೆರೆ ನೀರು ಕುಡಿದಂತಹ ಅನುಭವ ಎನ್ನುವುದನ್ನೂ ಹಿರಿಯರು ಈಗಲೂ ನೆನಪಿಸಿಕೊಳ್ಳುತ್ತಾರೆ.



1970ರ ಸುಮಾರಿಗೆ ಮೈಸೂರಿನ ಜಯಲಕ್ಷಿ ಪುರಂನಲ್ಲಿ (ಆಗದು ನಗರದಿಂದ ಬಲು ದೂರದ-ಹೊರಲವಯದ ಪ್ರದೇಶ ಎಂದೇ ಗುರುತಿಸಿಕೊಂಡಿತ್ತು) ಮೂರು ಅಂತಸ್ತಿನ ಮನೆ ಕಟ್ಟಿದ ಕಷ್ಟದ ದಿನಗಳನ್ನು ಪಾಪಮ್ಮ(ಈಗ ಅವರಿಗೆ 75 ವರ್ಷ) ಅವರು ಈಗಲೂ ನೆನಪಿಸಿಕೊಂಡು ಕಣ್ಣಿಗೆ ಕಟ್ಟುವಂತೆ ಹೇಳುತ್ತಾರೆ.



`ಆಗ ಇಟ್ಟಿಗೆ, ಮರಳು ಬಹಳ ಸುಲಭವಾಗಿ ಸಿಗುತ್ತಿತ್ತು. ಗಾರೆಯವರು, ಮರಗೆಲಸದವರು, ವೈರಿಂಗ್ ಮಾಡುವವರ ಸಮಸ್ಯೆಯೂ ಇರಲಿಲ್ಲ. ಆದರೆ ಸಿಮೆಂಟ್ ತರುವುದು ಮಾತ್ರ ಬಹಳ ಕಷ್ಟದ್ದಾಗಿತ್ತು. ಸರ್ಕಾರವೂ ಸಿಮೆಂಟ್ ಮಾರಾಟಕ್ಕೆ ಸುಲಭವಾಗಿ ಲೈಸೆನ್ಸ್ ನೀಡುತ್ತಲೂ ಇರಲಿಲ್ಲ. ಸಿಮೆಂಟಿನ ಅಂಗಡಿಗಳು ಈಗಿನಂತೆ ಎಲ್ಲೆಂದರಲ್ಲಿ ಇರಲಿಲ್ಲ.

 

ನಾವು ಮನೆ ಕಟ್ಟುವಾಗ ಪಡಿತರ ವ್ಯವಸ್ಥೆಯಂತೆ ವಾರಕ್ಕೋ, ತಿಂಗಳಿಗೋ ಒಮ್ಮೆ ಸಿಮೆಂಟನ್ನು ಇಂತಿಷ್ಟೇ ಎಂದು ಲೆಕ್ಕಾಚಾರ ಹಾಕಿ ನೀಡುತ್ತಿದ್ದರು. ಮೊದಲು ಡಿ.ಸಿ ಕಚೇರಿಗೆ ಹೋಗಬೇಕಿತ್ತು. ಅ್ಲ್ಲಲಿ ಸಿಮೆಂಟ್‌ಗೆ ಕೂಪನ್ ವಿತರಿಸಲೇ ಬೇರೆ ವಿಭಾಗ. ಬೆಳಿಗ್ಗೆಯೇ ಅಲ್ಲಿ ಹೋಗಿ ದೊಡ್ಡ ಸಾಲಿನಲ್ಲಿ ಕಾಯುತ್ತಾ ನಿಲ್ಲಬೇಕಿತ್ತು. ಎಷ್ಟು ಲಾರಿ ಲೋಡು ಸಿಮೆಂಟ್ ಬಂದಿದೆ, ಎಷ್ಟು ಜನರಿಂದ ಬೇಡಿಕೆ ಇದೆ ನೋಡಿಕೊಂಡು ಕೂಪನ್ ವಿತರಿಸುತ್ತಿದ್ದರು.



ಕೂಪನ್ ಸಿಗುವಾಗ ಮಧ್ಯಾಹ್ನ, ಸಂಜೆಯಾದರೂ ಆಗುತ್ತಿತ್ತು. ಕೆಲವೊಮ್ಮೆ ಗಂಟೆಗಟ್ಟಲೆ ಕಾದುನಿಂತು ಬರಿಗೈಯಲ್ಲಿ ವಾಪಸಾಗಿದ್ದೂ ಇದೆ. ಯಜಮಾನರು ರೆವಿನ್ಯೂ ಡಿಪಾರ್ಟ್‌ಮೆಂಟ್‌ನಲ್ಲಿ ಕೆಲಸದಲ್ಲಿದ್ದರೂ ಶಿಫಾರಸು ಮಾಡಿ ಸಿಮೆಂಟ್ ಪಡೆಯಲು ಸಾಧ್ಯವಿರಲಿಲ್ಲ. ಅಷ್ಟು ಕಷ್ಟ ಇತ್ತು ಸಿಮೆಂಟ್ ಪಡೆಯುವುದು. ಅದಕ್ಕೇ ಹೆಚ್ಚಿನವರು ತಾರಸಿ ಮನೆ ಸಹವಾಸವೇ ಬೇಡ ಎಂದು ಮಂಗಳೂರು ಹೆಂಚಿನ ಮನೆ ಕಟ್ಟಿಕೊಳ್ಳುತ್ತಿದ್ದರು~ ಎನ್ನುತ್ತಾ ನಿಟ್ಟುಸಿರುಬಿಡುತ್ತಾರೆ ಪಾಪಮ್ಮ.    

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.