ಹಜಾರೆ ಬಂಧನ ಅವಿವೇಕಿ ಕ್ರಮ: ಅಮೆರಿಕ ಕಾಂಗ್ರೆಸ್ ವರದಿ

ಮಂಗಳವಾರ, ಮೇ 21, 2019
24 °C

ಹಜಾರೆ ಬಂಧನ ಅವಿವೇಕಿ ಕ್ರಮ: ಅಮೆರಿಕ ಕಾಂಗ್ರೆಸ್ ವರದಿ

Published:
Updated:

ವಾಷಿಂಗ್ಟನ್ (ಪಿಟಿಐ): ಅಣ್ಣಾ ಹಜಾರೆ ಅವರನ್ನು ಬಂಧಿಸುವ ಮೂಲಕ ಯುಪಿಎ ನೇತೃತ್ವದ ಕೇಂದ್ರ ಸರ್ಕಾರ ಅವಿವೇಕಿ ಹಾಗೂ ಪ್ರಜಾಸತ್ತೆ ವಿರೋಧಿಯಂತೆ ವರ್ತಿಸಿತು ಎಂದ ಅಮೆರಿಕ ಕಾಂಗ್ರೆಸ್ ನ ಸಂಶೋಧನಾ ಸೇವೆ (ಸಿಆರ್ಎಸ್) ವರದಿ ಅಭಿಪ್ರಾಯಪಟ್ಟಿದೆ.



~ಭಾರತ: ದೇಶೀಯ ವಿಷಯಗಳು, ಧೋರಣಾ ನೀತಿಗಳು ಮತ್ತು ಅಮೆರಿಕ ಬಾಂಧವ್ಯ~ ಕುರಿತ ತನ್ನ ವರದಿಯಲ್ಲಿ ಈ ಅಭಿಪ್ರಾಯ ನೀಡಿರುವ ವರದಿ ಭಾರತದ ಭ್ರಷ್ಟಾಚಾರ ವಿರೋಧಿ ಚಳವಳಿ ಬಗ್ಗೆ ವಿವರವಾದ ಮಾಹಿತಿ ನೀಡಿದೆ.



ಬೆಳಕಿಗೆ ಬಂದ ಹಲವಾರು ಹಗರಣಗಳು ಕಾಂಗ್ರೆಸ್ ನೇತೃತ್ವದ ಯುಪಿಎ ಸರ್ಕಾರದ ವರ್ಚಸ್ಸಿಗೆ ಕುಂದು ತಂದಿದ್ದು, 2014ರ ಚುನಾವಣೆಗೆ ವಿರೋಧಿ ಬಿಜೆಪಿಯ ಸ್ಥಿತಿ ಉತ್ತಮವಾಗಿರುತ್ತದೆ ಎಂದು ಹೇಳಿದೆ.



ಅಮೆರಿಕನ್ ಕಾಂಗ್ರೆಸ್ ನ ಸ್ವತಂತ್ರ ವಿಭಾಗವಾಗಿರುವ ಸಿಆರ್ ಎಸ್ ಅಮೆರಿಕದ ಶಾಸನಕರ್ತರ ಹಿತಾಸಕ್ತಿಗೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಕಾಲ ಕಾಲಕ್ಕೆ ಇಂತಹ ವರದಿಗಳನ್ನು ತಯಾರಿಸುತ್ತದೆ.



94 ಪುಟಗಳ ಈ ವರದಿಯನ್ನು ಅಮೆರಿಕನ್ ಶಾಸನ ಕರ್ತರು ಸೆಪ್ಟೆಂಬರ್ 1ರಂದು ಬಿಡುಗಡೆ ಮಾಡಿದ್ದು ಒಂದು ಪ್ರತಿಯನ್ನು ಅಮೆರಿಕ ವಿಜ್ಞಾನಿಗಳ ಒಕ್ಕೂಟ ಮಂಗಳವಾರ ಬಿಡುಗಡೆ ಮಾಡಿದೆ.



2011ರ ವಸಂತಕಾಲದ ವೇಳೆಗೆ ಉನ್ನತ ಮಟ್ಟದ ಭ್ರಷ್ಟಾಚಾರ ಪ್ರಕರಣಗಳು ಬಹಿರಂಗಗೊಂಡದ್ದರಿಂದ  ಹಬ್ಬಿದ ನಕಾರಾತ್ಮಕ ಭಾವನೆಗಳು ವ್ಯಾಪಕ ಸ್ವರೂಪ ತಾಳುವ ಸಂಭವ ಇದೆ. ಬಾಬಾ ರಾಮದೇವ್ ಮತ್ತು ಅಣ್ಣಾ ಹಜಾರೆ ಇಂತಹ ಬೆಳವಣಿಗೆಗೆ ನಾಂದಿ ಹಾಡಿದ್ದಾರೆ ಎಂದು ವರದಿ ಹೇಳಿದೆ.



ಜೂನ್ ಆರಂಭದಲ್ಲಿ ಯೋಗಗುರು ಬಾಬಾ ರಾಮದೇವ್ ಅವರು ಕಪ್ಪುಹಣವನ್ನು ಸ್ವದೇಶಕ್ಕೆ ತರಲು ಆಗ್ರಹಿಸಿ ನಡೆಸಿದ ಸಾಮೂಹಿಕ ನಿರಶನವನ್ನು ಪ್ರಸ್ತಾಪಿಸಿದ ವರದಿ ಆ ಸಂದರ್ಭದ ಪೊಲೀಸ್ ಬಲಪ್ರಯೋಗದ ಘಟನಾವಳಿಗಳನ್ನು ವಿವರವಾಗಿ ದಾಖಲಿಸಿದೆ.



ಶಾಂತ ಪ್ರತಿಭಟನಕಾರರ ಮೇಲೆ ಪೊಲೀಸರು ರಾತ್ರಿ ನಡೆಸಿದ ಬಲಪ್ರಯೋಗದ ಕಾರ್ಯಾಚರಣೆಯಲ್ಲಿ ಕನಿಷ್ಠ 30 ಮಂದಿ ಗಾಯಗೊಂಡಿದ್ದು, ಸರ್ಕಾರ ವ್ಯಾಪಕ ಟೀಕೆಗೆ ಗುರಿಯಾಯಿತು ಎಂಬುದನ್ನೂ ವರದಿ ಉಲ್ಲೇಖಿಸಿದೆ.



ರಾಮದೇವ್ ನೇತೃತ್ವದ ಪ್ರತಿಭಟನೆಗೂ ಎರಡು ತಿಂಗಳು ಮೊದಲು ಸಾಮಾಜಿಕ ಕಾರ್ಯಕರ್ತ ಅಣ್ಣಾ ಹಜಾರೆ ಅವರು ಭ್ರಷ್ಟಾಚಾರ ವಿರೋಧಿ ಜನಲೋಕಪಾಲ ಕಾನೂನು ಜಾರಿಗೆ ಆಗ್ರಹಿಸಿ ಆಮರಣ ನಿರಶನದ ಪ್ರತಿಜ್ಞೆಗೈದರು. ರಾಷ್ಟ್ರದಾದ್ಯಂತ ಲಕ್ಷಾಂತರ ಜನ ಹಜಾರೆ ಅವರನ್ನು ಬೆಂಬಲಿಸಿ ಪ್ರದರ್ಶನಗಳನ್ನು ನಡೆಸಿದರು. ವಾರದ ಬಳಿಕ ಕರಡು ಲೋಕಪಾಲ ಮಸೂದೆ ರೂಪಿಸಲು ಸಮಿತಿ ರಚಿಸುವ ಕೇಂದ್ರ ಸರ್ಕಾರದ ನಿರ್ಧಾರೊಂದಿಗೆ ಹಜಾರೆ ತಮ್ಮ ಚಳವಳಿ ಸ್ಥಗಿತಗೊಳಿಸಿದರು.



ಜನಾಭಿಪ್ರಾಯ ಸಂಗ್ರಹಗಳು ನಾಗರಿಕ ಸಮಿತಿ ರೂಪಿಸಿದ ಜನಲೋಕಪಾಲ ಮಸೂದೆ ಪರ ಶೇಕಡಾ 80-90ರಷ್ಟು ಜನ ಇದ್ದಾರೆ ಎಂಬುದನ್ನು ಬಹಿರಂಗ ಪಡಿಸಿದೆ ಎಂದೂ ಸಿಆರ್ಎಸ್ ವರದಿ ಹೇಳಿದೆ.



ಮುಂಬರುವ 2014ರ ಚುನಾವಣೆ ವೇಳೆಗೆ ರಾಹುಲ್ ಗಾಂಧಿ ಹಾಗೂ ನರೇಂದ್ರ ಮೋದಿ ಅವರ ಮಧ್ಯೆ ಚುನಾವಣಾ ಸಮರ ನಡೆಯುವ ಸಾಧ್ಯತೆ ಇದೆ ಎಂದೂ ಹೇಳಿರುವ ವರದಿ ಪರಿಣಾಮಕಾರಿ ಆಡಳಿತಕ್ಕೆ ಗುಜರಾತ್ ಅತ್ಯುತ್ತಮ ಉದಾಹರಣೆ ಎಂದೂ ಶ್ಲಾಘಿಸಿದೆ.

ಇರ್ತಾರಾ ಮೋದಿ? ಬರ್ತಾರಾ ರಾಹುಲ್?

ಲೋಕಸಭೆ ಫಲಿತಾಂಶಕ್ಕಾಗಿ ವಿಶ್ವವೇ ಬೆರಗುಗಣ್ಣಿನಿಂದ ಕಾಯುತ್ತಿದೆ. ನರೇಂದ್ರ ಮೋದಿ ಗೆಲ್ತಾರಾ? ರಾಹುಲ್‌ ಗಾಂಧಿ ಬರ್ತಾರಾ? ರಾಜಕಾರಣದ ಕ್ಷಣಕ್ಷಣದ ಮಾಹಿತಿ, ತಾಜಾ ಅಪ್‌ಡೇಟ್‌ಗಳಿಗಾಗಿ www.prajavani.net/prajamatha ನೋಡಿ.

ಫೇಸ್‌ಬುಕ್‌ನಲ್ಲಿ ನಮ್ಮನ್ನು ಲೈಕ್ ಮಾಡಿ ಅಥವಾ ಟ್ವಿಟರ್, ಯೂಟ್ಯೂಬ್, ಇನ್‌ಸ್ಟಾಗ್ರಾಂನಲ್ಲಿ ಫಾಲೊ ಮಾಡಿ.

ತ್ವರಿತ ಸುದ್ದಿ, ನಿಖರ ವಿಶ್ಲೇಷಣೆಗೆ www.prajavani.net ಓದಿ. 'ಪ್ರಜಾವಾಣಿ' ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry