ಬುಧವಾರ, ಏಪ್ರಿಲ್ 14, 2021
28 °C

ಹಣದುಬ್ಬರ ಹೆಚ್ಚಳ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ನವದೆಹಲಿ (ಪಿಟಿಐ): ಸೆಪ್ಟೆಂಬರ್ ತಿಂಗಳಲ್ಲಿ ವಾರ್ಷಿಕ ಹಣದುಬ್ಬರ ದರವು ಶೇ 9.72ರಷ್ಟು ಏರಿಕೆಯಾಗಿರುವುದರಿಂದ ಈ ತಿಂಗಳಾಂತ್ಯಕ್ಕೆ ಭಾರತೀಯ ರಿಸರ್ವ್ ಬ್ಯಾಂಕ್ ಮತ್ತೆ ಅಲ್ಪಾವಧಿ ಬಡ್ಡಿ ದರಗಳನ್ನು ಏರಿಸುವ ಸಾಧ್ಯತೆಗಳು ಹೆಚ್ಚಿವೆ.



ಆಹಾರ, ಸಿದ್ಧ ಸರಕು ಸೇರಿದಂತೆ ಒಟ್ಟಾರೆ ಎಲ್ಲ ಬಗೆಯ ಸರಕುಗಳ ಬೆಲೆಗಳು ಗಮನಾರ್ಹ ಏರಿಕೆ ದಾಖಲಿಸಿವೆ. ಸಗಟು ಬೆಲೆ ಸೂಚ್ಯಂಕ ಆಧರಿಸಿ ಅಳೆಯಲಾಗುವ ಹಣದುಬ್ಬರವು ಆಗಸ್ಟ್ ತಿಂಗಳಲ್ಲಿ ಶೇ 9.78ರಷ್ಟಿತ್ತು. ಸತತ 10ನೇ ತಿಂಗಳೂ ಹಣದುಬ್ಬರವು ಶೇ 9ಕ್ಕಿಂತ ಹೆಚ್ಚಿನ ಮಟ್ಟದಲ್ಲಿಯೇ ಇದೆ.



`ವಿಶ್ವದ ಯಾವುದೇ ಭಾಗದಲ್ಲಿ ಹಣದುಬ್ಬರ ಏರಿಕೆಯಾಗುತ್ತಿದ್ದರೆ ಸಾಲಗಳ ಮೇಲಿನ ಬಡ್ಡಿ ದರಗಳೂ ಏರುತ್ತಲೇ ಇರುತ್ತವೆ. ಹಣದುಬ್ಬರಕ್ಕೆ   ಕಡಿವಾಣ ವಿಧಿಸಲು ಕಠಿಣ ಹಣಕಾಸಿನ ನೀತಿ ಹೊರತುಪಡಿಸಿದರೆ ನಮ್ಮ ಹತ್ತಿರ ಬೇರೆ ಯಾವುದೇ ಕ್ರಮಗಳು ಇಲ್ಲ~ ಎಂದು `ಆರ್‌ಬಿಐ~ ಡೆಪ್ಯುಟಿ ಗವರ್ನರ್ ಕೆ. ಸಿ. ಚಕ್ರವರ್ತಿ ಅಭಿಪ್ರಾಯಪಟ್ಟಿದ್ದಾರೆ.



ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಸೆಪ್ಟೆಂಬರ್ ತಿಂಗಳಲ್ಲಿ ಆಹಾರ ಪದಾರ್ಥಗಳು ಶೇ 9, ಈರುಳ್ಳಿ ಶೇ 23, ಹಣ್ಣು ಶೇ 16 ಮತ್ತು ಆಲೂಗಡ್ಡೆ ಶೇ 15ರಷ್ಟು ತುಟ್ಟಿಯಾಗಿವೆ. ಸಗಟು ಬೆಲೆ ಸೂಚ್ಯಂಕದಲ್ಲಿ ಶೇ 65ರಷ್ಟು ಪಾಲು ಹೊಂದಿರುವ ತಯಾರಿಕಾ ಸರಕುಗಳ ಬೆಲೆಗಳು ಶೇ 8ರಷ್ಟು ಏರಿಕೆಯಾಗಿವೆ.`ವಾರ್ಷಿಕ ಹಣದುಬ್ಬರವು ಶೇ 9.72ರಷ್ಟು ದಾಖಲಾಗಿರುವುದು ಹಿತಕರ ಮಟವಂತೂ ಅಲ್ಲವೇ ಅಲ್ಲ. ಸದ್ಯಕ್ಕೆ ಇದು ಕಡಿಮೆಯಾಗುವ ಲಕ್ಷಣಗಳೂ ಕಂಡು ಬರುತ್ತಿಲ್ಲ~ ಎಂದು ಪ್ರಧಾನಿ ಆರ್ಥಿಕ ಸಲಹಾ ಸಮಿತಿ ಅಧ್ಯಕ್ಷ ಸಿ. ರಂಗರಾಜನ್ ಅಭಿಪ್ರಾಯಪಟ್ಟಿದ್ದಾರೆ.



2010ರ ಮಾರ್ಚ್ ತಿಂಗಳಿನಿಂದೀಚೆಗೆ `ಆರ್‌ಬಿಐ~ ಶೇ 3.50ರಷ್ಟು ಬಡ್ಡಿ ದರ ಹೆಚ್ಚಿಸಿದೆ. ಈ ತಿಂಗಳ 25ರಂದು ಹಣಕಾಸು ನೀತಿಯ ಪರಾಮರ್ಶೆ ಮಾಡುವಾಗ ಇನ್ನಷ್ಟು ಬಡ್ಡಿ ದರ ಹೆಚ್ಚಿಸುವ ಸಾಧ್ಯತೆಗಳು ಇವೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.