‘ಖಾತರಿ ಯೋಜನೆ: ಹೊಸ ಕಾಮಗಾರಿ ಸೇರ್ಪಡೆ’

7

‘ಖಾತರಿ ಯೋಜನೆ: ಹೊಸ ಕಾಮಗಾರಿ ಸೇರ್ಪಡೆ’

Published:
Updated:

ಯಾದಗಿರಿ: ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯಡಿ 5 ಹೊಸ ಕಾಮಗಾರಿಗಳನ್ನು ಸೇರ್ಪಡೆಗೊಳಿಸಿ ಸರ್ಕಾರ ಆದೇಶ ಹೊರಡಿಸಿದೆ ಎಂದು ಜಿಲ್ಲಾ ಪಂಚಾಯಿತಿ ಮುಖ್ಯ ಕಾರ್ಯ ನಿರ್ವಾಹಕ ಅಧಿಕಾರಿ ಎಸ್.ಎ. ಜಿಲಾನಿ ತಿಳಿಸಿದರು.



ಜಿಲ್ಲಾ ಪಂಚಾಯಿತಿ ಕಾರ್ಯಾಲಯ­ದಲ್ಲಿ ಸೋಮವಾರ ಪತ್ರಿಕಾಗೋಷ್ಠಿ­ಯಲ್ಲಿ ಈ ವಿಷಯ ತಿಳಿಸಿದ ಅವರು, ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯಡಿ ಈಗಾಗಲೇ 16 ಕಾಮಗಾರಿಗಳಿದ್ದು, ಈಗ ಹೆಚ್ಚುವರಿ­ಯಾಗಿ 5 ಕಾಮಗಾರಿಗಳಾದ ಭೂ ಸಮತಟ್ಟು ಮಾಡುವುದು,

ಜಮೀನಿ­ನಲ್ಲಿ ಕೃಷಿ ಹೊಂಡ ನಿರ್ಮಿಸಿ­ಕೊಳ್ಳು­ವುದು, ನಮ್ಮ ಹೊಲ ನಮ್ಮ ದಾರಿ, ರಾಶಿ ಕಣಗಳ ನಿರ್ಮಾಣ, ಹಾಗೂ ತೋಟ­ಗಾರಿಕೆ ಗಿಡ ನೆಡುವ ಕಾಮಗಾರಿಗಳನ್ನು ಅಳವಡಿಸಲಾಗಿದೆ ಎಂದರು.



ಜಿಲ್ಲೆಯ 1,56,180 ಸಣ್ಣ ಮತ್ತು ಅತಿಸಣ್ಣ ರೈತರು ಹಾಗೂ 73,000 ಮಧ್ಯಮ ವರ್ಗದ ರೈತರು, ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಜನಾಂಗದ ಅರ್ಹ ವೈಯಕ್ತಿಕ ಫಲಾನುಭವಿಗಳು ಸೇರಿದಂತೆ ಒಟ್ಟು 2.23 ಲಕ್ಷ  ಫಲಾ­ನುಭವಿಗಳು ಈ ಯೋಜನೆಯ ಲಾಭ ಪಡೆಯಲಿದ್ದಾರೆ ಎಂದರು.

ಸೆ. 26 ರಿಂದ 29ರವರೆಗೆ ಜಿಲ್ಲೆಯ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿ­ಕಾರಿಗಳು, ಕಾರ್ಯದರ್ಶಿಗಳು, ಜಿಲ್ಲಾ ಹಾಗೂ ತಾಲ್ಲೂಕು ಮಟ್ಟದ ಯೋಜನೆ ಅನುಷ್ಠಾನಾಧಿಕಾರಿಗಳು ಮತ್ತು ನೋಡಲ್ ಅಧಿಕಾರಿಗಳು, ಹೊಸ ಕಾಮಗಾರಿಗಳ ಸೇರ್ಪಡೆಯ ಕುರಿತು ಡಂಗುರದ ಮೂಲಕ ಆಯಾ ಗ್ರಾಮ­ಗಳಲ್ಲಿ  ಅರಿವು ಮೂಡಿಸಲು ಸೂಚಿಸ­ಲಾಗಿದೆ. ವಿಶೇಷ ಗ್ರಾಮಸಭೆ­ಗಳಲ್ಲಿ ವೈಯಕ್ತಿಕ ಫಲಾನುಭವಿಗಳನ್ನು ಆಯ್ಕೆ ಮಾಡಿ ಈ ಯೋಜನೆ ಅಡಿಯಲ್ಲಿ ಕಾಮಗಾರಿ-ಗಳನ್ನು ಹಂಚಿಕೆ ಮಾಡಲು ಸೂಚಿಸ­ಲಾಗಿದೆ ಎಂದು ತಿಳಿಸಿದರು.



ಜಿಲ್ಲಾಮಟ್ಟದ ಅಧಿಕಾರಿಗಳನ್ನು ತಾಲ್ಲೂಕು ನೋಡಲ್ ಅಧಿಕಾರಿ­ಗಳ­ನ್ನಾಗಿ ಹಾಗೂ ತಾಲ್ಲೂಕು ಮಟ್ಟದ ಅಧಿಕಾರಿಗಳನ್ನು ಗ್ರಾಮ ಪಂಚಾಯಿತಿ ಮಟ್ಟದ ನೋಡಲ್ ಅಧಿಕಾರಿಗಳನ್ನಾಗಿ ನೇಮಕ ಮಾಡಲಾಗಿದ್ದು, ಈ ಯೋಜ­ನೆ­­ಗಳ ಮೇಲ್ವಿಚಾರಣೆ ಮಾಡ­ಲು ಆದೇಶ ನೀಡಲಾಗಿದೆ. ಈ ಎಲ್ಲಾ ಅಧಿಕಾರಿಗಳು ಪ್ರತಿ ಶನಿವಾರ ಪ್ರಗತಿ ವರದಿ ನೀಡುವಂತೆ ಸೂಚಿಸ­ಲಾಗಿದೆ ಎಂದು ಹೇಳಿದರು.



ಪ್ರತಿ ಗ್ರಾಮ ಪಂಚಾಯಿತಿ ವ್ಯಾಪ್ತಿ­ಯಲ್ಲಿ ಕೆರೆಗಳ ಪುನಶ್ಚೇತನಕ್ಕಾಗಿ ರೂ. 10 ಲಕ್ಷ, ಕೋಳಿ ಸಾಕಾಣಿಕೆ ಕೊಟ್ಟಿಗೆ ನಿರ್ಮಾಣಕ್ಕಾಗಿ ರೂ. 35 ಸಾವಿರ, ಹಾಗೂ ಪಶುಗಳ ಕೊಟ್ಟಿಗೆ ನಿರ್ಮಾ­ಣ­ಕ್ಕಾಗಿ ರೂ. 48 ಸಾವಿರ ಅನುದಾನ ಒದಗಿಸುವ ಯೋಜನೆಗಳು ಲಭ್ಯವಿದ್ದು, ಅರ್ಹ ಫಲಾನುಭವಿ­ಗಳ ಮನೆ ಬಾಗಿ­ಲಿಗೆ ಯೋಜನೆ ತರುವ ಕಾರ್ಯ ಸರ್ಕಾರ ಮಾಡಿದೆ. ಫಲಾನು­ಭವಿಗಳು ಇವುಗಳ ಲಾಭ ಪಡೆಯಬೇಕು ಎಂದು ತಿಳಿಸಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry