‘ಲೈಂಗಿಕ ಅಲ್ಪಸಂಖ್ಯಾತರಿಗೆ ₨ 1,000 ಪಿಂಚಣಿ’

ಬೆಂಗಳೂರು: ‘ಲೈಂಗಿಕ ಅಲ್ಪಸಂಖ್ಯಾತರಿಗೆ  ಮೈತ್ರಿ ಯೋಜನೆ ಅಡಿಯಲ್ಲಿ ಮಂಜೂರಾಗಿರುವ ₨ 500 ಅನ್ನು ₨ 1,000 ಕ್ಕೆ ಹೆಚ್ಚಿಸುವ ಕುರಿತು  ಮುಖ್ಯಮಂತ್ರಿಯವರೊಂದಿಗೆ ಚರ್ಚಿಸಿದ ನಂತರ ನಿರ್ಧರಿಸ­ಲಾಗುವುದು’ ಎಂದು ಕಂದಾಯ ಸಚಿವ ವಿ.ಶ್ರೀನಿವಾಸ್‌ ಪ್ರಸಾದ್‌ ಹೇಳಿದರು.



ಬೆಂಗಳೂರು ನಗರ ಜಿಲ್ಲೆ ಹಾಗೂ  ಗ್ರಾಮಾಂತರ ಜಿಲ್ಲೆ ಸಂಯುಕ್ತ ಆಶ್ರಯದಲ್ಲಿ ರವೀಂದ್ರ ಕಲಾಕ್ಷೇತ್ರದಲ್ಲಿ ಶುಕ್ರವಾರ ಆಯೋಜಿಸಿದ್ದ ಲೈಂಗಿಕ ಅಲ್ಪಸಂಖ್ಯಾತರಿಗೆ ‘ಮೈತ್ರಿ’ ಪಿಂಚಣಿ ಆಂದೋಲನ ಉದ್ಘಾಟನಾ ಸಮಾ­ರಂಭದಲ್ಲಿ ಅವರು ಮಾತನಾಡಿದರು.



‘ಲೈಂಗಿಕ ಅಲ್ಪಸಂಖ್ಯಾತರಿಗೆ ಆರ್ಥಿಕ ಸಹಾಯ­ವನ್ನು ಒದಗಿಸಿ, ಸಮಾಜದ ಮುಖ್ಯ ವಾಹಿನಿಗೆ ತರಲು ಸರ್ಕಾರವು ಮೈತ್ರಿ ಯೋಜನೆಯನ್ನು ಜಾರಿಗೆ ತಂದಿದೆ’ ಎಂದರು. ‘ಈ ಯೋಜನೆಯು ಮಧ್ಯವರ್ತಿಗಳ ಪಾಲಾಗ­ಬಾರದೆಂದು 30 ಜಿಲ್ಲೆಗಳಲ್ಲಿ ಪಿಂಚಣಿ ಅದಾಲತ್‌ ಅನ್ನು ಆರಂಭಿಸ­ಲಾಗಿದೆ. ಇದುವರೆಗೂ 30 ಜಿಲ್ಲೆಗಳಲ್ಲಿ 1,395 ಪಿಂಚಣಿ ಅದಾಲತ್‌ಗಳು ನಡೆದಿವೆ’ ಎಂದು ಹೇಳಿದರು.



‘ಇಡೀ ರಾಜ್ಯದ ಲೈಂಗಿಕ ಅಲ್ಪ­ಸಂಖ್ಯಾತರಿಂದ ಪಿಂಚಣಿಗಾಗಿ 1,27,633 ಅರ್ಜಿಗಳು ಬಂದಿದ್ದು, ಅವುಗಳಲ್ಲಿ 1,23,507 ವಿಲೇವಾರಿ­ಯಾಗಿವೆ. ಇನ್ನು 4,126 ಅರ್ಜಿಗಳು ಬಾಕಿಯಿವೆ’ ಎಂದು ವಿವರಿಸಿದರು. ‘ಮನಸ್ವಿ ಯೋಜನೆಯಲ್ಲಿ ಅವಿ­ವಾಹಿತರಿಗೆ, ಪತಿ ಪರಿತ್ಯಕ್ತ ಮಹಿಳೆ­ಯರಿಗೆ ನೀಡುವ ಪಿಂಚಣಿ ಯೋಜ­ನೆ­ಯಲ್ಲಿ ಅವಿವಾಹಿತರಿಂದ 15,668 ಅರ್ಜಿಗಳು ಬಂದಿದ್ದು, ಪತಿ ಪರಿತ್ಯಕ್ತ ಮಹಿಳೆಯರಿಂದ 7,160 ಅರ್ಜಿಗಳು ಬಂದಿವೆ’ ಎಂದು ಮಾಹಿತಿ ನೀಡಿದರು.



‘ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ವರ್ಗದ ಲೈಂಗಿಕ ಅಲ್ಪಸಂಖ್ಯಾತರಿಗೆ ತರಬೇತಿ ನೀಡಿ ಉದ್ಯೋಗ ಕಲ್ಪಿಸಲಾಗುವುದು. ವಿವಿಧ ಇಲಾಖೆ­ಗಳಲ್ಲಿ ಖಾಲಿಯಿರುವ ಹುದ್ದೆಗಳಿಗೆ ವಿದ್ಯಾಭ್ಯಾಸವನ್ನು ಆಧರಿಸಿ ಹೊರ­ಗುತ್ತಿಗೆಯಲ್ಲಿ ಉದ್ಯೋಗ ನೀಡಲಾಗು­ವುದು’ ಎಂದು ಭರವಸೆ ನೀಡಿದರು.



ಸಮಾಜ ಕಲ್ಯಾಣ ಸಚಿವ ಎಚ್‌.­ಆಂಜನೇಯ ಮಾತನಾಡಿ, ‘ಲೈಂಗಿಕ ಅಲ್ಪ-­­ಸಂಖ್ಯಾತರಿಗೆ ಸಾಮಾಜಿಕವಾಗಿ ಭದ್ರತೆ­ಯನ್ನು ಒದಗಿಸಲು ಸರ್ಕಾರ ಯೋಜನೆ­ಗಳನ್ನು ರೂಪಿಸಿದೆ. ಅವುಗಳ ಲಾಭ ಪಡೆಯಬೇಕು. ಲೈಂಗಿಕ ಅಲ್ಪಸಂಖ್ಯಾತರು ಭಿಕ್ಷಾಟನೆ ಅಥವಾ ಪೀಡಿಸುವಂತಹ ಕಾರ್ಯಗಳನ್ನು ಬಿಟ್ಟು ಸ್ವಾಭಿಮಾನ­ದಿಂದ ಬದುಕು ನಡೆಸಬೇಕು’ ಎಂದರು.



ಸಂಗಮ, ಲೈಂಗಿಕ ಅಲ್ಪಸಂಖ್ಯಾತರ ವೇದಿಕೆಯ ಸದಸ್ಯರಿಂದ ಆಕ್ರೋಶ: ಮೈತ್ರಿ ಯೋಜನೆ ಅಡಿಯಲ್ಲಿ ಸರ್ಕಾರ ನೀಡುತ್ತಿರುವ ಪಿಂಚಣಿ  ₨ 500 ಯಾವುದಕ್ಕೂ ಸಾಲುವುದಿಲ್ಲ. ₨ 5,000 ಪಿಂಚಣಿಯನ್ನು  ನೀಡ­ಬೇಕೆಂಬುದು ನಮ್ಮ ಬೇಡಿಕೆಯಾಗಿತ್ತು ಎಂದು ಸಂಗಮ ಮತ್ತು ಲೈಂಗಿಕ ಅಲ್ಪಸಂಖ್ಯಾತರ ವೇದಿಕೆಯ ಸದಸ್ಯರು ಕಾರ್ಯಕ್ರಮದ ನಂತರ ಆಕ್ರೋಶ ವ್ಯಕ್ತಪಡಿಸಿದರು.



‘ಪಿಂಚಣಿಯನ್ನು 18 ರಿಂದ 64 ವರ್ಷದೊಳಗಿನವರಿಗೆ ನೀಡಲಾಗುತ್ತದೆ ಎಂದು ಜಿಲ್ಲಾಧಿಕಾರಿ ಕರಪತ್ರಗಳಲ್ಲಿ ತಿಳಿಸಿದ್ದಾರೆ. ಆದರೆ, ಇಲ್ಲಿ 40 ವರ್ಷದವರಿಗಿಂತ ಹೆಚ್ಚಿನವರಿಗೆ ಪಿಂಚಣಿ ಎಂದು ಹೇಳಲಾಗುತ್ತಿದೆ. ಸರ್ಕಾರ ಮತ್ತು ಅಧಿಕಾರಿಗಳು ನಮಗೆ ಅನ್ಯಾಯ ಮಾಡುತ್ತಿದ್ದಾರೆ’ ಎಂದು ಲೈಂಗಿಕ ಅಲ್ಪಸಂಖ್ಯಾತೆ ಕಿರಣ್‌ ಹೇಳಿದರು. ಸಚಿವ ಆಂಜನೇಯ ಅವರ ಮಾತಿಗೂ ತೀವ್ರತರವಾದ ಆಕ್ರೋಶ ವ್ಯಕ್ತವಾಯಿತು.