‘ಸೋಲು ಗೌರವಿಸದವನು ವಿಜ್ಞಾನಿ ಆಗಲಾರ’

ಬೆಂಗಳೂರು: ‘ವಿಜ್ಞಾನದ ಜತೆ ನಿರಂತ­ರ­ವಾಗಿ ಸ್ನೇಹವನ್ನು ಇರಿಸಿಕೊಳ್ಳ­ಬೇಕಾ­ದರೆ, ಸಮಯದ ಜತೆ ಸದಾ ಗುದ್ದಾಡ­ಬೇಕು’ ಎಂದು ಹಿರಿಯ ವಿಜ್ಞಾನಿ ಪ್ರೊ. ಸಿ.ಎನ್‌.­ಆರ್‌. ರಾವ್‌ ಅಭಿಪ್ರಾಯಪಟ್ಟರು.



ಭಾರತೀಯ ವಿದ್ಯಾಭವನವು ನಗರ­ದಲ್ಲಿ ಶುಕ್ರವಾರ ಆಯೋಜಿಸಿದ್ದ ಡಾ.ಕೆ.­ಎಂ.­ಮುನ್ಷಿ ಸ್ಮರಣಾರ್ಥ ಉಪ­ನ್ಯಾಸ ಕಾರ್ಯಕ್ರಮದಲ್ಲಿ  ‘ಭಾರತ­ದಲ್ಲಿ ವಿಜ್ಞಾನ ಕಾರ್ಯಾ­ಚರಣೆ’ ಕುರಿತು ಮಾತನಾಡಿದರು.



‘ವಿಜ್ಞಾನವೆಂಬುದು ಸಂಸ್ಕೃತಿಯಲ್ಲಿ ಬೆರೆತು ಹೋಗಿದೆ. ವಿಶ್ವವಿದ್ಯಾಲಯ, ಪಂಡಿ­ತರು, ವಿದ್ಯಾರ್ಥಿವೇತನ, ವಿಚಾರ­ಸಂಕಿರಣ ಇವುಗಳು ಇಲ್ಲದೆಯೂ ವಿಜ್ಞಾನ ಇರುತ್ತದೆ. ಸೋಲನ್ನು ಗೌರವಿ­ಸ­ದ­ವರು ವಿಜ್ಞಾನಿಗಳಾಗಲು ಸಾಧ್ಯವೇ ಇಲ್ಲ’ ಎಂದು ಹೇಳಿದರು.



ಪುರುಷಾಧಿಪತ್ಯ: ‘ಹೆಣ್ಣಿನ  ಬೌದ್ಧಿಕ ಬೆಳ­ವಣಿ­ಗೆಯನ್ನು ಒಪ್ಪಿಕೊಳ್ಳುವಷ್ಟು ಪೂರಕ ವಾತಾವರಣ ಭಾರತದಲ್ಲಿ ಇಲ್ಲ. ಹೀಗಾಗಿ ಮಹಿಳಾ ವಿಜ್ಞಾನಿಗಳ ಸಂಖ್ಯೆ ಬೆರಳೆಣಿಕೆಯಷ್ಟಿದೆ.



ಮದುವೆ, ಕೌಟುಂ­ಬಿಕ ವ್ಯವಹಾರ­ಗಳಲ್ಲಿಯೇ ಕಳೆದು­ಹೋಗುವ  ಸಂಶೋ­ಧನಾ ವಿದ್ಯಾ­ರ್ಥಿ­ನಿಯರಿದ್ದಾರೆ. ಸರ್ಕಾರ ಸೂಕ್ತ ನೆರವು ನೀಡುತ್ತಿದ್ದರೂ,  ಮಹಿಳಾ ವಿಜ್ಞಾನಿಗಳು ಬೆಳೆಯಲು ಪುರುಷ ಪ್ರಧಾನ ವ್ಯವಸ್ಥೆ ಬಿಡುತ್ತಿಲ್ಲ’ ಎಂದು ಬೇಸರ ವ್ಯಕ್ತಪಡಿಸಿದರು.



‘ವಿಜ್ಞಾನ ಹಾಗೂ ಸಂಗೀತ ಕ್ಷೇತ್ರ­ಗಳಲ್ಲಿ ಸಾಮ್ಯತೆ ಇದೆ.  ಈ ಎರಡು ಕ್ಷೇತ್ರ­­ಗಳಲ್ಲಿ ಪರಿಪೂರ್ಣರಾಗುವುದು ಸಾಧ್ಯ­­ವ­ಲ್ಲದ ಮಾತು. ಆದರೆ, ನಿರಂತ­ರ­ವಾಗಿ ಶ್ರಮವಹಿಸಿ, ಪ್ರೀತಿಯಿಂದ ವಿಜ್ಞಾ­ನ­­ವನ್ನು ಅಪ್ಪಿಕೊಂಡರೆ ಎಂದಿಗೂ ಆ ಕ್ಷೇತ್ರ  ಕೈಬಿಡದು’ ಎಂದು ಹೇಳಿದರು.



‘ಮುಂದಿನ ದಶಕವನ್ನು ಗುಣ­ಮ­ಟ್ಟದ ಶಿಕ್ಷಣ ಹಾಗೂ ಶಿಕ್ಷಕ­ರನ್ನು ರೂಪಿಸುವುದಕ್ಕೆ ಮೀಸಲಿಡಬೇಕು. ದೇಶದ ನಿವ್ವಳ ಆಂತರಿಕ ಉತ್ಪನ್ನದಲ್ಲಿ  ಶೇ 2ರಷ್ಟು ಹಣವನ್ನು ಉನ್ನತ ಶಿಕ್ಷಣ­ಕ್ಕಾಗಿ ವಿನಿಯೋಗಿಸಬೇಕು.



ಎಲ್ಲೂ ಸಲ್ಲ­ದ­ವ­ರು ಶಿಕ್ಷಕರಾಗುತ್ತಿ­ದ್ದಾರೆ. ಇದನ್ನು ತಪ್ಪಿಸಲು ಫಿನ್‌ಲ್ಯಾಂಡ್‌ ಮಾದರಿ­ಯಲ್ಲಿ ಉತ್ತಮ ಗುಣಮಟ್ಟದ ಶಿಕ್ಷಕ­ರನ್ನು ರೂಪಿಸುವ ಅಗತ್ಯವಿದೆ’ ಎಂದು ಅಭಿಪ್ರಾಯಪಟ್ಟರು."



ಸಂಶೋಧನಾ ವಿದ್ಯಾರ್ಥಿಗಳೇ ಇಲ್ಲ: ‘ನನ್ನ ಬೆಂಗಳೂರು ಹಣ ಮಾಡುವ ದಂಧೆಯ ಸ್ಥಳವಾಗಿ ಮಾರ್ಪಾಡಾಗಿರು­ವು­ದನ್ನು ನೆನೆದರೆ ನೋವಾಗುತ್ತದೆ. ಕಳೆದ 20 ವರ್ಷಗಳಿಂದೀಚೆಗೆ ಬೆಂಗ­ಳೂರಿ­­ನಿಂದ ಒಬ್ಬರೇ ಒಬ್ಬರು ಸಂಶೋ­ಧನಾ ವಿದ್ಯಾರ್ಥಿಗಳಿಲ್ಲ. ಎಲ್ಲ­ರಿಗೂ ಹಣ ಮಾಡುವ ಧಾವಂತ. ಹಾಗಾಗಿ ವಿಜ್ಞಾನ, ಸಂಶೋಧನೆ­ಯೆಂ­ದರೆ ಅಲಕ್ಷ್ಯ’ ಎಂದು ನೊಂದು ನುಡಿದರು.



‘ಆರ್ಥಿಕ ಕ್ಷೇತ್ರದ ಬೆಳವಣಿಗೆಯಷ್ಟೆ ಅಭಿವೃದ್ಧಿಯಲ್ಲ. ವಿಜ್ಞಾನ ಕ್ಷೇತ್ರದಲ್ಲಿನ ಪ್ರಗತಿಯಿಂದ ಮಾತ್ರ ‘ಅಭಿವೃದ್ಧಿ’ಯ ಮಂತ್ರ ಪೂರ್ಣಗೊಳ್ಳುತ್ತದೆ’ ಎಂದು ತಿಳಿಸಿದರು.



ಪೋಷಕರ ಮಾತನ್ನು ಕೇಳಬೇಡಿ: ‘ಸಾಹಿತ್ಯ, ಸಂಗೀತ, ಕಲೆ, ನಾಟಕ, ವಿಜ್ಞಾನ ಯಾವುದಾದರೊಂದು ಕ್ಷೇತ್ರ­ದಲ್ಲಿ ಅದಮ್ಯ ಆಸಕ್ತಿ ಬೆಳೆಸಿ­ಕೊಂಡು ಮುಂದುವರಿಯಿರಿ. ವೃತ್ತಿ­ಯನ್ನು ಆಯ್ಕೆ ಮಾಡಿಕೊಳ್ಳುವ ಸಂದರ್ಭ­ದಲ್ಲಿ ಯಾವುದೇ ಕಾರಣಕ್ಕೂ ಪೋಷ­ಕರ ಮಾತನ್ನು ಕೇಳಬೇಡಿ’ ಎಂದು ಕಿವಿಮಾತು ಹೇಳಿದರು.



‘ಎದೆಯಲ್ಲಿ ಒಂದಿಷ್ಟು ಪ್ರೀತಿ, ಮಾನ­ವೀ­ಯತೆಯನ್ನು ಉಳಿಸಿಕೊಂಡು, ದೇಶ­ಕ್ಕಾಗಿ ದುಡಿಯುವ ಸಂಕಲ್ಪ ಮಾಡಿ. ಜಾತಿ, ಮತ, ಪಂಥದಂತಹ ಕ್ಷುಲ್ಲಕ ಕಾರಣಗಳಿಗಾಗಿ ತಲೆಕೊಡ­ಬೇಡಿ. ನಿಚ್ಚಳವಾದ ಬದುಕನ್ನು ಬದು­ಕಲು ಶ್ರಮ ವಹಿಸಿ’ ಎಂದು ಸಲಹೆ ನೀಡಿದರು.



ರಾಜ್ಯಪಾಲ ಎಚ್‌.ಆರ್‌.  ಭಾರ­ದ್ವಾಜ್ ಮಾತನಾಡಿ, ‘ಹೊಸ ತಲೆ­ಮಾರಿನ ಯುವಜನಾಂಗಕ್ಕೆ ಕಲೆಯ ಜತೆಗೆ ವಿಜ್ಞಾನವೂ ದಾರಿ ದೀಪವಾಗ­ಬೇ­ಕಿದೆ. ವಿಜ್ಞಾನ ಕ್ಷೇತ್ರದಲ್ಲಿ ಸಂಶೋಧನೆಗೆ ಹೆಚ್ಚಿನ ಮಹತ್ವ ದೊರೆಯಬೇಕು’ ಎಂದರು.