ಭಾನುವಾರ, ಜನವರಿ 19, 2020
20 °C

‘ಸ್ವಾರ್ಥಕ್ಕೆ ಸಹಕಾರಿ ಕ್ಷೇತ್ರ ಬಳಕೆ ಬೇಡ’

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ತುಮಕೂರು: ಸಹಕಾರ ಕ್ಷೇತ್ರದ ಕಾರ್ಖಾನೆಗಳು ಸ್ಪರ್ಧೆ ಎದುರಿಸಲಾ­ರದೆ ಸಂಪೂರ್ಣ ನೆಲಕಚ್ಚಿದ್ದರೂ ಸಹ­ಕಾರ ಬ್ಯಾಂಕ್‌ಗಳು ರಾಜ್ಯದಲ್ಲಿ ಯಶಸ್ವಿ­ಯಾಗಿ ಕಾರ್ಯ ನಿರ್ವಹಿಸುತ್ತಿವೆ ಎಂದು ಸಹಕಾರ ಸಚಿವ ಎಚ್‌.ಎಸ್‌.­ಮಹಾದೇವಪ್ರಸಾದ್‌ ಅಭಿಪ್ರಾಯ­ಪಟ್ಟರು.



ನಗರದಲ್ಲಿ ಭಾನುವಾರ ನಡೆದ ತುಮಕೂರು ಗ್ರೈನ್‌ ಮರ್ಚೆಂಟ್ಸ್‌ ಕೋ–ಆಪರೇಟಿವ್‌ ಬ್ಯಾಂಕ್‌ ಸುವರ್ಣ ಮಹೋತ್ಸವ ಉದ್ಘಾಟಿಸಿ ಮಾತನಾಡಿ, ಸಹಕಾರಿ ಕ್ಷೇತ್ರವನ್ನು ಮೂಲ ಉದ್ದೇಶ ಮರೆತು ಸ್ವಾರ್ಥಕ್ಕೆ ಬಳಕೆ ಮಾಡಿ­ಕೊಳ್ಳುವಂತೆ ಆಗಬಾರದು. ಸರ್ವ­ಜನರ ಹಿತ ಸಹಕಾರ ಕ್ಷೇತ್ರದ ಮುಖ್ಯ ಉದ್ದೇಶ ಎಂದು ಹೇಳಿದರು.



ಸೌಹಾರ್ದ ಸಹಕಾರ ಕಾಯ್ದೆ ಜಾರಿ­ಯಿಂದ ಜನರಿಗೆ ಪ್ರಯೋಜನವಾಗಿದೆ. ಕೇವಲ ಉಳ್ಳವರಿಗೆ ಸೀಮಿತವಾಗಿದ್ದ ಸಹಕಾರ ಕ್ಷೇತ್ರ ಎಲ್ಲರಿಗೂ ತೆರೆಯು­ವಂತಾಗಿದೆ. ನಿಯಮಗಳು ಕಠಿಣ­ವಾಗಿದ್ದರೂ, ಸಹಕಾರ ಸಂಘಗಳ ಉಳು­ವಿಗೆ ಎಲ್ಲವೂ ಅನಿವಾರ್ಯ. ರಾಷ್ಟ್ರೀಕೃತ ಬ್ಯಾಂಕ್‌ಗಳು ಕೇವಲ ಉಳ್ಳವರಿಗೆ, ಬೃಹತ್ ಉದ್ಯಮಿಗಳಿಗೆ ಮಾತ್ರ ಸಾಲ ನೀಡುತ್ತವೆ. ಆದರೆ ಸಹಕಾರ ಬ್ಯಾಂಕ್‌­ಗಳು ಎಲ್ಲರಿಗೂ ಸಮಾನ ಅವಕಾಶ ನೀಡುತ್ತವೆ ಎಂದು ತಿಳಿಸಿದರು.



ರಾಜ್ಯದಲ್ಲಿ 3154 ಕೃಷಿ ಕ್ರೆಡಿಟ್‌ ಸಹಕಾರ ಬ್ಯಾಂಕ್‌ಗಳಿದ್ದು, ಕೃಷಿ ಕ್ಷೇತ್ರಕ್ಕೆ ರೂ. 2727 ಕೋಟಿ ಸಾಲ ನೀಡಿವೆ. 292 ಪಟ್ಟಣ ಸಹಕಾರ ಬ್ಯಾಂಕ್‌­ಗಳಿದ್ದು, ಇದರಲ್ಲಿ 22 ಬ್ಯಾಂಕ್‌ಗಳನ್ನು ಮಹಿಳೆಯರು ನಡೆಸುತ್ತಿದ್ದಾರೆ. ಇವು­ಗಳಲ್ಲಿ 1247 ಕೋಟಿ ದುಡಿಯುವ ಬಂಡವಾಳವಿದ್ದು, 287 ಕೋಟಿ ವಾರ್ಷಿಕ ನಿವ್ವಳ ಲಾಭ ಗಳಿಸಿವೆ. 14126 ಕೋಟಿ ಸಾಲ ನೀಡಲಾಗಿದೆ ಎಂದು ತಿಳಿಸಿದರು.



ಜಿಲ್ಲಾ ಉಸ್ತುವಾರಿ ಸಚಿವ ಟಿ.ಬಿ.­ಜಯಚಂದ್ರ ಮಾತನಾಡಿ, ಅಮೆರಿಕ ಸೇರಿದಂತೆ ಜಾಗತಿಕ ಮಟ್ಟದಲ್ಲಿ ಆರ್ಥಿಕ ಕುಸಿತ ಉಂಟಾಗಿ ಬ್ಯಾಂಕ್‌ಗಳು ದಿವಾಳಿಯಾದ ಸಂದರ್ಭದಲ್ಲಿ ದೇಶದ ಬ್ಯಾಂಕಿಂಗ್‌ ವ್ಯವಸ್ಥೆ ಉತ್ತಮವಾಗಿತ್ತು. ಇದರಲ್ಲಿ ಸಹಕಾರ ಕ್ಷೇತ್ರದ ಕೊಡು­ಗೆಯೂ ಇದೆ. ಸಹಕಾರಿ ಕ್ಷೇತ್ರ ಸ್ವಾಯತ್ತವಾಗಿ ಬೆಳೆಯುತ್ತದೆ. ಅಲ್ಲದೆ ಇಲ್ಲಿನ ಸ್ತ್ರೀಶಕ್ತಿ ಸಂಘಗಳು ರೂ. 700 ಕೋಟಿ ಬಂಡವಾಳ ಹೊಂದಿದ್ದು, ಉಳಿ­ತಾಯ ಪ್ರಜ್ಞೆ ಜಾಗೃತವಾಗಿದೆ. ಸಹ­ಕಾರ ಕ್ಷೇತ್ರದಲ್ಲಿ ಮಹಿಳೆಯರು   ಯಶಸ್ವಿಯಾಗಬಹುದು ಎಂಬುದಕ್ಕೆ ನಿದರ್ಶನ ಎಂದು ಹೇಳಿದರು.



ಲೆವಿ ಅಕ್ಕಿಗೆ ಕೇಂದ್ರ ಸರ್ಕಾರ ರೂ. 2100 ನಿಗದಿ ಮಾಡಿದ್ದರೂ ರಾಜ್ಯ ಸರ್ಕಾರ ಕ್ವಿಂಟಲ್‌ಗೆ ರೂ. 2400 ನೀಡು­ತ್ತಿದೆ. ರೂ. 300 ಹೆಚ್ಚುವರಿ ನೀಡು­ತ್ತಿರುವುದರಿಂದ ಅಕ್ಕಿ ಗಿರಣಿ ಮಾಲೀಕರು ಸರ್ಕಾರದ ಜೊತೆ ಸಂಘರ್ಷಕ್ಕೆ ಇಳಿಯದೆ ಸಹಕರಿಸಬೇಕು. ಹಸಿವು ರಹಿತ ರಾಜ್ಯ ಮಾಡುವ ಗುರಿ ಹೊಂದಿದ್ದು, 5 ಲಕ್ಷ ಟನ್‌ ಅಕ್ಕಿ ನೀಡಬೇಕು ಎಂದು ಕೋರಿದರು.



ಶಾಸಕ ಕೆ.ಎನ್‌.ರಾಜಣ್ಣ ಮಾತ­ನಾಡಿ, ಸಹಕಾರ ಸಂಘಗಳನ್ನು ನಡೆಸು­ವುದು ಕಷ್ಟದ ಕೆಲಸವಾಗಿದೆ. ಕೇಂದ್ರ ಸರ್ಕಾರ ಸಹಕಾರಿ ಸಂಸ್ಥೆಗಳ ಮೇಲೆ ಶೇ 30ರಷ್ಟು ವರಮಾನ ತೆರಿಗೆ ಹಾಕುತ್ತಿದೆ. ಆದರೆ ವಾಣಿಜ್ಯ ಬ್ಯಾಂಕ್‌ಗಳಿಗೆ ವಾರ್ಷಿಕ 20 ಸಾವಿರ ಕೋಟಿ ಹಣ ನೀಡುತ್ತದೆ. ಇಂತಹ ತದ್ವಿರುದ್ಧ ನೀತಿ ಕೈಬಿಡಬೇಕು ಎಂದು ಆಗ್ರಹಿಸಿದರು.



ಬ್ಯಾಂಕ್‌ ಅಧ್ಯಕ್ಷ ಎನ್.ಆರ್‌.­ಜಗದೀಶ್‌ ಅಧ್ಯಕ್ಷತೆ ವಹಿಸಿದ್ದರು. ಶಾಸಕರಾದ ಡಾ.ಎಸ್‌.­ರಫೀಕ್‌­ಅಹ್ಮದ್‌, ಕೆ.ಎಂ.ತಿಮ್ಮರಾಯಪ್ಪ, ಡಾ.ಎಂ.ಆರ್‌.ಹುಲಿನಾಯ್ಕರ್‌, ನಿರ್ದೇಶಕರಾದ ಎಂ.ಪಿ.ಮಹೇಶ್‌, ಆರ್‌.ಜೆ.ಅನಂತರಾಜಯ್ಯ, ಜಿಲ್ಲಾ ಹಾಲು ಒಕ್ಕೂಟದ ಅಧ್ಯಕ್ಷ ಕೊಂಡ­ವಾಡಿ ಚಂದ್ರಶೇಖರ್‌, ಮುಖಂಡರಾದ ಪರಮಶಿವಯ್ಯ, ಶಫೀಅಹ್ಮದ್‌, ಸಹ-­ಕಾರ ಇಲಾಖೆ ಉಪ ನಿಬಂಧಕ ಬಾಲ­ಶೇಖರ್‌ ಇತರರು ಭಾಗವಹಿಸಿದ್ದರು.

ಪ್ರತಿಕ್ರಿಯಿಸಿ (+)