ಮುಂಬೈ (ಪಿಟಿಐ): ರೂಪಾಯಿ ಅಪಮೌಲ್ಯ ಮತ್ತು ಗ್ರೀಸ್ ಆರ್ಥಿಕ ಬಿಕ್ಕಟ್ಟಿನ ಪರಿಣಾಮದಿಂದಾಗಿ ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ ಬುಧವಾರ 78 ಅಂಶಗಳಷ್ಟು ಕುಸಿದಿದ್ದು, 4 ತಿಂಗಳ ನಂತರ ಇದೇ ಮೊದಲ ಬಾರಿಗೆ 16 ಸಾವಿರದ ಗಡಿಯಿಂದ ಕೆಳಕ್ಕಿಳಿದಿದೆ.
ಡಾಲರ್ ಎದುರು ರೂಪಾಯಿ ಮೌಲ್ಯ ಬುಧವಾರ ರೂ.56.19ಕ್ಕೆ ಇಳಿದಿದೆ. ಈ ಬೆಳವಣಿಗೆಗಳಿಂದ ಷೇರುಪೇಟೆಯಲ್ಲಿ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರ (ಎಫ್‌ಐಐ) ಚಟುವಟಿಕೆಗೆ ತೀವ್ರಗೊಂಡಿದ್ದು, ದೊಡ್ಡ ಪ್ರಮಾಣದಲ್ಲಿ ಬಂಡವಾಳವನ್ನು ಪಾಪಸ್ ಪಡೆಯುತ್ತಿದ್ದಾರೆ. ಮಂಗಳವಾರ `ಎಫ್‌ಐಐ~ಗಳು ರೂ.283 ಕೋಟಿ ಬಂಡವಾಳ ಹಿಂತೆಗೆದುಕೊಂಡಿವೆ ಎಂದು ಷೇರುಪೇಟೆ ನಿಯಂತ್ರಣ ಮಂಡಳಿ `ಸೆಬಿ~ ಹೇಳಿದೆ.
ದಿನದ ವಹಿವಾಟಿನ ಅಂತ್ಯಕ್ಕೆ ಸೂಚ್ಯಂಕ 15,948 ಅಂಶಗಳಿಗೆ ಕುಸಿಯಿತು. ರಾಷ್ಟೀಯ ಷೇರು ಸೂಚ್ಯಂಕ `ನಿಫ್ಟಿ~ ಕೂಡ 24 ಅಂಶಗಳನ್ನು ಕಳೆದುಕೊಂಡು 4,835 ಅಂಶಗಳಿಗೆ ವಹಿವಾಟು ಕೊನೆಗೊಳಿಸಿತು.
ಗರಿಷ್ಠ ನಷ್ಟ ಅನುಭವಿಸಿದ್ದು ಭಾರ್ತಿ ಏರ್‌ಟೆಲ್ ಷೇರುಗಳು. ಇವು ಶೇ 4.04ರಷ್ಟು ಮೌಲ್ಯ ಕಳೆದುಕೊಂಡಿವೆ.
ಕಳೆದೊಂದು ವರ್ಷದಲ್ಲಿ `ಬಿಎಸ್‌ಇ~ ಒಟ್ಟಾರೆ ಶೇ 14ರಷ್ಟು ಕುಸಿತ ಕಂಡಿದೆ. ರೂಪಾಯಿ ಮೌಲ್ಯ ಶೇ 20ರಷ್ಟು ಕುಸಿದಿದೆ.
