ಅಗ್ಗದ ಐಫೋನ್ ಸ್ಪರ್ಧೆ!
ಸ್ಮಾರ್ಟ್‌ಫೋನ್‌ ಮಾರುಕಟ್ಟೆಯಲ್ಲಿ ಸ್ಯಾಮ್ಸಂಗ್‌ನ ಆಧಿಪತ್ಯ ಮುರಿಯಲು ಆಪಲ್‌, ಇತ್ತೀಚೆಗೆ ಎರಡು ಹೊಸ ಐಫೋನ್‌ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಸಾಂಪ್ರದಾಯಿಕ ಶೈಲಿಗಿಂತ ಭಿನ್ನವಾದ ವಿನ್ಯಾಸ ಹೊಂದಿರುವ ಮತ್ತು ವರ್ಣರಂಜಿತವಾಗಿರುವ ಈ ಹ್ಯಾಂಡ್‌ಸೆಟ್‌ಗಳಲ್ಲಿ ಒಂದನ್ನು ಪ್ಲಾಸ್ಟಿಕ್‌ನಿಂದ ಮಾಡಲಾಗಿದೆ. ಇನ್ನೊಂದಕ್ಕೆ ವಿಶ್ವದರ್ಜೆಯ ಸ್ಮಾರ್ಟ್‌ಫೋನ್‌ ನಿರ್ಮಾಣ ಮಾನದಂಡ (ಗೋಲ್ಡ್ ರೇಟಿಂಗ್‌) ಅನುಸರಿಸಲಾಗಿದೆ. ಬಳಕೆದಾರರ ಬೆರಳಮುದ್ರೆ ಗುರುತಿಸುವ ತಂತ್ರಜ್ಞಾನವೂ ಇದರಲ್ಲಿದೆ. ಇವೆರಡು ಹ್ಯಾಂಡ್‌ಸೆಟ್‌ಗಳನ್ನು ಎರಡು ಪ್ರತ್ಯೇಕ ವರ್ಗದ ಗ್ರಾಹಕರಿಗಾಗಿ ಅಭಿವೃದ್ಧಿಪಡಿಸಲಾಗಿದೆ.
ಇತ್ತೀಚೆಗೆ ಕ್ಯಾಲಿಫೋರ್ನಿಯಾದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಆಪಲ್‌ ‘ಐಫೋನ್–5ಸಿ‘ ಮತ್ತು ‘ಐಫೋನ್–5ಎಸ್’ ಎಂಬ ಹೆಸರಿನ ಈ ಎರಡು ಹ್ಯಾಂಡ್‌ಸೆಟ್‌ಗಳು ಮಾರುಕಟ್ಟೆಗೆ ಬಿಡುಗಡೆಗೊಂಡಿವೆ.
ಅಗ್ಗದ ಐಫೋನ್–5ಸಿ
‘ಐಫೋನ್–5ಸಿ’ ಪಂಚ ವರ್ಣಗಳಲ್ಲಿ ಲಭ್ಯವಿದೆ. ಹಸಿರು, ನೀಲಿ, ಹಳದಿ, ಗುಲಾಬಿ ಮತ್ತು ಬಿಳಿ ಬಣ್ಣಗಳಲ್ಲಿರುವ ಈ ಹ್ಯಾಂಡ್‌ಸೆಟ್‌ ಅನ್ನು ಆಪಲ್‌ನ ‘ಸಿಇಒ’ ಟಿಮ್‌ ಕುಕ್‌, ‘ಹೆಚ್ಚು ಮೋಜು –ಹೆಚ್ಚು ವರ್ಣರಂಜಿತ’ ಎಂದು ಬಣ್ಣಿಸಿದ್ದಾರೆ.
8 ಮೆಗಾಪಿಕ್ಸಲ್‌ ಕ್ಯಾಮೆರಾ ಮತ್ತು 4 ಇಂಚಿನ ರೆಟಿನಾ ಡಿಸ್‌ಪ್ಲೆ ಹೊಂದಿರುವ ಈ ಸ್ಮಾರ್ಟ್‌ಫೋನ್‌ ಆಪಲ್‌ನ ‘ಎ–6’ ಚಿಪ್‌ ಕಾರ್ಯನಿರ್ವಹಣೆ ಸಾಮರ್ಥ್ಯ ಹೊಂದಿದೆ. ಲೈವ್‌ ಫೋಟೊ ಫಿಲ್ಟರ್‌ ಸೇರಿದಂತೆ ಹೊಸ ತಲೆಮಾರಿನ ಹಲವು ವಿಶೇಷತೆಗಳೂ ಇದರಲ್ಲಿವೆ. ಸದ್ಯ 16 ಗಿಗಾಬೈಟ್‌ (ಜಿ.ಬಿ) ಸಾಮರ್ಥ್ಯದ ‘5ಸಿ’ ಮಾದರಿ ಬೆಲೆ 99 ಡಾಲರ್‌(ಅಂದಾಜು ₨6 ಸಾವಿರ). 32 ಜಿ.ಬಿ ಸಾಮರ್ಥ್ಯದ ಹ್ಯಾಂಡ್‌ಸೆಟ್‌ ಎರಡು ವರ್ಷದ ವಯರ್‌ಲೆಸ್‌ ಕರಾರಿನ ಜತೆ 199 ಡಾಲರ್‌ಗಳಿಗೆ ಲಭಿಸುತ್ತದೆ.
‘ಅಮೆರಿಕ ಮತ್ತು ಯೂರೋಪ್‌ ಮಾರುಕಟ್ಟೆಯಲ್ಲಿ ಗ್ರಾಹಕರು ದುಬಾರಿ ಬೆಲೆ ತೆತ್ತು ಐಫೋನ್ ಖರೀದಿಸುತ್ತಾರೆ. ಆದರೆ, ಅಗ್ಗದ ದರದಲ್ಲಿ ಆಪಲ್‌ ಹ್ಯಾಂಡ್‌ಸೆಟ್‌ ಖರೀದಿಸಲು ಕಾತರಿಸುತ್ತಿರುವ ದೇಶಗಳ ಗ್ರಾಹಕರಿಗಾಗಿ, ವಿಶೇಷವಾಗಿ ಚೀನಾ, ಭಾರತದಂತಹ ಪ್ರವರ್ಧಮಾನಕ್ಕೆ ಬರುತ್ತಿರುವ ಮಾರುಕಟ್ಟೆಗಳನ್ನು ಗಮನದಲ್ಲಿಟ್ಟುಕೊಂಡು ಆಪಲ್‌ ‘5ಸಿ’ ಬಿಡುಗಡೆಮಾಡಿದೆ ಎಂದು ಮಾರುಕಟ್ಟೆ ತಜ್ಞರು ವಿಶ್ಲೇಷಿಸಿದ್ದಾರೆ.
ಐಫೋನ್ 5ಎಸ್
‘ಐಫೋನ್ 5ಎಸ್’ ಅಭಿವೃದ್ಧಿಯಲ್ಲಿ ವಿಶ್ವದರ್ಜೆಯ ಮಾನದಂಡ ಅನುಸರಿಸಲಾಗಿದೆ. ಸದ್ಯ ಮಾರುಕಟ್ಟೆಯಲ್ಲಿ ಲಭ್ಯವಿರುವ ಸ್ಮಾರ್ಟ್‌ಫೋನ್‌ಗಳಲ್ಲಿ ಅತ್ಯಂತ ಸುಧಾರಿತ ತಂತ್ರಜ್ಞಾನ ಮತ್ತು ಗುಣವಿಶೇಷಗಳಿರುವ ಹ್ಯಾಂಡ್‌ಸೆಟ್‌ ಎಂಬ ಹೆಗ್ಗಳಿಕೆಯೂ ಇದರದ್ದು. ‘ಇಂಥದೊಂದು ಸ್ಮಾರ್ಟ್‌ಫೋನ್‌ ಇದುವರೆಗೆ ಮಾರುಕಟ್ಟೆಗೆ ಬಿಡುಗಡೆಗೊಂಡಿಲ್ಲ’ ಎನ್ನುತ್ತಾರೆ ಆಪಲ್‌ನ ಮಾರುಕಟ್ಟೆ ಉಪಾಧ್ಯಕ್ಷ ಫಿಲ್‌ ಷಿಲ್ಲರ್‌.
ಚಿನ್ನ, ಬೆಳ್ಳಿ ಮತ್ತು ಸ್ಪೇಸ್‌ ಗ್ರೇ ಬಣ್ಣಗಳಲ್ಲಿರುವ ಐಫೋನ್–5ಎಸ್ ಆಪಲ್‌ನ ಹೊಸ ‘ಎ–7’ ಚಿಪ್‌ ಕಾರ್ಯನಿರ್ವಹಣೆ ಸಾಮರ್ಥ್ಯ ಹೊಂದಿದೆ. ಎ–7 ಚಿಪ್‌ ಎ–6 ಗಿಂತಲೂ ಎರಡು ಪಟ್ಟು ಹೆಚ್ಚಿನ ವೇಗ ಹೊಂದಿದೆ ಎನ್ನುವುದು ಇಲ್ಲಿ ಗಮನಿಸಬೇಕಾದ ಅಂಶ.
ಆರೋಗ್ಯ ಮತ್ತು ಫಿಟ್‌ನೆಸ್‌ಗೆ ಸಂಬಂಧಿಸಿದಂತಹ ಹಲವು ಅಪ್ಲಿಕೇಷನ್ಸ್‌ಗಳು(ಇನ್‌ಬಿಲ್ಟ್‌) ಇದರಲ್ಲಿವೆ. ‘ಅಮೆರಿಕ, ಯೂರೋಪ್‌ನಲ್ಲಿ ಈ ಅಪ್ಲಿಕೇಷನ್ಸ್‌ಗಳು ಜನರ ಜೀವನದ ಅವಿಭಾಜ್ಯ ಅಂಗವೇ ಆಗಿ ಹೋಗಿವೆ. ದಿನ ನಿತ್ಯದ ವ್ಯಾಯಾಮದ ಮೇಲೆ ನಿಗಾ ವಹಿಸಲು, ಮಧುಮೇಹ, ರಕ್ತದೊತ್ತಡ ತಿಳಿಯಲು, ನಿದ್ರೆ ಮಾಡಲು, ನಿದ್ರೆಯಿಂದ ಏಳಲು ಸಹ ಜನರು ಅಪ್ಲಿಕೇಷನ್ಸ್‌ ಬಳಸುತ್ತಿದ್ದಾರೆ. ಹೀಗಾಗಿ ಹೆಚ್ಚು ಆರೋಗ್ಯ ಸಂಬಂಧಿತ ಅಪ್ಲಿಕೇಷನ್ಸ್‌ಗಳನ್ನು ಒದಗಿಸಲಾಗಿದೆ’ ಎನ್ನುವುದು ಷಿಲ್ಲರ್‌ ಅವರ ವಿವರಣೆ.
ಐಫೊನ್‌–5ಎಸ್‌ನಲ್ಲಿರುವ ಕ್ಯಾಮೆರಾವನ್ನು ಮೇಲ್ದರ್ಜೆಗೆ ಏರಿಸಲಾಗಿದೆ. ಅತ್ಯುತ್ತಮ ಛಾಯಾಗ್ರಹಣಕ್ಕಾಗಿ ಹಲವು ಸ್ವಯಂಚಾಲಿತ ಸೌಲಭ್ಯಗಳನ್ನು ಒದಗಿಸಲಾಗಿದೆ. ಪಿಕ್ಸಲ್‌ ಸಾಮರ್ಥ್ಯ ಹೆಚ್ಚಿಸಲಾಗಿದೆ. ‘ಟ್ರೂ ಟನ್‌’ ಫ್ಲಾಶ್‌ ಸೌಲಭ್ಯ ಇರುವುದರಿಂದ ಎಲ್ಲ ಬಣ್ಣಗಳು ಸರಿಯಾಗಿ ಸೆರೆಯಾಗುತ್ತವೆ. ಬಣ್ಣಗಳು ಅಂದಗೆಡುವ ಸಾಧ್ಯತೆಯೇ ಇಲ್ಲ. ಮನುಷ್ಯನ ಚರ್ಮದ ಬಣ್ಣ, ಕೋಣೆ ಒಳಗಿನ, ಹೊರಗಿನ ಬಣ್ಣ ಸಹ ಅಷ್ಟೇ ಸ್ಪಷ್ಟವಾಗಿ ಸೆರೆಯಾಗುತ್ತವೆ. ಇಲ್ಲಿಯವರೆಗೆ ಐಫೋನ್‌ನಲ್ಲಿ ಈ ಸೌಲಭ್ಯ ಇರಲಿಲ್ಲ ಎನ್ನುತ್ತಾರೆ ಷಿಲ್ಲರ್‌.
ಐಫೊನ್‌–5ಎಸ್‌ನ ಕ್ಯಾಮೆರಾವನ್ನು ‘ಐಸೈಟ್‌’ ಎಂದು ಕರೆಯಲಾಗಿದೆ. ಇದರಲ್ಲಿರುವ ಮತ್ತೊಂದು ವೈಶಿಷ್ಟ್ಯ ಎಂದರೆ ‘ಆಟೊ ಇಮೇಜ್‌ ಸ್ಟೆಬಲೈಸೇಷನ್‌’ ತಂತ್ರಜ್ಞಾನ. ಇದರಿಂದ ಚಿತ್ರಗಳು ಬ್ಲರ್‌(ಮಸುಕು) ಆಗುವ ಸಾಧ್ಯತೆ ಕಡಿಮೆ. ಚಲಿಸುತ್ತಿರುವ ವಾಹನದಿಂದಲೂ ಚಿತ್ರ, ವಿಡಿಯೊ ಸೆರೆ ಹಿಡಿಯಬಹುದು ಎನ್ನುತ್ತಾರೆ.
ಇದರಲ್ಲಿರುವ ‘ಟಚ್‌ ಐಡಿ’ ಎಂಬ ಅನ್‌ಲಾಕ್‌ ತಂತ್ರಜ್ಞಾನ ಬಳಕೆದಾರರ ಬೆರಳು ಮುದ್ರೆಯನ್ನೂ ಗುರುತಿಸುತ್ತದೆ. ಹೀಗಾಗಿ ಇನ್ನೊಬ್ಬರು ಫೋನ್‌ ತೆಗೆದು ನೋಡುವ, ದುರುಪಯೋಗಪಡಿಸಿಕೊಳ್ಳುವ ಅವಕಾಶ ಇಲ್ಲ. ಸ್ಪರ್ಶ ಪರದೆ ಮೇಲೆ ಬೆರಳು ಸೋಕಿಸಿದಾಗ ಅದರು ಬೆರಳು ಮುದ್ರೆಯನ್ನು ಥಟ್ಟನೆ ಗುರುತಿಸುತ್ತದೆ. ಬೆರಳು ಮುದ್ರೆ ಬೇರೆಯದೇ ಆಗಿದ್ದರೆ ಫೋನ್‌ ತನ್ನಿಂದ ತಾನೇ ಲಾಕ್‌ ಆಗಿಬಿಡುತ್ತದೆ. ಐಫೊನ್‌–5ಎಸ್‌ನ ಬೆಲೆ ಅಂದಾಜು ₨50 ಸಾವಿರ.
‘ಐಒಎಸ್–7’ ಉಚಿತ
ಸೆ. 18ರ ನಂತರ ಬಳಕೆದಾರರು ಆಪಲ್‌ನ ಹೊಸ ಕಾರ್ಯನಿರ್ವಹಣಾ ತಂತ್ರಾಂಶ ‘ಐಒಎಸ್–7’ ಉಚಿತವಾಗಿ ಡೌನ್‌ಲೋಡ್‌ ಮಾಡಿಕೊಂಡು ಬಳಸಬಹುದು. ಈ ಮೂಲಕ ಸ್ಮಾರ್ಟ್‌ಫೋನ್‌ನ ಹೊಸತೊಂದು ಜಗತ್ತಿಗೆ ಪ್ರವೇಶ ಪಡೆಯಬಹುದು ಎನ್ನುತ್ತಾರೆ ಕಂಪೆನಿಯ ಸಾಫ್ಟ್‌ವೇರ್‌ ವಿಭಾಗದ ಮುಖ್ಯಸ್ಥ ಕ್ರೇಗ್‌ ಫೆಡ್ರಿಕ್‌.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.