ನವದೆಹಲಿ (ಪಿಟಿಐ): ತೆರಿಗೆ ಮರುಪಾವತಿ ವಿಚಾರ‌್ನ ಇತ್ಯರ್ಥಗೊಳಿಸುವುದಕ್ಕೆ ಒಂದು ಲಕ್ಷ ರೂ ಲಂಚಕ್ಕೆ ಬೇಡಿಕೆ ಇಟ್ಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಬಿಐನಿಂದ ಬಂಧನಕ್ಕೊಳಗಾಗಿರುವ ಆದಾಯ ತೆರಿಗೆ ಇಲಾಖೆಯ ನಿವೃತ್ತ ಹೆಚ್ಚುವರಿ ಕಮಿಷನರ್ ಎಚ್. ಎ ಸಿದ್ಧಿಕಿ ಅವರಿಗೆ ಸಿಬಿಐನ ವಿಶೇಷ ನ್ಯಾಯಾಲಯ ನಾಲ್ಕು ವರ್ಷಗಳ ಕಾರಾಗೃಹ ಶಿಕ್ಷೆ ವಿಧಿಸಿದೆ.
ವಿಶೇಷ ಸಿಬಿಐ ನ್ಯಾಯಾಧೀಶ ತಲವಂತ ಸಿಂಗ್ ಅವರು ಎಚ್.ಎ ಸಿದ್ದಿಕಿ ಅವರಿಗೆ 4 ವರ್ಷಗಳ ಜೈಲು ಶಿಕ್ಷೆ ಜೊತೆಗೆ ರೂ 4 ಲಕ್ಷ ದಂಡವನ್ನೂ ವಿಧಿಸಿದರು.
ಲೆಕ್ಕಪರಿಶೋಧಕ ಎಂ.ಎಂ ಸಚ್‌ದೇವ ಅವರು 2003ರಲ್ಲಿ ಸಿದ್ದಿಕಿ ವಿರುದ್ಧ ದೂರು ದಾಖಲಿಸಿದ್ದರು. `ದೂರುದಾರರಾಗಿರುವ ಸಚ್‌ದೇವ ಮೂಲಕ ಸಿದ್ದಿಕಿ ಅವರು ಆರ್.ಪಿ ಕತ್ಯಾಲ್ ಎಂಬುವವರಿಂದ ಒಂದು ಲಕ್ಷ ರೂಪಾಯಿ ಲಂಚಕ್ಕೆ ಬೇಡಿಕೆ ಇಟ್ಟಿದ್ದನ್ನು ಸಿಬಿಐಯು ಸಾಬೀತು ಪಡಿಸಿದೆ~ ಎಂದು ನ್ಯಾಯಾಧೀಶರು ತೀರ್ಪಿನಲ್ಲಿ ಹೇಳಿದ್ದಾರೆ.
