ಆ ವಿಚಾರ

ಚಾರಣ ಹೊರಟಿತ್ತು
ಅಲ್ಲೇ
ಆ ರಸ್ತೆಯಂಚಿನ
ಕಲ್ಲುದಾರಿಯ ದಾಟಿ,
ಪೊದೆಗಳಾಚಿನ ಮರದ ಕೆಳಗೆ
ಅದೇ, ಆ ನೀರಿರುವ ಜಾಗವಿದೆಯಲ್ಲ?
ಅಲ್ಲಿ!
ಉಸಿರಾಡಿದ ಪಿಸುಮಾತುಗಳ ಬಿಸಿಗಾಳಿ
ಅದೇ ರಸ್ತೆಗೆ ತಗುಲಿ
ಬಿಸಿಬಿಸಿಯಾಗಿ ಹೊರಟಿತ್ತು.
ಕಿವಿಗಳಿಂದ ಕಿವಿಗಳಿಗೆ,
ಕಣ್ ಸನ್ನೆಯಿಂದ
ಕೈವರೆಗೆ,
ಸುತ್ತೀ ಸುತ್ತಿ ಸುಸ್ತಾಗಿ
ಉಫ್! ಎಂದು ಕುಳಿತ ಆ ವಿಚಾರ
ರಸ್ತೆಯಂಚಿಲ್ಲಿ ಭರ್ರ‌್‌ ಎಂದು ಸಾಗಿದ
ಯಾವುದೋ ಗಾಡಿಯ ರಭಸಕ್ಕೆ
ತತ್ತರಿಸಿ ಎಚ್ಚತ್ತು ಮತ್ತೆ
ಸುತ್ತಿ ಹೊರಟಿತು ಚಾರಣ.
ಪಿಸುಮಾತೂ ನಿಂತ ಮೌನಕ್ಕೆ
ಇದೂ ಒಂದು ಕಾರಣ!