ಆರು ತಿಂಗಳಿಂದಲೇ ಸಂಚು
ನವದೆಹಲಿ: ಭಾರತದ ರಾಜತಾಂತ್ರಿಕ ಅಧಿಕಾರಿ ದೇವಯಾನಿ ಖೋಬ್ರಾಗಡೆ ಅವರ ಮನೆಗೆಲಸದ ಸಹಾಯಕಿ ಸಂಗೀತಾ ರಿಚರ್ಡ್‌, ದೆಹಲಿಯಲ್ಲಿರುವ ತಮ್ಮ ಕುಟುಂಬದವರನ್ನು ನ್ಯೂಯಾರ್ಕ್‌ಗೆ ಕರೆಸಿಕೊಳ್ಳುವುದಕ್ಕಾಗಿ ಕಳೆದ ಆರು ತಿಂಗಳಿನಿಂದ ಸಂಚು ರೂಪಿಸಿದ್ದರು. ನ್ಯೂಯಾರ್ಕ್‌ ಮ್ಯಾನ್‌ಹಟನ್‌ನ ಅಟಾರ್ನಿ ಪ್ರೀತ್‌ ಬರಾರ, ಅಮೆರಿಕದ ವಿದೇಶಾಂಗ ಹಾಗೂ ಕಾನೂನು ಇಲಾಖೆಗಳು ಮತ್ತು ನವದೆಹಲಿಯಲ್ಲಿರುವ ಅಮೆರಿಕದ ರಾಯಭಾರ ಕಚೇರಿ ಅಧಿಕಾರಿಗಳು ಸಂಗೀತಾ ಅವರಿಗೆ ಈ ವಿಷಯವಾಗಿ ನೆರವು ನೀಡಿದ್ದರು.
ಸಂಗೀತಾ ಪತಿ ಫಿಲಿಪ್‌ ರಿಚರ್ಡ್‌ ಹಾಗೂ ಇಬ್ಬರು ಮಕ್ಕಳು ಡಿಸೆಂಬರ್ 10ರಂದು ನ್ಯೂಯಾರ್ಕ್‌ಗೆ ತೆರಳಲು ಅಮೆರಿಕ ಸರ್ಕಾರ ನೆರವು ನೀಡಿತ್ತು ಎನ್ನುವುದನ್ನು ಬರಾರ ಒಪ್ಪಿಕೊಂಡಿದ್ದಾರೆ. ‘ಸಂಗೀತಾ ಹಾಗೂ ಕುಟುಂಬದವರ ವಿರುದ್ಧ ಭಾರತದಲ್ಲಿ ಪ್ರಕರಣ ದಾಖಲಾಗಿದೆ. ಹೀಗಿರುವಾಗ ಅಮೆರಿಕ ಸರ್ಕಾರಕ್ಕೆ ಇವರನ್ನೆಲ್ಲ ತನ್ನ ದೇಶಕ್ಕೆ ಕರೆಸಿಕೊಳ್ಳುವುದಕ್ಕೆ ಏನು ಹಕ್ಕಿದೆ’ ಎಂದು ಪ್ರಶ್ನಿಸುತ್ತಾರೆ ವಿದೇಶಾಂಗ ಸಚಿವಾಲಯದ ವಕ್ತಾರ ಸೈಯದ್‌ ಅಕ್ಬರುದ್ದೀನ್‌.
ವಲಸೆ ವಿಷಯಗಳಲ್ಲಿ ಪರಿಣತಿ ಹೊಂದಿರುವ ಕಾನೂನು ಸಂಸ್ಥೆ–ಆ್ಯೆಕ್ಸೆಸ್‌ ಇಮಿಗ್ರೇಷನ್‌ ಕಚೇರಿಯಲ್ಲಿ ಜು.8ರಂದು ದೇವಯಾನಿ, ಸಂಗೀತಾರನ್ನು ಭೇಟಿಯಾಗಿದ್ದರು. 10 ಸಾವಿರ ಡಾಲರ್‌ ಪರಿಹಾರ, ಅಮೆರಿಕದಲ್ಲಿಯೇ ಉಳಿಯುವ ಸಲುವಾಗಿ ಸಾಮಾನ್ಯ ಪಾಸ್‌ಪೋರ್ಟ್‌ ನೀಡಬೇಕು ಹಾಗೂ ವಲಸೆ ನಿಯಮದಲ್ಲಿ ವಿನಾಯ್ತಿ ನಿಡಬೇಕೆಂದು ಸಂಗೀತಾ ಬೇಡಿಕೆ ಮುಂದಿಟ್ಟಿದ್ದರು.
ಆದರೆ ಈ ಬೇಡಿಕೆಯನ್ನು ತಿರಸ್ಕರಿಸಿ, ಭಾರತಕ್ಕೆ ಮರಳುವಂತೆ ತಾಕೀತು ಮಾಡಲಾಯಿತು. ಅದೇ ದಿನ ಸಂಗೀತಾ ಪಾಸ್‌ಪೋರ್ಟ್‌ ರದ್ದಾಯಿತು. ಹಾಗಾಗಿ ಆಕೆ ಅಮೆರಿಕದಲ್ಲಿ ನೆಲೆಸಿರುವುದು ಅಕ್ರಮ ಎಂದಾಯಿತು. ನಂತರದಲ್ಲಿ ಅಟಾರ್ನಿ ಬರಾರ ಅವರನ್ನು ಸಂಪರ್ಕಿಸಿತು. ದೇವಯಾನಿ ಅವರು ಸಂಗೀತಾಗೆ ಕಿರುಕುಳ ನೀಡಿದ್ದಾರೆ ಎನ್ನಲಾದ ದೂರಿನ ತನಿಖೆಗೆ ವಿದೇಶಾಂಗ ಇಲಾಖೆಯ ರಾಜತಾಂತ್ರಿಕ ರಕ್ಷಣಾ ವಿಭಾಗದ ನೆರವು ಪಡೆದುಕೊಂಡಿತು. ಸಂಗೀತಾ ಮತ್ತು ಅವರ ಕುಟುಂಬ ‘ಟಿ’ವೀಸಾ ಪಡೆಯುವುದಕ್ಕೂ ಈ ಸಂಸ್ಥೆ ನೆರವು ನೀಡಿತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.