ಆಲಮೇಲ (ವಿಜಾಪುರ ಜಿಲ್ಲೆ): ರಾಜಕೀಯವಾಗಿ ಸಬಲರಾದಾಗ ಮಾತ್ರ ಸಮಾಜದ ಸುಧಾರಣೆ ಸಾಧ್ಯ. ಈ ನಿಟ್ಟಿನಲ್ಲಿ ರಾಜಕೀಯ ಬಲವರ್ಧನೆಗೆ ಡೋಹರ ಸಮಾಜ ಮುಂದಾಗಬೇಕಿದೆ ಎಂದು ಶಾಸಕ ವಿಠ್ಠಲ ಕಟಕಧೋಂಡ ಹೇಳಿದರು.
ಇಲ್ಲಿನ ಡೋಹರ ಕಕ್ಕಯ್ಯ ಯುವಕ ಸೇವಾ ಸಮಿತಿ ಸಂಘಟಿಸಿದ್ದ ಶರಣ ಮಹಾಪ್ರಸಾದಿ ಡೋಹರ ಕಕ್ಕಯ್ಯನವರ ಜಯಂತ್ಯುತ್ಸವ ಸಮಾರಂಭ ಉದ್ಘಾಟಿಸಿ ಅವರು ಮಾತನಾಡಿದರು.
`ಸಂಘಟನೆ ಕಟ್ಟುವಲ್ಲಿ ಇಂದು ಸಮಾಜ ಬಹಳ ಹಿಂದೆ ಬಿದ್ದಿದೆ. ಇದಕ್ಕೆ ಶಿಕ್ಷಣದ ಕೊರತೆಯೇ ಕಾರಣ. ನಮ್ಮ ಸಮಾಜದ ಮಕ್ಕಳಿಗೆ ಶಿಕ್ಷಣ ನೀಡುವಲ್ಲಿ ಸಮಾಜ ಬಾಂಧವರು ಮುಂದಾಗಬೇಕು~ ಎಂದರು.
ಗುಲ್ಬರ್ಗ ವಿಶ್ವವಿದ್ಯಾಲಯಕ್ಕೆ ಮಹಾ ದಾಸೋಹಿ ಡೋಹರ ಕಕ್ಕಯ್ಯನವರ ಹೆಸರಡುವಂತೆ ಸರಕಾರಕ್ಕೆ ಆಗ್ರಹಿಸುವುದಾಗಿ ಕಟಕಧೋಂಡ ಹೇಳಿದರು.ಯಶೋದಾ ನಾರಾಯಣಕರ ಪ್ರಾಸ್ತಾವಿಕವಾಗಿ ಮಾತನಾಡಿದರು.
ಕಾರ್ಯಕ್ರಮದಲ್ಲಿ ಮಾಜಿ ಸಚಿವ ಎಂ.ಸಿ. ಮನಗೂಳಿ, ಬಸವರಾಜ ಧನಶ್ರೀ, ಜಿ.ಪಂ. ಸದಸ್ಯ ಮಲ್ಲಪ್ಪ ತೋಡಕರ , ಶಿವಕುಮಾರ ಗುಂದಗಿ, ಪ್ರಭು ವಾಲೀಕಾರ, ರಮೇಶ ಭಂಟನೂರ ಭಾಗವಹಿಸಿದ್ದರು.
ಗುರುಲಿಂಗ ಶಿವಾಚಾರ್ಯ, ಚಂದ್ರಶೇಖರ ಶಿವಾಚಾರ್ಯ, ಜಗದೇವ ಮಲ್ಲಿಬೊಮ್ಮಯ್ಯ ಸ್ವಾಮೀಜಿ, ಶರಣಬಸವ ಶರಣರು ಸಾನ್ನಿಧ್ಯ ವಹಿಸಿದ್ದರು.ದೇವಾನಂದ ಖಂಧಾರೆ ಸ್ವಾಗತಿಸಿದರು. ಶಿವು ಗುಂದಗಿ ನಿರೂಪಿಸಿದರು. ಶ್ರೀಶೈಲ ಮಠಪತಿ ವಂದಿಸಿದರು.
ಭವ್ಯ ಮೆರವಣಿಗೆ: ಬೆಳಿಗ್ಗೆ ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಶರಣ ಕಕ್ಕಯ್ಯನವರ ಭಾವಚಿತ್ರದ ಭವ್ಯ ಮೆರವಣಿಗೆ ನಡೆಯಿತು. ಈ ಸಂದರ್ಭದಲ್ಲಿ 101 ಮಹಿಳೆಯರು ಕುಂಭ ಹೊತ್ತು ಮೆರವಣಿಗೆಯಲ್ಲಿ ಭಾಗವಹಿಸಿದ್ದರು.
ಸಮಾಜದ ಧುರೀಣರಾದ ಈಶ್ವರ ನಾರಾಯಣಕರ, ಶಿವಾಜಿ ಕಟಕಧೋಂಡ, ಯಶೋದಾ ನಾರಾಯಣಕರ, ಯುವಕ ಸಂಘದ ಅಧ್ಯಕ್ಷ ಸುಭಾಸ ನಾರಾಯಣಕರ ಭಾಗವಹಿಸಿದ್ದರು.
