ಜೇವರ್ಗಿ (ಗುಲ್ಬರ್ಗ): ಪ್ರವಾಹ ಸಂತ್ರಸ್ತರಿಗಾಗಿ ಪೇಜಾವರ ಮಠದ ವತಿಯಿಂದ ನಿರ್ಮಿಸಿದ `ಆಸರೆ ಮನೆ~ಗಳನ್ನು ಸೋಮವಾರ ಕೂಡಿ-ಕೋಬಾಳ ಗ್ರಾಮದ ಹೊರವಲಯದಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಫಲಾನುಭವಿಗಳಿಗೆ ಹಸ್ತಾಂತರಿಸಲಾಯಿತು.
ಆದರೆ, ದಾನಿಗಳ ಪೈಕಿ ಮಹಿಳೆಯೊಬ್ಬರ ವಿವರ ಬಹಿರಂಗಪಡಿಸದೆ ಇರಲು ಸಂಘಟಕರು ಮನವಿ ಮಾಡಿದ ಘಟನೆಯೂ ನಡೆಯಿತು.
ಮನೆ ನಿರ್ಮಾಣಕ್ಕೆ ನೆರವು ನೀಡಿದ ದಾನಿಗಳನ್ನು ಸನ್ಮಾನಿಸಲಾಗಿದೆ. `ಸನ್ಮಾನಿತರ ವಿವರ ಬಹಿರಂಗಪಡಿಸುವುದು ಬೇಡ~ ಎಂದು ಸಂಘಟಕರು ಪತ್ರಕರ್ತರಿಗೆ ಮನವಿ ಮಾಡಿದರು.
ಈ ಕುರಿತು ಪೊಲೀಸರನ್ನು ಪ್ರಶ್ನಿಸಿದಾಗ `ದೆಹಲಿ ಮೂಲದ ಉದ್ಯಮಿಯೊಬ್ಬರನ್ನು ಸನ್ಮಾನಿಸಲಾಗಿದೆ~ ಎಂದು ಸಂಘಟಕರು ತಿಳಿಸಿದ್ದಾಗಿ ಹೇಳಿದ್ದಾರೆ. ಕೂಡಿ, ಕೋಬಾಳ ಹಾಗೂ ಕೋನಹಿಪ್ಪರಗಾ ಗ್ರಾಮಗಳ ಸಂತ್ರಸ್ತರಿಗೆ ನಿರ್ಮಿಸಲಾದ ಸುಮಾರು 125 ಮನೆಗಳನ್ನು ಪೇಜಾವರ ಮಠಾಧೀಶ ವಿಶ್ವೇಶತೀರ್ಥ ಸ್ವಾಮೀಜಿ ಸಾಂಕೇತಿಕವಾಗಿ ಹಕ್ಕುಪತ್ರ ನೀಡಿ ಹಸ್ತಾಂತರಿಸಿದರು.
ನೊಂದವರಿಗೆ ನೆರವು ನೀಡುವ ಉದ್ದೇಶದಿಂದ ತಾವು ಸ್ಥಾಪಿಸಿದ `ಜನತಾ ಕಲ್ಯಾಣ ನಿಧಿ~ಯ ವತಿಯಿಂದ ಈ ಮನೆಗಳನ್ನು ನಿರ್ಮಿಸಲಾಗಿದೆ. ಸಂಪೂರ್ಣ ಸಿದ್ಧಗೊಂಡ ಮನೆಯಲ್ಲಿ ಫಲಾನುಭವಿಗಳು ನೆಮ್ಮದಿಯ ಬದುಕು ಸಾಗಿಸುವಂತೆ ಪೇಜಾವರ ಶ್ರೀಗಳು ಸಲಹೆ ಮಾಡಿದರು.
