ನಮ್ಮಲ್ಲಿ ಹತ್ತಾರು ಪೇರಳೆ ತಳಿಗಳಿವೆ. ಅವುಗಳಲ್ಲಿ ಆ್ಯಪಲ್ ಪೇರಳೆಯೂ ಒಂದು. ಇದು ವಿಶಿಷ್ಟ ತಳಿ. ವರ್ಷವಿಡೀ ಫಲ ಕೊಡುತ್ತದೆ. ಇದರ ರುಚಿಯೂ ವಿಶಿಷ್ಟ.
ಇದು ನೋಡಲು ಸಣ್ಣ ಗಾತ್ರದ ಸೇಬು (ಮಿಸಿರಿ ಆ್ಯಪಲ್) ಹಣ್ಣಿನಂತೆ ಕಾಣುತ್ತದೆ. ಹೀಗಾಗಿ ಇದಕ್ಕೆ ಈ ಹೆಸರು. ಬಲಿತ ಹಣ್ಣಿನ ಬಣ್ಣ ಹಳದಿ. ಕತ್ತರಿಸಿ ನೋಡಿದರೆ ಒಳಗೆ ಕೆಂಪು ಬಣ್ಣದ ತಿರುಳು. ಕೆಲವೇ ಕೆಲವು ಸಣ್ಣ ಸಣ್ಣ ಬೀಜಗಳು. ಹಣ್ಣುಗಳು ತೀರಾ ಮೃದು. ಸಕ್ಕರೆಯಷ್ಟೇ ಸಿಹಿ.
ಈ ಪೇರಳೆ ಆರೋಗ್ಯಕ್ಕೆ ಒಳ್ಳೆಯದು. ಗಿಡ ಹೆಚ್ಚು ಎತ್ತರ ಬೆಳೆಯದ ಕಾರಣ ಮನೆಯ ಅಂಗಳದಲ್ಲಿ ನೆಡಬಹುದು. ತೋಟದ ಅಂಚಿನಲ್ಲಿ ಉಪ ಬೆಳೆಯಾಗಿ ಬೆಳೆಯಬಹುದು. ಗಿಡಗಳನ್ನು ಕಸಿ ಕಟ್ಟಿ ಬೆಳೆಸಿಕೊಳ್ಳಬಹುದು. ನಾಟಿ ಮಾಡಿದ ಎರಡು ವರ್ಷಗಳಲ್ಲಿ ಫಲ ಕೊಡುತ್ತವೆ.