ಬೆಂಗಳೂರು: ರಾಷ್ಟ್ರೀಯ ಬ್ಯಾಸ್ಕೆಟ್ಬಾಲ್ ಸಂಸ್ಥೆ (ಎನ್‌ಬಿಎ) ವತಿಯಿಂದ ಸೆಪ್ಟೆಂಬರ್ 14 ಮತ್ತು 15ರಂದು ‘ಎನ್‌ಬಿಎ ಜಾಮ್‌ 2013) ಬ್ಯಾಸ್ಕೆಟ್ಬಾಲ್ ಚಾಂಪಿಯನ್‌ಷಿಪ್‌ ಇಲ್ಲಿನ ಕಂಠೀರವ ಕ್ರೀಡಾಂಗಣದಲ್ಲಿ ನಡೆಯಲಿದೆ.
‘ಭಾರತದ 500ಕ್ಕೂ ಹೆಚ್ಚು ತಂಡಗಳು ಈ ಟೂರ್ನಿಯಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆಯಿದೆ. ಬೆಂಗಳೂರಿನಿಂದ 100 ತಂಡಗಳ 450 ಆಟಗಾರರು ಪೈಪೋಟಿ ನಡೆಸಲಿದ್ದಾರೆ. 16, 18 ಮತ್ತು 19 ರಿಂದ 23 ವರ್ಷದೊಳಗಿನವರ ವಿಭಾಗದಲ್ಲಿ ಪಂದ್ಯಗಳು ನಡೆಯಲಿವೆ. ಇದೇ ಮೊದಲ ವರ್ಷ ಮಹಿಳಾ ವಿಭಾಗದ ಪಂದ್ಯಗಳನ್ನೂ ಆಯೋಜಿಸಲಾಗಿದೆ’ ಎಂದು ಎನ್‌ಬಿಎ ಭಾರತದ ಹಿರಿಯ ನಿರ್ದೇಶಕ ಆಕಾಶ್‌ ಜೈನ್‌ ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.
ಬೆಂಗಳೂರಿನಲ್ಲಿ ಗೆಲುವು ಪಡೆಯುವ ತಂಡ ಸೆಪ್ಟೆಂಬರ್ 29ರಂದು ನಡೆಯಲಿರುವ ಫೈನಲ್‌ನಲ್ಲಿ ಮುಂಬೈ ಎದುರು ಹೋರಾಟ ನಡೆಸಲಿದೆ. ಉದ್ಯಾನನಗರಿಯಲ್ಲಿ ಎರಡು ದಿನ ಈ ಟೂರ್ನಿ ನಡೆಯಲಿರುವುದು ಬ್ಯಾಸ್ಕೆಟ್ಬಾಲ್ ಪ್ರಿಯರ ಖುಷಿಗೆ ಕಾರಣವಾಗಿದೆ.
