ಇದೋ `ಇ ಚಾಪ್ಟರ್'

ಉನ್ನತ ಶಿಕ್ಷಣ ಪಡೆಯುವ ವಿದ್ಯಾರ್ಥಿಗಳಿಗೆ ಮಾಹಿತಿಗಳನ್ನು ಕಲೆಹಾಕುವಲ್ಲಿ ಇಂಟರ್ನೆಟ್ ಪ್ರಮುಖ ಪಾತ್ರ ವಹಿಸುತ್ತದೆ. ಸಂಪರ್ಕಕ್ಕೆ, ಮಾಹಿತಿಗೆ, ಇತಿಹಾಸದ ಪುಟಗಳನ್ನು ಕೆದಕಿ ಅಧ್ಯಯನ ನಡೆಸಲು ಬೆರಳತುದಿಯ ಸ್ನೇಹಿತ ಅದು. ಕಂಪ್ಯೂಟರ್ ಮೂಲಕವೇ ಪದವಿ ಗಳಿಸುವವರ ಪಾಲಿಗೆ ಕಂಪ್ಯೂಟರ್ ಸಾಕ್ಷಾತ್ ಗುರುವಿದ್ದಂತೆ. ಇದೀಗ ಈ `ಗುರು' ತನ್ನ ವಿದ್ಯಾರ್ಥಿಗಳಿಗೆ ದೈನಂದಿನ ಪಾಠವನ್ನೇ ಮೊಗೆದುಕೊಡಲು ಸಿದ್ಧವಾಗಿದೆ.

ಅಧ್ಯಾಯವನ್ನಷ್ಟೇ ಖರೀದಿಸಿ!
ದೇಶದ ಪ್ರಮುಖ ಇ- ಬುಕ್ ರಿಟೇಲ್ ಮಳಿಗೆಗಳಲ್ಲೊಂದಾದ `ಅಟ್ಟನೊ', ಇದೇ ಮೊದಲ ಬಾರಿಗೆ ಪರಿಚಯಿಸಿರುವ `ಚಾಪ್ಟರ್ ಬೈ' ಎಂಬ ವ್ಯವಸ್ಥೆಯಂತೆ `ಇ ಬುಕ್'ಗಳಿಂದ ವಿದ್ಯಾರ್ಥಿಗಳು ತಮಗೆ ಬೇಕಾದ ಅಧ್ಯಾಯಗಳನ್ನಷ್ಟೇ ಆನ್‌ಲೈನ್‌ನಲ್ಲಿ ಖರೀದಿಸಬಹುದು. ವಿಶೇಷವಾಗಿ ಪದವಿ ಮತ್ತು ಸ್ನಾತಕೋತ್ತರ ಪದವಿ, ಮ್ಯಾನೇಜ್‌ಮೆಂಟ್, ಎಂಜಿನಿಯರಿಂಗ್, ಕಲೆ, ವಾಣಿಜ್ಯ ಹಾಗೂ ವಿಜ್ಞಾನ ವಿಷಯಗಳಲ್ಲದೆ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೂ ಇದರಿಂದ ಅನುಕೂಲವಾಗಲಿದೆ.

ಪ್ರತಿ ವಿಷಯಕ್ಕೂ (ಸಬ್ಜೆಕ್ಟ್) ಬೇರೆ ಬೇರೆ ಪುಸ್ತಕಗಳನ್ನು ಖರೀದಿಸಿ, ಗ್ರಂಥಾಲಯದಿಂದ ಪಡೆದು ಅಥವಾ ಸ್ನೇಹಿತರಿಂದ ದಿನದ ಮಟ್ಟಿಗೆ ಪಡೆದುಕೊಂಡು ತಮಗೆ ಬೇಕಾದ ಮಾಹಿತಿಗಾಗಿ ಇಡೀ ಪುಸ್ತಕವನ್ನು ಜಾಲಾಡುವ ಬದಲು, ಯಾವ ವಿಷಯ ಮತ್ತು ಯಾವ ಅಧ್ಯಾಯ ಎಂಬುದನ್ನು ನಮೂದಿಸಿ ಡೌನ್‌ಲೋಡ್ ಮಾಡಿಕೊಳ್ಳುವ ಸುಲಭ ಸೌಕರ್ಯ `ಚಾಪ್ಟರ್ ಬೈ'ನಲ್ಲಿದೆ.

ಇದರ ಬಗ್ಗೆ `ಅಟ್ಟನೊ'ದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಸೌಮ್ಯಾ ಬ್ಯಾನರ್ಜಿ ಹೀಗೆ ಮಾಹಿತಿ ಕೊಡುತ್ತಾರೆ: `ಆಧುನಿಕ ತಂತ್ರಜ್ಞಾನ ಗ್ರಾಮೀಣ ಪ್ರದೇಶದ ವಿದ್ಯಾರ್ಥಿಗಳಿಗೂ ಪ್ರಪಂಚದ ಯಾವುದೋ ಮೂಲೆಯಲ್ಲಿನ ಆಗುಹೋಗುಗಳನ್ನು ಬೆರಳತುದಿಯಲ್ಲಿ ಸಿಗುವಂತೆ ಮಾಡಿದೆ. ಆದರೆ ಪಠ್ಯಪುಸ್ತಕಗಳ ವಿಚಾರಕ್ಕೆ ಬಂದರೆ ಅದೇ ಹಳೆಯ ಮಾದರಿಯಲ್ಲೇ ಇದ್ದೇವೆ. ದೊಡ್ಡ ದೊಡ್ಡ ಪುಸ್ತಕಗಳನ್ನು ಹೊರುವುದು, ಮಾಹಿತಿಗಾಗಿ ಪುಟಗಳನ್ನು ಮಗುಚಿ ಮಗುಚಿ ಸಮಯ ವ್ಯರ್ಥಗೊಳಿಸುವುದು ಇತ್ಯಾದಿ.