ವಾಷಿಂಗ್ಟನ್(ಪಿಟಿಐ): ಇಲಿ-ಹೆಗ್ಗಣಗಳಿಂದ ಹರಡುವ ಮಾರಕ ಪಿಡುಗುಗಳ ಬಗ್ಗೆ ಮೊದಲೇ ಪತ್ತೆಮಾಡಿ ಮುನ್ನೆಚ್ಚರಿಕೆ ನೀಡಲು ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ‘ನಾಸಾ’ದ ಕೃತಕ ಉಪಗ್ರಹ ನೆರವಾಗಲಿದೆ.
ಅಮೆರಿಕದ ಉಟಾ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಈ ಬಗ್ಗೆ ವಿಶೇಷ ಅಧ್ಯಯನ ನಡೆಸಿದ್ದಾರೆ. ಉಪಗ್ರಹ ರವಾನಿಸುವ ಚಿತ್ರಗಳಲ್ಲಿ ದಾಖಲಾಗುವ ಕಾಡು ಮತ್ತಿತರ ಹಸಿರು ಪ್ರದೇಶದ ಏರಿಕೆ ಮತ್ತು ಇಳಿಕೆಯ (ಸಮೃದ್ಧಿ-ಬರಗಾಲ) ಅಧ್ಯಯನದಿಂದ ಮೂಷಿಕ ವರ್ಗಗಳಿಂದ ಹರಡುವ ರೋಗಗಳನ್ನೂ ಪತ್ತೆ ಮಾಡಬಹುದು ಎಂದು ತಿಳಿಸಿದ್ದಾರೆ.
ಕೇವಲ ಇಲಿ-ಹೆಗ್ಗಣಗಳಿಗೆ ಮಾತ್ರ ಇದು ಸೀಮಿತ ಅಲ್ಲ. ಇತರ ಪ್ರಾಣಿಗಳ ವಂಶವೃದ್ಧಿಯ ಬಗ್ಗೆಯ ಮಾಹಿತಿಗೂ ಈ ವಿಧಾನವನ್ನು ಅನುಸರಿಸಬಹುದು ಎಂದು ಸಮೀಕ್ಷಾ ವರದಿಯ ಸಹ ಸಂಪಾದಕ ಡೆನಿಸ್ ಡೇರಿಂಗ್ ಹೇಳುತ್ತಾರೆ.