ಬೆಂಗಳೂರು: `ಕೈಗಾರಿಕೆಗಳ ವಿಸ್ತರಣಾ ಯೋಜನೆಗೆ ಕೆಲವು ರಿಯಾಯಿತಿಗಳನ್ನು ನೀಡುವಂತೆ ಉದ್ದಿಮೆದಾರರು ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದಾರೆ. ಈ ಕುರಿತು ಪರಿಶೀಲಿಸಲಾಗುತ್ತಿದೆ~ ಎಂದು ಮುಖ್ಯಮಂತ್ರಿ ಡಿ.ವಿ.ಸದಾನಂದ ಗೌಡ ಸೋಮವಾರ ಇಲ್ಲಿ ತಿಳಿಸಿದರು.
ಮಂಗಳೂರಿನ ಎಂಆರ್‌ಪಿಎಲ್, ನಂಜನಗೂಡಿನ ನೆಸ್ಲೆ ಇಂಡಿಯಾ, ಧಾರವಾಡದ ಟಾಟಾ ಮೋಟಾರ್ಸ್‌, ಹೀರೊ ಮೋಟೊಕಾರ್ಪ್ ಸೇರಿದಂತೆ ಐದು ಕಂಪೆನಿಗಳು ತಮ್ಮ ಕೈಗಾರಿಕೆಗಳ ವಿಸ್ತರಣಾ ಯೋಜನೆಗೆ ರಿಯಾಯಿತಿ ನೀಡುವಂತೆ ಸರ್ಕಾರಕ್ಕೆ ಮನವಿ ಮಾಡಿವೆ.
ಈ ಕುರಿತು ಚರ್ಚಿಸಲು ಮುಖ್ಯಮಂತ್ರಿ ನೇತೃತ್ವದಲ್ಲಿ ಉನ್ನತ ಮಟ್ಟದ ಸಭೆ ನಡೆಯಿತು. ಕೈಗಾರಿಕೆಗಳ ವಿಸ್ತರಣೆಗೆ ಯಾವ ರಿಯಾಯಿತಿಗಳನ್ನು ನೀಡಬಹುದು ಎಂಬುದರ ಬಗ್ಗೆ ಸಭೆಯಲ್ಲಿ ಚರ್ಚೆ ನಡೆಸಲಾಗಿದೆ.
ಆದರೆ, ಯಾವುದೇ ಅಂತಿಮ ನಿರ್ಧಾರ ಕೈಗೊಂಡಿಲ್ಲ ಎಂದು ಮುಖ್ಯಮಂತ್ರಿ ಸದಾನಂದ ಗೌಡ ಸುದ್ದಿಗಾರರಿಗೆ ವಿವರಿಸಿದರು.
`ಕೈಗಾರಿಕೆಗಳಿಗೆ ರಿಯಾಯಿತಿ ನೀಡುವುದರಿಂದ ಹೆಚ್ಚು ಹೂಡಿಕೆ ನಿರೀಕ್ಷಿಸಬಹುದು.ಉದ್ಯೋಗ ಸೃಷ್ಟಿಯೂ ಆಗುತ್ತದೆ. ತುಸು ರಿಯಾಯಿತಿ ನೀಡುವುದರಿಂದ ಸರ್ಕಾರದ ಬೊಕ್ಕಸಕ್ಕೆ ದೊಡ್ಡ ನಷ್ಟ ಆಗುವುದಿಲ್ಲ. ಮತ್ತೊಮ್ಮೆ ಸಭೆ ಸೇರಿ ರಿಯಾಯಿತಿ ಕುರಿತು ಸೂಕ್ತ ತೀರ್ಮಾನ ತೆಗೆದುಕೊಳ್ಳಲಾಗುವುದು~ ಎಂದು ಅವರು ಹೇಳಿದರು.
