ಏ.1ರಿಂದ ಕಸ ತೆರಿಗೆ ವಸೂಲಿ

ಪ್ರತಿ ತಿಂಗಳು ಗ್ರಾಹಕರಿಂದ ವಸೂಲಿ ಮಾಡಿದ ಹಣದಲ್ಲಿ ₨ 8900 ಮೊತ್ತವನ್ನು ನಗರಸಭೆಗೆ ಭರಣ ಮಾಡುವಂತೆ ಸೂಚಿಸಲಾಗಿತ್ತು. ಆದರೆ ಈ ಸಂಸ್ಥೆ ಗ್ರಾಹಕರಿಂದ ಸಕಾಲಕ್ಕೆ ಹಣ ವಸೂಲಿ, ಇಂಧನ ವೆಚ್ಚ ಭರಿಸುವುದು ಕಷ್ಟವಾಗುತ್ತಿದ್ದು, ನಿರ್ವಹಣೆ ಸಾಧ್ಯವಿಲ್ಲವೆಂದು ಕೆಲಸ ಸ್ಥಗಿತಗೊಳಿಸಿದೆ’ ಎಂದು ಪೌರಾಯುಕ್ತ ಕೆ.ಬಿ.ವೀರಾಪುರ ಸಭೆಗೆ ತಿಳಿಸಿದರು.

‘ಪ್ರಸ್ತುತ ನಗರದಲ್ಲಿ ಕಸ ವಿಲೇವಾರಿ ಸಮಸ್ಯೆ ದೊಡ್ಡದಾಗಿದ್ದು, ಜನರಿಗೆ ಉತ್ತರ ನೀಡಲಾಗದೆ ಮೊಬೈಲ್‌ ಸ್ವಿಚ್‌ ಆಫ್‌ ಮಾಡಿದ್ದೇವೆ. ಆದಷ್ಟು ಶೀಘ್ರ ನಗರಸಭೆ ಕಸದ ಸಮಸ್ಯೆ ಬಗೆಹರಿಸಬೇಕು’ ಎಂದು ಸದಸ್ಯ ಜಗದೀಶ ಗೌಡ ಹೇಳಿದರು. ‘ಟೆಂಡರ್‌ ಪಡೆಯುವಾಗ ಏಜೆನ್ಸಿಗೆ ನಷ್ಟವಾಗುವ ಅರಿವಿರಲಿಲ್ಲವೇ? ಕಸ ಸಂಗ್ರಹಿಸುವ ಏಜೆನ್ಸಿಯವರು ಬಿಲ್‌ ವಸೂಲಿಗೆ ನಿಯಮಿತವಾಗಿ ಬರುವುದಿಲ್ಲ. ಎಲ್ಲ ಕಡೆಗಳಲ್ಲಿ ಕಸ ಸಂಗ್ರಹಣೆ ಸಮರ್ಪಕವಾಗಿ ಆಗುತ್ತಿಲ್ಲ.

ತಿಂಗಳ ಬಾಡಿಗೆ ಹಣ ₨ 20 ಪಡೆಯಲು ಬೈಕ್‌ ಮೇಲೆ ಬರುವಾಗ ಅವರಿಗೆ ನಷ್ಟ ಕಾಣಿಸುವುದಿಲ್ಲವೇ’ ಎಂದು ಸದಸ್ಯರಾದ ನಂದಾ ನಾಯ್ಕ, ರಾಕೇಶ ತಿರುಮಲೆ, ಫ್ರಾನ್ಸಿಸ್ ಫರ್ನಾಂಡಿಸ್‌ ಇತರರು ಪ್ರಶ್ನಿಸಿದರು. ‘ನಗರದ 31 ವಾರ್ಡ್‌ಗಳ ಕಸ ವಿಲೇವಾರಿಯನ್ನು 2–3 ಪ್ರತ್ಯೇಕ ಏಜೆನ್ಸಿಗೆ ಟೆಂಡರ್‌ ನೀಡುವುದರಿಂದ ತೊಂದರೆ ಆಗಲಾರದು’ ಎಂದು ಸದಸ್ಯ ಅರುಣ ಕೋಡ್ಕಣಿ ಹೇಳಿದರು. ‘ಘನತ್ಯಾಜ್ಯ ನಿರ್ವಹಣೆಗೆ ಗಂಭೀರ ಸಮಸ್ಯೆಯಾಗಿದ್ದು, ಪ್ರತ್ಯೇಕ ಅಧಿಕಾರಿ ನೇಮಿಸಬೇಕು’ ಎಂದು ಅರುಣ ಪ್ರಭು ಹೇಳಿದರು.

ಪ್ರಸ್ತುತ ಎದುರಾಗಿರುವ ತೊಂದರೆಯನ್ನು ಶೀಘ್ರ ನಿವಾರಿಸಲು ಹಾಲಿ ಕೆಲಸ ನಿರ್ವಹಿಸುತ್ತಿರುವ ಏಜೆನ್ಸಿಗೆ ನಗರಸಭೆ ನಾಲ್ಕು ತಿಂಗಳಿಂದ ನೀಡುತ್ತಿರುವ ₨ 63ಸಾವಿರ ಹಣದ ಜೊತೆಗೆ ಹೆಚ್ಚುವರಿ ₨ 25ಸಾವಿರ ನೀಡಿ ಮಾರ್ಚ್‌ 31ರವರೆಗೆ ಇದೇ ವ್ಯವಸ್ಥೆ ಮುಂದುವರಿಸಲು ಸಭೆ ನಿರ್ಣಯಿಸಿತು. ಈ ಅವಧಿ ಮುಗಿಯುವ ಒಳಗಾಗಿ ಹೊಸ ಟೆಂಡರ್‌ ಪ್ರಕ್ರಿಯೆ ಪೂರ್ಣಗೊಳಿಸಲು ಚರ್ಚಿಸಲಾಯಿತು.