ನವದೆಹಲಿ (ಪಿಟಿಐ): ತೀವ್ರ ಸ್ವರೂಪದ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿರುವ ಸರ್ಕಾರಿ ಸ್ವಾಮ್ಯದ ವಿಮಾನ ಯಾನ ಸಂಸ್ಥೆ ಏರ್ ಇಂಡಿಯಾ, ಅಲ್ಪಾವಧಿ ದೂರದ ಪ್ರಯಾಣ ಸಂದರ್ಭದಲ್ಲಿ ಪ್ರಯಾಣಿಕರಿಗೆ ಬಿಸಿ, ಬಿಸಿ ಆಹಾರ ಪೂರೈಸುವುದನ್ನು ಸ್ಥಗಿತಗೊಳಿಸಿದೆ.
ಈ ನಿರ್ಬಂಧವು ಫೆಬ್ರುವರಿ 1ರಿಂದಲೇ ಜಾರಿಗೆ ಬಂದಿದೆ.
ಒಂದು ಗಂಟೆಯಿಂದ ಒಂದೂವರೆ ಗಂಟೆ ಅವಧಿ ಒಳಗಿನ ಕಡಿಮೆ ದೂರದ ಪ್ರಯಾಣ ಸಂದರ್ಭದಲ್ಲಿ ಬಿಸಿ ಆಹಾರ ಬದಲಿಗೆ ಈ ಮೊದಲೇ ಪ್ಯಾಕ್ ಮಾಡಲಾಗಿದ್ದ ಕುರುಕಲು ತಿಂಡಿ, ನೀರು ಮತ್ತು ಟೆಟ್ರಾಪ್ಯಾಕ್‌ನಲ್ಲಿ ಹಣ್ಣಿನ ರಸ ನೀಡಲು ನಿರ್ಧರಿಸಿದೆ.
ಕಾಫಿ ಅಥವಾ ಚಹವನ್ನು ಕೋರಿಕೆ ಮೇರೆಗೆ ನೀಡಲಿದೆ. ಪ್ರಯಾಣದ ಅವಧಿ ಒಂದೂವರೆ ಗಂಟೆ ( 90 ನಿಮಿಷ) ಇದ್ದರೆ, ಸ್ಯಾಂಡ್‌ವಿಚ್ ಜತೆಗೆ ಕಾಫಿ ಅಥವಾ ಚಹ ಪೂರೈಸಲಾಗುವುದು.
ಎಕ್ಸಿಕ್ಯುಟಿವ್ ಕ್ಲಾಸ್‌ನ ಪ್ರಯಾಣಿಕರಿಗೆ ಈ ನಿರ್ಬಂಧ ಅನ್ವಯಿಸಲಾರದು. ಅವರಿಗೆ ಈ ಮೊದಲಿನಂತೆಯೇ ಬಿಸಿ ಆಹಾರ ನೀಡಲಾಗುವುದು.
