ನವದೆಹಲಿ (ಪಿಟಿಐ): `ಹಲವು ವಿವಾದಗಳ ಮೂಲಕ ಕ್ರಿಕೆಟ್‌ಗೆ ಕೆಟ್ಟ ಹೆಸರು ತರುತ್ತಿರುವ ಐಪಿಎಲ್ ಟೂರ್ನಿಯನ್ನು ನಿಷೇಧಿಸಬೇಕು~ ಎಂದು ಆಗ್ರಹಿಸಿರುವ ಮಾಜಿ ಕ್ರಿಕೆಟಿಗ ಹಾಗೂ ಸಂಸದ ಕೀರ್ತಿ ಆಜಾದ್ ಭಾನುವಾರ ಉಪವಾಸ ಆರಂಭಿಸಿದ್ದಾರೆ.
ಫಿರೋಜ್ ಷಾ ಕೋಟ್ಲಾ ಕ್ರೀಡಾಂಗಣದ ಹೊರಗೆ ಉಪವಾಸ ಆರಂಭಿಸಿರುವ ಆಜಾದ್, `ಕ್ರಿಕೆಟ್ ವೀಕ್ಷಿಸುತ್ತಿರುವ ಎಲ್ಲರಿಗೂ ನನ್ನದೊಂದು ಪ್ರಶ್ನೆ. ಇಲ್ಲಿ ಪಾರದರ್ಶಕತೆ ಬೇಡವೇ? ಕ್ರೀಡೆಯಲ್ಲಿ ತುಂಬಾ ರಾಜಕೀಯವಿದೆ. ಅದರಲ್ಲೂ ಐಪಿಎಲ್ ಟೂರ್ನಿ ಬಾಲಿವುಡ್ ಸಿನಿಮಾದ ಕಥಾವಸ್ತುವಿನಂತಾಗಿದೆ. ಸಿನಿಮಾದಲ್ಲಿರುವ ನಟ, ನಟಿ, ಖಳನಾಯಕ, ಕಪ್ಪುಹಣ, ಮಾನಭಂಗ, ಅತ್ಯಾಚಾರ. ಮೋಸದಾಟ, ದುರಾಸೆ ಐಪಿಎಲ್‌ನಲ್ಲೂ ಇವೆ~ ಎಂದಿದ್ದಾರೆ.
