ಅಬುಜಾ (ಪಿಟಿಐ): ಜರ್ಮನಿಯ ತೈಲ ಟ್ಯಾಂಕರ್ ಮೇಲೆ ದಾಳಿ ಮಾಡಿದ ಕಡಲ್ಗಳ್ಳರು ಅದರಲ್ಲಿದ್ದ ಐವರು ಭಾರತೀಯ ಸಿಬ್ಬಂದಿಯನ್ನು ಅಪಹರಿಸಿರುವ ಘಟನೆ ನೈಜೀರಿಯಾ ಕರಾವಳಿಯಲ್ಲಿ ನಡೆದಿದೆ.
`ಮೆಡಾಲಿಯನ್ ಮರೈನ್'ಗೆ ಸೇರಿದ ಎಸ್ಪಿ ಬ್ರುಸೆಲ್ಸ್ ಟ್ಯಾಂಕರ್ ಮೇಲೆ ಸೋಮವಾರ ಕಡಲ್ಗಳ್ಳರು ದಾಳಿ ಮಾಡಿದ್ದು, ಅಲ್ಲಿಂದ ನಿರ್ಗಮಿಸುವಾಗ ಐವರು ಭಾರತೀಯರನ್ನು ಅಪಹರಿಸಿದ್ದಾರೆ.
`ಅಪಹೃತರ ಬಿಡುಗಡೆಗೆ ಸಾಧ್ಯವಿರುವ ಎಲ್ಲ ಪ್ರಯತ್ನಗಳನ್ನು ಮಾಡಲಾಗುವುದು. ತೈಲ ಸಾಗಿಸುವ ಹಡಗು ನಂತರ ಲಾಗೋಸ್ ಬಂದರಿಗೆ ಆಗಮಿಸಿದ್ದು, ಉಳಿದ ಸಿಬ್ಬಂದಿ ಸುರಕ್ಷಿತವಾಗಿದ್ದಾರೆ' ಎಂದು `ಮೆಡಾಲಿಯನ್ ಮರೈನ್' ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ನೈಜೀರಿಯಾದಲ್ಲಿ, ಅದರಲ್ಲೂ ಪ್ರಮುಖವಾಗಿ ತೈಲ ಉತ್ಪಾದನಾ ವಲಯದಲ್ಲಿ ಕಡಲ್ಗಳ್ಳತನ ಹಾಗೂ ಕಳವು ನಿರಂತರವಾಗಿ ನಡೆಯುತ್ತಿದೆ.