ಕೆಜಿಎಫ್‌: ಮಕ್ಕಳಲ್ಲಿ ಅಡಗಿರುವ ಪರಿಪೂರ್ಣತೆ ಅಭಿವ್ಯಕ್ತಿಯಾಗಬೇಕು. ಪಠ್ಯಕ್ರಮದಲ್ಲಿರುವ ಪಾಠಗಳನ್ನು ಓರೆಗಚ್ಚಿ ನೋಡುವ ವೇದಿಕೆ ಮಕ್ಕಳಿಗೆ ಸಿಗಬೇಕು. ಮೂವತ್ತೊಂದು ವಿಷಯಗಳ ಕಲಿಕೋತ್ಸವ ಈ ನಿಟ್ಟಿನಲ್ಲಿ ಮಕ್ಕಳಿಗೆ ಉತ್ತಮ ವೇದಿಕೆ ಎಂದು ಶಿಕ್ಷಣ ಇಲಾಖೆಯ ಸಮನ್ವಯ ಅಧಿಕಾರಿ ಬಿ.ಜಿ.ನಾರಾಯಣಸ್ವಾಮಿ ತಿಳಿಸಿದರು.
ಬೆಮಲ್‌ ನಗರದಲ್ಲಿ ಗುರುವಾರ ನಡೆದ ಕಲಿಕೋತ್ಸವ ಉದ್ಘಾಟಿಸಿ ಅವರು ಮಾತನಾಡಿದರು.
ಕ್ಷೇತ್ರ ಸಂಪನ್ಮೂಲ ಅಧಿಕಾರಿ ನಾಗರಾಜಾಚಾರಿ ಮಾತನಾಡಿ, ಖಾಸಗಿ ಶಾಲೆಗಳಿಗೆ ಪೈಪೋಟಿ ನೀಡುವಂತೆ ಸರ್ಕಾರಿ ಶಾಲೆಗಳು ಪಠ್ಯ ಮತ್ತು ಪಠ್ಯೇತರ ಚಟುವಟಿಕೆ ನಡೆಸಬೇಕು. ಮಕ್ಕಳಿಗೆ ಗುಣಾತ್ಮಕ ಶಿಕ್ಷಣ ನೀಡಬೇಕು ಎಂದರು.
ನಗರಸಭೆ ಸದಸ್ಯೆ ಉಮಾ, ಪ್ರಾಂಶುಪಾಲ ಸುಬ್ರಹ್ಮಣಿ ಮಾತನಾಡಿದರು. 360 ವಿದ್ಯಾರ್ಥಿಗಳು ವಿವಿಧ ಕಲೆಗಳ ಪ್ರದರ್ಶನ ಮಾಡಿದರು.
ಶಿಕ್ಷಣ ಇಲಾಖೆ ಅಧಿಕಾರಿಗಳಾದ ಮಂಜುನಾಥಾಚಾರಿ, ರುಕ್ಮಿಣಮ್ಮ, ಸ್ಟೆಲ್ಲಾ, ಗೋವಿಂದರಾಜು, ನಾಟೀಕರ್‌, ನಾರಾಯಣಸ್ವಾಮಿ, ಹೇಮಂತ್‌ಕುಮಾರ್‌ ಹಾಜರಿದ್ದರು. ಶ್ರೀದೇವಿ ಸ್ವಾಗತಿಸಿದರು. ಶಶಿಧರ್‌ ವಂದಿಸಿದರು. ಶ್ರೀನಿವಾಸ್‌ ನಿರೂಪಿಸಿದರು.
