`ಮಾನವೀಕರಿಸಿ ಜಗವ, ಮಕ್ಕಳೀಕರಿಸಿ ಜಗವ~ ಎನ್ನುವ ಧ್ಯೇಯವನ್ನಿಟ್ಟುಕೊಂಡು ಮಕ್ಕಳಿಗಾಗಿ ಒಂದು ಸಿನಿಮಾ ರಚನೆಯಾಗಿದೆ. 26 ನಿಮಿಷಗಳ ಸಿನಿಮಾದಲ್ಲಿ ಬಾಲ ಕಾರ್ಮಿಕ ಮಕ್ಕಳ ನೋವು, ಸಂಕಟ, ಆ ಕಾರ್ಯಕ್ಕೆ ನೂಕಿದವರಿಗೆ ಒಂದು ನೀತಿ ಪಾಠ ಅಡಗಿದೆ.
`ಟ್ವಿನ್ಸ್ ರಿವೀಲಿಂಗ್ ದಿ ಮಿಥ್ ಆಫ್ ಚೈಲ್ಡ್ ಲೇಬರ್~ ಚಿತ್ರ ಬಾಲ ಕಾರ್ಮಿಕ ಮಕ್ಕಳ ಬವಣೆಗಳನ್ನು ಚಿತ್ರಿಸುತ್ತದೆ. ಕಲಾನಿರ್ದೇಶಕ ಜಾನ್ ದೇವರಾಜ್ ನಿರ್ದೇಶನದಲ್ಲಿ ಮೂಡಿಬಂದಿರುವ ಈ ಚಿತ್ರವನ್ನು ಇಬ್ಬರು ಮಕ್ಕಳ ಜೀವನದ ಸುತ್ತ ಹೆಣೆಯಲಾಗಿದೆ.
`ಉಳ್ಳವರ ಮಕ್ಕಳಂತೇ ಇತರ ಮಕ್ಕಳನ್ನೂ ಕಾಣಬೇಕು. ಮಕ್ಕಳನ್ನು ದುಡಿಸಿಕೊಳ್ಳುವ ಮಾಲೀಕರು ಮಾನವೀಯತೆಯನ್ನು ಕಳೆದುಕೊಂಡಿದ್ದಾರೆ. ಅಂಥವರ ಮನಃ ಪರಿವರ್ತನೆಯಾಗಬೇಕು. ಅದು ಮಕ್ಕಳಿಂದ ಮಾತ್ರ ಸಾಧ್ಯ. ಅವರ ಕಷ್ಟಗಳಿಗೆ ಸಿರಿವಂತ ಮಕ್ಕಳೇ ಸ್ಪಂದಿಸಬೇಕು. ಎಲ್ಲರೂ ಎಲ್ಲರಿಂದಲೂ ಕಲಿಯುವಂತಾಗಬೇಕು ಎಂಬುದು ಈ ಚಿತ್ರದ ಉದ್ದೇಶ~ ಎನ್ನುತ್ತಾರೆ ಜಾನ್ ದೇವರಾಜ್.