ಮುಂಬೈ (ಪಿಟಿಐ): ಕಿಂಗ್ಫಿಷರ್ ಏರ್ಲೈನ್ಸ್ ಬಾಕಿ ಉಳಿಸಿಕೊಂಡಿದ್ದ 10 ತಿಂಗಳ ವೇತನದಲ್ಲಿ 2 ತಿಂಗಳ ವೇತನವನ್ನು ಸಿಬ್ಬಂದಿಗಳಿಗೆ ಬುಧವಾರ ಪಾವತಿಸಿದೆ.
`ಐಪಿಎಲ್' ಕ್ರಿಕೆಟ್ ಆರಂಭವಾಗಿರುವ ಹಿನ್ನೆಲೆಯಲ್ಲಿ ವಿಜಯ್ ಮಲ್ಯ, ಕಿಂಗ್ಫಿಷರ್ ಸಿಬ್ಬಂದಿಗೆ ವೇತನ ಪಾವತಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಆದರೆ, ಈಗ ಪಾವತಿಸಿರುವ ವೇತನ ಯಾವ ತಿಂಗಳಿಗೆ ಸೇರಿದ್ದು ಎನ್ನುವ ಬಗ್ಗೆ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ.
ಸಾಲಕ್ಕೆ ಭದ್ರತೆಯಾಗಿ ನೀಡಿದ್ದ `ಯುನೈಟೆಡ್ ಸ್ಪಿರಿಟ್' ಷೇರುಗಳನ್ನು ಮಾರಾಟ ಮಾಡದಂತೆ ಬ್ಯಾಂಕ್ಗಳಿಗೆ ತಡೆಯೊಡ್ಡಬೇಕೆಂಬ ಕಿಂಗ್ಫಿಷರ್ ಏರ್ಲೈನ್ಸ್ ಮನವಿಯನ್ನು ಮುಂಬೈ ಹೈಕೋರ್ಟ್ ಮಂಗಳವಾರ ತಳ್ಳಿ ಹಾಕಿತ್ತು. ಅದರ ಬೆನ್ನಲ್ಲೇ ವೇತನ ಪಾವತಿಯಾಗಿರುವುದು ವಿಶೇಷ.
`ಫಾರ್ಮುಲಾ-1' ರೇಸ್ ನಡೆದಾಗ ಸಿಬ್ಬಂದಿ ಪ್ರತಿಭಟನೆ ನಡೆಸಿದ್ದರು. ಇದಕ್ಕೆ ಮಣಿದ ಆಡಳಿತ ಮಂಡಳಿ ಒಂದು ತಿಂಗಳ ವೇತನ ಪಾವತಿಸಿತ್ತು. ಈಗ `ಐಪಿಎಲ್' ವೇಳೆ ಮತ್ತೆ ಪ್ರತಿಭಟನೆ ನಡೆಯಬಹುದು ಎಂಬ ಶಂಕೆಯಿಂದ 2 ತಿಂಗಳ ಬಾಕಿ ಪಾವತಿಸಲಾಗಿದೆ ಎಂದು ಕಿಂಗ್ಫಿಷರ್ ಎಂಜಿನಿಯರ್ಸ್ ಒಕ್ಕೂಟದ ಸದಸ್ಯ ಎಸ್.ಸಿ ಮಿಶ್ರಾ ಸುದ್ದಿಸಂಸ್ಥೆಗೆ ಪ್ರತಿಕ್ರಿಯಿಸಿದ್ದಾರೆ.