ವಾಷಿಂಗ್ಟನ್ (ಪಿಟಿಐ): ಅಮೆರಿಕ ಸೆನೆಟ್ನ ವಿದೇಶಾಂಗ ವ್ಯವಹಾರ ಸಮಿತಿ ಅಧ್ಯಕ್ಷರಾದ 69 ವರ್ಷದ ಜಾನ್ ಕೆರ್ರಿ ಅವರನ್ನು ಬಹು ಮಹತ್ವದ ವಿದೇಶಾಂಗ ಕಾರ್ಯದರ್ಶಿ ಹುದ್ದೆಗೆ ಅಧ್ಯಕ್ಷ ಬರಾಕ್ ಒಬಾಮ ನಾಮಕರಣ ಮಾಡುವ ಸಾಧ್ಯತೆಯಿದೆ.
ಈ ಹಿಂದೆ ಹಲವು ಬಾರಿ ಒಬಾಮ ಆಡಳಿತ ಸಂಕಷ್ಟಕ್ಕೆ ಸಿಲುಕಿದಾಗಲೆಲ್ಲ ಜಾನ್ ಕೆರ್ರಿ ಆಪದ್ಬಾಂಧವನ ರೀತಿ ನಡೆದುಕೊಂಡಿದ್ದಾರೆ. ಅವರು ಪಾಕಿಸ್ತಾನದ ಜತೆ ಅಮೆರಿಕ ಸಂಬಂಧ ಹದಗೆಟ್ಟಾಗಲೆಲ್ಲ ಆ ದೇಶಕ್ಕೆ ತೆರಳಿ ಸಂಬಂಧ ಸುಧಾರಣೆಗೆ ಒತ್ತು ನೀಡಿದ್ದಾರೆ. ಮೆಸಾಚುಸೆಟ್ಸ್ ಸೆನೆಟ್ ಸದಸ್ಯರಾಗಿರುವ ಜಾನ್ ಕೆರ್ರಿ ಅವರ ಹೆಸರನ್ನು ವಿದೇಶಾಂಗ ಕಾರ್ಯದರ್ಶಿ ಹುದ್ದೆಗೆ ಮುಂದಿನ ವಾರ ಪ್ರಕಟಿಸುವ ಸಂಭವವಿದೆ.