ನವದೆಹಲಿ (ಪಿಟಿಐ): ನಕಲಿ ಮತ್ತು ಕಳಪೆ ಗುಣಮಟ್ಟದ ಚಿನ್ನಾಭರಣ ವಹಿವಾಟು ತಡೆಯಲು ಹಾಗೂ ಸುರಕ್ಷತೆ ಖಾತರಿಗೊಳಿಸಲು ಚಿನ್ನಾಭರಣಗಳಿಗೆ ಬಿಐಎಸ್ `ಹಾಲ್‌ಮಾರ್ಕ್~ ಹಾಕುವುದನ್ನು ಸರ್ಕಾರ ಕಡ್ಡಾಯಗೊಳಿಸಿದೆ.
ಇಲ್ಲಿಯವರೆಗೆ ಚಿನ್ನಾಭರಣ ವರ್ತಕರು ಸ್ವಯಂಪ್ರೇರಿತವಾಗಿ `ಹಾಲ್‌ಮಾರ್ಕ್~ ಹಾಕುತ್ತಿದ್ದರು. ಆದರೆ, ಇನ್ನು ಮುಂದೆ ಇದು ಕಡ್ಡಾಯವಾಗಲಿದೆ. `ಹಾಲ್‌ಮಾರ್ಕ್~ ಕಡ್ಡಾಯಗೊಳಿಸೇಕು ಎನ್ನುವ ಪ್ರಸ್ತಾವಕ್ಕೆ ಬುಧವಾರ ಮನಮೋಹನ್ ಸಿಂಗ್ ಅಧ್ಯಕ್ಷತೆಯಲ್ಲಿನ ಕೇಂದ್ರ ಸಚಿವ ಸಂಪುಟವು ಅನುಮೋದನೆ ನೀಡಿದೆ.
ಗ್ರಾಹಕ ವ್ಯವಹಾರಗಳ ಸಚಿವಾಲಯದ ಅಧೀನದಲ್ಲಿ ಬರುವ ಭಾರತೀಯ ಮಾನದಂಡ ಮಂಡಳಿ (ಬಿಐಎಸ್) `ಹಾಲ್‌ಮಾರ್ಕ್~ ನೀಡುವ ಅಧಿಕಾರ ಹೊಂದಿದೆ.
`ಬಿಐಎಸ್~ ಕಾಯ್ದೆ 1986ರ ಅಡಿ ಸದ್ಯ ಸಿಮೆಂಟ್, ಶುದ್ಧೀಕರಿಸಿದ ನೀರು, ಹಾಲಿನ ಉತ್ಪನ್ನಗಳು ಸೇರಿದಂತೆ 77 ಸರಕುಗಳಿಗೆ `ಹಾಲ್‌ಮಾರ್ಕ್~ ಕಡ್ಡಾಯಗೊಳಿಸಲಾಗಿದೆ.
