ಬೀಜಿಂಗ್(ಐಎಎನ್ಎಸ್/ಇಎಫ್ಒ): ಇಲ್ಲಿನ ಶಾಂಘೈ ಪ್ರದೇಶದಲ್ಲಿ ಕಳೆದ ತಿಂಗಳು ಕಾಣಿಸಿಕೊಂಡ ಹೊಸ ರೀತಿಯ ಹಕ್ಕಿಜ್ವರದಿಂದಾಗಿ ಮೃತಪಟ್ಟವರ ಸಂಖ್ಯೆ 10ಕ್ಕೆ ಏರಿದೆ.
ಶಾಂಘೈನಲ್ಲಿ ಕಾಣಿಸಿಕೊಂಡ ಈ ಸೋಂಕು 38 ಜನರಿಗೆ ತಗುಲಿತ್ತು. ಇವರಲ್ಲಿ 28 ಜನರು ಬದುಕುಳಿದಿದ್ದಾರೆ. ಆದರೆ, ಇವರ ಪೈಕಿ ಪೂರ್ಣ ಗುಣಮುಖ ಆಗಿರುವುದು ನಾಲ್ಕು ವರ್ಷದ ಒಬ್ಬ ಬಾಲಕ ಮಾತ್ರ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ರೋಗಕ್ಕೆ ತುತ್ತಾದವರು ಶಾಂಘೈ, ಜಿಯಾಂಗ್ಸು, ಝೀಜಿಯಾಂಗ್ ಮತ್ತು ಆನ್ಹುಯಿ ಪ್ರದೇಶದ ಪೂರ್ವ ಭಾಗದವರು.
ಸೋಂಕು ತಗುಲಿದವರ ಜತೆ ಸಂಪರ್ಕ ಹೊಂದಿರುವವರಿಗೆ ಯಾವುದೇ ಸಮಸ್ಯೆಯಾಗಿಲ್ಲ ಎಂದು ಚೀನಾದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ತಿಳಿಸಿದೆ.
ಹೊಸ ಬಗೆಯ ಹಕ್ಕಿಜ್ವರ ಹರಡದಂತೆ ಎಚ್ಚರ ವಹಿಸಿ ಪೂರ್ವ ಚೀನಾದಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಹಕ್ಕಿಗಳನ್ನು ಕೊಲ್ಲಲಾಗಿದೆ.