ನವದೆಹಲಿ (ಪಿಟಿಐ): ಎತ್ತರ ಪ್ರದೇಶಗಳಲ್ಲಿ ಸೇವೆಗೆ ನಿಯುಕ್ತರಾಗಿರುವ ಸೈನಿಕರ ಆಹಾರದ ಅಗತ್ಯಗಳನ್ನು ಪೂರೈಸುವ ನಿಟ್ಟಿನಲ್ಲಿ ಡಿಆರ್‌ಡಿಒ ಪ್ರಯೋಗಾಲಯವು ಹೈಬ್ರಿಡ್ ಜಾತಿಯ ದನ ಹಾಗೂ ಆಡುಗಳನ್ನು ಅಭಿವೃದ್ಧಿಪಡಿಸಿದೆ.
ಲಡಾಖ್ ಹಾಗೂ ಹಿಮಾಲಯದ ಶೀತಪ್ರದೇಶಗಳಲ್ಲಿ ಬದುಕಬಲ್ಲ ಈ ಪ್ರಾಣಿಗಳನ್ನು ಲೇಹ್ ಮೂಲದ ಎತ್ತರದ ಪ್ರದೇಶಗಳ ಸಂಶೋಧನೆಗಾಗಿನ ರಕ್ಷಣಾ ಸಂಸ್ಥೆ (ದಿಹಾರ್) ಯಲ್ಲಿ ಅಭಿವೃದ್ಧಿಪಡಿಸಲಾಗಿದೆ.
`ಮೊದಲು ಸೈನಿಕರು ಪ್ಯಾಕೇಜ್ಡ್ ಹಾಲು ಮತ್ತು ಮಾಂಸವನ್ನು ಉಪಯೋಗಿಸುತ್ತಿದ್ದರು. ಆದರೆ ಹೈಬ್ರಿಡ್ ದನಗಳು ಪ್ರತಿ ದಿನ 25ಲೀ.ನಷ್ಟು ಹಾಲನ್ನು ನೀಡಲಿದ್ದು ಇವುಗಳಿಂದ ಸೇನಾಪಡೆಗಳ ಶೇ 25ರಷ್ಟು ಆಹಾರ ಅಗತ್ಯಗಳನ್ನು ಪೂರೈಸಬಹುದಾಗಿದೆ~ ಎಂದು ಡಿಆರ್‌ಡಿಒ ಸಂಶೋಧನಾ ಮತ್ತು ಅಭಿವೃದ್ಧಿ ವಿಭಾಗದ ಮುಖ್ಯ ನಿಯಂತ್ರಣಾಧಿಕಾರಿ ಸೆಲ್ವಮೂರ್ತಿ ತಿಳಿಸಿದ್ದಾರೆ.
