ನವದೆಹಲಿ (ಪಿಟಿಐ): ಡಿಟಿಎಚ್‌ ಬಳಕೆದಾರರು ಸೆಟ್‌ ಟಾಪ್‌ ಬಾಕ್ಸ್‌ಗಳನ್ನು ತಮ್ಮ ಆಯ್ಕೆಗೆ ಅನುಗುಣವಾಗಿ ಇತರ ಕಂಪೆನಿಗಳ ಸೇವೆ ಪಡೆದುಕೊಳ್ಳುವುದಕ್ಕೂ ಅನುಕೂಲವಾಗುವಂತಹ ವ್ಯವಸ್ಥೆ ರೂಪಿಸಬೇಕು ಎಂದು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರದ (ಟ್ರಾಯ್‌) ಅಧ್ಯಕ್ಷ ರಾಹುಲ್ ಖುಲ್ಲರ್‌ ಹೇಳಿದ್ದಾರೆ.
ಒಂದು ಕಂಪೆನಿಯ ಸೇವೆ ಪಡೆಯುತ್ತಿರುವ ಬಳಕೆದಾರರು ಕಂಪೆನಿಯನ್ನು ಬದಲಾಯಿಸಿದರೆ ಅದೇ ಸೆಟ್‌ ಟಾಪ್‌ ಬಳಸಿ ತಮ್ಮ ಆಯ್ಕೆಯ ಬೇರೊಂದು ಕಂಪೆನಿಯ ಸೇವೆ ಪಡೆಯಲು ತಾಂತ್ರಿಕವಾಗಿ ಸಾಧ್ಯವಾಗಬೇಕು.
ತಾಂತ್ರಿಕವಾಗಿ ಇದು ಕಷ್ಟ ಸಾಧ್ಯ ಎಂದಾದರೆ ವಾಣಿಜ್ಯಿಕವಾಗಿ ಈ ಆಯ್ಕೆಯನ್ನು ಬಳಕೆದಾರರಿಗೆ ನೀಡಬೇಕು. ಅಂದರೆ ಕಂಪೆನಿಯನ್ನು ಬದಲಾಯಿಸುವಾಗ ಆ ಕಂಪೆನಿಯಿಂದ ಖರೀದಿಸಿರುವ ಸೆಟ್‌ ಟಾಪ್‌ ಬಾಕ್ಸನ್ನು ಕಂಪೆನಿಯು ವಾಪಸ್‌ ಪಡೆದು ಅದರ ಬೆಲೆಯನ್ನು ಪಾವತಿಸಬೇಕು. ಈ ಹಣದಿಂದ ಹೊಸ ಕಂಪೆನಿಯ ಸೆಟ್‌ ಟಾಪ್‌ ಬಾಕ್ಸ್‌ ಖರೀದಿಸಲು ಬಳಕೆದಾರರಿಗೆ ಸಾಧ್ಯವಾಗಬೇಕು.
ಗ್ರಾಹಕರ ಹಿತದೃಷ್ಟಿಯಿಂದ ಇದು ಸಾಧ್ಯವಾಗುವಂತೆ ಮಾಡಬೇಕು ಎಂದು ಖುಲ್ಲರ್‌ ಸೂಚನೆ ನೀಡಿದ್ದಾರೆ. ಹೊಸ ಡಿಟಿಎಚ್‌ ಪರವಾನಗಿ ನೀಡಿಕೆಗೆ ಶಿಫಾರಸುಗಳನ್ನು ರೂಪಿಸುವ ಡಿಟಿಎಚ್‌ ಸೇವಾ ಕಂಪೆನಿಗಳೊಂದಿಗಿನ ಮುಕ್ತ ಸಮಾಲೋಚನೆಯಲ್ಲಿ ಖುಲ್ಲರ್‌ ಈ ಸಲಹೆ ನೀಡಿದ್ದಾರೆ.
