ಡೌ ಪ್ರಾಯೋಜಕತ್ವ ರದ್ದು ಮಾಡದ ಐಒಸಿ

ನವದೆಹಲಿ (ಪಿಟಿಐ): ಲಂಡನ್ ಒಲಿಂಪಿಕ್ ಕ್ರೀಡಾಕೂಟಕ್ಕೆ `ಡೌ ಕೆಮಿಕಲ್ಸ್~ ನೀಡಿರುವ ಪ್ರಾಯೋಜಕತ್ವ ರದ್ದು ಮಾಡುವುದಿಲ್ಲವೆಂದು ಅಂತರರಾಷ್ಟ್ರೀಯ ಒಲಿಂಪಿಕ್ ಸಮಿತಿ (ಐಒಸಿ) ಸ್ಪಷ್ಟಪಡಿಸಿದೆ.

ಭೋಪಾಲ್ ಅನಿಲ ದುರಂತಕ್ಕೆ ಡೌ ಕೆಮಿಕಲ್ಸ್ ಹೊಣೆಯಲ್ಲ. ಯೂನಿಯನ್ ಕಾರ್ಬೈಡ್ ಕೊಂಡು ಕೊಂಡಿರುವ ಮಾತ್ರಕ್ಕೆ ಘಟನೆಗೆ ಇದೇ ಕಂಪೆನಿ ಕಾರಣ ಎನ್ನುವಂತೆ ಬಿಂಬಿಸುವುದೂ ಸೂಕ್ತವಲ್ಲ ಎನ್ನುವುದು ಐಒಸಿ ಅಭಿಪ್ರಾಯ. ಆದ್ದರಿಂದಲೇ ಡೌ ಅನ್ನು ಪ್ರಾಯೋಜಕತ್ವವನ್ನು ಮುಂದುವರಿಸಲಾಗುತ್ತದೆಂದು ತಿಳಿಸಿದೆ.

ಭಾರತದಲ್ಲಿ ನಡೆದ ಅತ್ಯಂತ ದೊಡ್ಡ ಅನಿಲ ದುರಂತಕ್ಕೆ ಯೂನಿಯನ್ ಕಾರ್ಬೈಡ್ ಕಾರಣ. ಅಂಥದೊಂದು ಕಂಪೆನಿಯನ್ನು ಖರೀದಿಸಿದ ಡೌ ಸೂಕ್ತವಾದ ಪರಿಹಾರವನ್ನು ಸಂತ್ರಸ್ತರಿಗೆ ನೀಡಿಲ್ಲವೆಂದು ದೂರಿ ನಿರಂತರವಾಗಿ ಪ್ರತಿಭಟನೆಗಳು ನಡೆದಿವೆ. ಅಷ್ಟೇ ಅಲ್ಲ ಒಲಿಂಪಿಕ್‌ನಿಂದ ಅದನ್ನು ದೂರ ಇಡಬೇಕೆಂದು ಭಾರತ ಒಲಿಂಪಿಕ್ ಸಂಸ್ಥೆ (ಐಒಎ) ಕೂಡ ಆಗ್ರಹಿಸಿತ್ತು. ಆದರೆ ಈ ಒತ್ತಡಕ್ಕೆ ಐಒಸಿ ಮಣಿದಿಲ್ಲ. `ಪ್ರಾಯೋಜಕತ್ವ ರದ್ದು ಮಾಡಲು ಸೂಕ್ತ ಕಾರಣವಿಲ್ಲ~ ಎಂದು ಹೇಳಿ ಕೈತೊಳೆದುಕೊಂಡಿದೆ.

ಐಒಸಿ ಮುಖ್ಯಸ್ಥ ಜಾಕ್ ರಾಗ್ ಅವರು ಈ ವಿಷಯವಾಗಿ ಐಒಎ ಹಂಗಾಮಿ ಅಧ್ಯಕ್ಷ ವಿಜಯ್ ಕುಮಾರ್ ಮಲ್ಹೋತ್ರಾ ಅವರಿಗೆ ಪತ್ರವನ್ನೂ ಬರೆದಿದ್ದಾರೆ. `1984ರಲ್ಲಿ ನಡೆದ ಭೋಪಾಲ್ ಅನಿಲ ದುರಂತವು ಭಾರತ ಮಾತ್ರವಲ್ಲ ವಿಶ್ವವೇ ಕಂಡಿರುವ ದೊಡ್ಡ ದುರ್ಘಟನೆ. ಈ ಅಂಶವನ್ನು ಐಒಸಿ ಕೂಡ ಅಲ್ಲಗಳೆಯುವುದಿಲ್ಲ.

ಮೃತಪಟ್ಟವರು ಹಾಗೂ ಸಂತ್ರಸ್ತರ ಬಗ್ಗೆ ಅನುಕಂಪವೂ ಇದೆ. ಆ ಭಾಗದಲ್ಲಿ ನೆಲೆಸಿರುವವರು ಈಗಲೂ ಎದುರಿಸುತ್ತಿರುವ ಕಷ್ಟ ಎಂಥದೆಂದು ಕೂಡ ತಿಳಿದಿದ್ದೇವೆ~ ಎಂದಿರುವ ಅವರು `ಇಂಥದೊಂದು ಘಟನೆಗೆ ಪ್ರತ್ಯಕ್ಷವಾಗಿ ಕಾರಣವಾಗಿಲ್ಲದ ಡೌ ಅನ್ನು ಒಲಿಂಪಿಕ್ ಪ್ರಾಯೋಜಕತ್ವದಿಂದ ಕೈಬಿಡುವುದು ಸಾಧ್ಯವಿಲ್ಲ~ ಎಂದು ತಿಳಿಸಿದ್ದಾರೆ.

`ಡೌ ಕೆಮಿಕಲ್ಸ್ ಜೊತೆಗೆ ಒಪ್ಪಂದ ಮಾಡಿಕೊಳ್ಳುವ ಸಂದರ್ಭದಲ್ಲಿಯೇ ನಾವು ಎಲ್ಲ ಅಂಶಗಳನ್ನು ಪರಿಶೀಲಿಸಿದ್ದೇವೆ. ಅದು ಯೂನಿಯನ್ ಕಾರ್ಬೈಡ್ ಕಂಪೆನಿಯನ್ನು ಖರೀದಿ ಮಾಡಿದ್ದು ಗೊತ್ತಿತ್ತು~ ಎಂದು ಹೇಳಿರುವ ರಾಗ್ `ದುರಂತ ನಡೆದ ನಂತರ ಹದಿನಾರು ವರ್ಷಗಳವರೆಗೆ ಯೂನಿಯನ್ ಕಾರ್ಬೈಡ್‌ನಲ್ಲಿ ಡೌ ಯಾವುದೇ ರೀತಿಯಲ್ಲಿ ಪಾಲುಗಾರಿಕೆ ಹೊಂದಿರಲಿಲ್ಲ. ಮಾಲೀಕತ್ವ ಪಡೆದ ಹನ್ನೆರಡು ವರ್ಷಗಳ ನಂತರ ಭಾರತದ ಸುಪ್ರೀಂ ಕೋರ್ಟ್ ಪ್ರಕಾರ 47000 ಲಕ್ಷ ಡಾಲರ್ ಪರಿಹಾರ ನೀಡುವ ಒಪ್ಪಂದವಾಗಿದ್ದನ್ನೂ ಪರಿಶೀಲಿಸಿದ್ದೇವೆ~ ಎಂದು ವಿವರಿಸಿದ್ದಾರೆ.