ತರಾತುರಿಯಲ್ಲಿ ಪುಸ್ತಕ ಖರೀದಿಗೆ ಹುನ್ನಾರ?

ಪ್ರತಿ ವರ್ಷ ಪುಸ್ತಕ ಖರೀದಿಗೆ ಬಂದ ಅರ್ಜಿಗಳನ್ನು ಪರಿಶೀಲಿಸಿ ಜುಲೈ ಮೊದಲ ವಾರದಲ್ಲಿ ಪಟ್ಟಿ ಬಿಡುಗಡೆ ಮಾಡಲು ಗ್ರಂಥಾಲಯ ಇಲಾಖೆ ನೀಲನಕ್ಷೆ ರೂಪಿಸುತ್ತಿತ್ತು. ಆದರೆ, ಈ ಬಾರಿ ತರಾತುರಿಯಲ್ಲಿ ಖರೀದಿಗೆ ಮುಂದಾಗಿರುವುದು ಸಾಹಿತ್ಯಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

2011ನೇ ಸಾಲಿಗೆ 7 ಸಾವಿರ ಪುಸ್ತಕಗಳು ಆಯ್ಕೆಗಾಗಿ ಬಂದಿದ್ದು, ಈ ಪುಸ್ತಕಗಳನ್ನು ಲೇಖಕರು, ಪ್ರಕಾಶಕರು ಫೆಬ್ರವರಿ 15ರಂದೇ ಸಲ್ಲಿಸಿದ್ದಾರೆ. ಆದರೆ, ಮೂರೂವರೆ ತಿಂಗಳಾದರೂ ಆಯ್ಕೆಗಾಗಿ ಬಂದಿರುವ ಪುಸ್ತಕಗಳ ಪಟ್ಟಿಯನ್ನು ಸಿದ್ಧಪಡಿಸಿಲ್ಲ. ಇದೀಗ ಜೂ. 18, 19 ಹಾಗೂ 20ರಂದು ಆಯ್ಕೆ ಸಮಿತಿ ಸಭೆ ಕರೆಯಲಾಗಿದೆ. ಜುಲೈನಲ್ಲಿ ಖರೀದಿ ಪ್ರಕ್ರಿಯೆ ಪೂರ್ಣಗೊಳಿಸಲು ಸಮಿತಿ ಉದ್ದೇಶಿಸಿದೆ.

ಇದರಿಂದಾಗಿ ಕೇವಲ ಒಂದೂವರೆ ತಿಂಗಳಿನಲ್ಲಿ ಏಳು ಸಾವಿರ ಪುಸ್ತಕಗಳನ್ನು ಓದಿ ಆಯ್ಕೆ ಮಾಡಲು ಹೊರಟಿರುವ ಕ್ರಮದ ಹಿಂದೆ ಭ್ರಷ್ಟಾಚಾರ, ದುರಾಡಳಿತ, ಬೇಜವಾಬ್ದಾರಿ ಹಾಗೂ ಪುಸ್ತಕ ಮಾಫಿಯಾ ಕೆಲಸ ಮಾಡುತ್ತಿದೆ ಎಂದು ಕೆಲವರು ಆರೋಪಿಸಿದ್ದಾರೆ.

ಆಯ್ಕೆ ಸಮಿತಿಯಲ್ಲಿ 22 ಜನ ಸದಸ್ಯರಿದ್ದಾರೆ. ಆದರೆ, ಆಯ್ಕೆ ಸಮಿತಿ ಸಭೆ ಕರೆದಾಗ ಸುಮಾರು 15 ಮಂದಿ ಮಾತ್ರ ಭಾಗವಹಿಸುತ್ತಾರೆ. ಈ ಸಮಿತಿಯು 7 ಸಾವಿರ ಪುಸ್ತಕಗಳನ್ನು ಆಯ್ಕೆ ಮಾಡಲು ಸತತವಾಗಿ ಸಭೆ ನಡೆಸಿದರೂ ಕನಿಷ್ಠ 30 ದಿನ ಬೇಕು.

ಹೀಗಿರುವಾಗ ತರಾತುರಿಯಲ್ಲಿ ಆಯ್ಕೆ ಆಗಿರುವ ಪುಸ್ತಕಗಳು ಭಾಷಾದೋಷ, ವಿಪರೀತ ಮುದ್ರಣದೋಷ, ತಾಂತ್ರಿಕ ದೋಷ, ಸಮಾಜ ಘಾತುಕ ವಿಷಯಗಳು, ದ್ವಂದ್ವಾರ್ಥ ಪದಗಳು, ಕೋಮು ಸೌಹಾರ್ದಕ್ಕೆ ಧಕ್ಕೆ ತರುವ ವಿಚಾರಗಳು, ರಾಷ್ಟ್ರದ್ರೋಹಿ ಚಿಂತನೆಗಳಿಂದ ಕೂಡಿರುವ ಅಪಾಯವಿದೆ. ಹೀಗಾಗಿ ಇದರ ಹೊಣೆ ಹೊರುವವರು ಯಾರು  ಎಂಬ ಪ್ರಶ್ನೆ ಉದ್ಭವವಾಗಿದೆ.