ಬೆಂಗಳೂರು: ಕೇರಳದ ಮಯೂಖಾ ಜಾನಿ 51ನೇ ರಾಷ್ಟ್ರೀಯ ಸೀನಿಯರ್ ಅಂತರ ರಾಜ್ಯ ಅಥ್ಲೆಟಿಕ್ ಚಾಂಪಿಯನ್‌ಷಿಪ್‌ನಲ್ಲಿ ಶನಿವಾರ ಲಾಂಗ್ ಜಂಪ್‌ನಲ್ಲಿ ಕೂಟ ದಾಖಲೆಯೇನೋ ನಿರ್ಮಿಸಿದರು. ಆದರೆ ವಿಶ್ವ ಚಾಂಪಿಯನ್‌ಷಿಷ್ ಹಾಗೂ ಒಲಿಂಪಿಕ್‌ಗೆ ಅರ್ಹತೆ ಪಡೆಯಲು ವಿಫಲವಾಗಿದ್ದು ಅವರನ್ನು ನಿರಾಸೆಯಲ್ಲಿ ಮುಳುಗಿಸಿತ್ತು.
ಈ ನಿರಾಶೆಗೆ ಕಾರಣವಾಗಿದ್ದು ಅವರ ತಲೆಕೂದಲು. ಮೊದಲ ಯತ್ನದಲ್ಲಿ ಮಯೂಖಾ 6.63 ಮೀ. ದೂರ ಜಿಗಿದರು. ಆದರೆ ಆರನೇ ಹಾಗೂ ಕೊನೆಯ ಯತ್ನದಲ್ಲಿ 6.70 ಮೀ. ಜಿಗಿದರಾದರೂ ಅವರ ತಲೆಕೂದಲು ಅಡ್ಡಿಯಾಯಿತು. ಜಿಗಿದಾಗ ತಲೆಕೂದಲು ಸ್ಪರ್ಶಿಸಿದ ಸ್ಥಳದಿಂದ ಅಳತೆ ಮಾಡಲಾಗುತ್ತದೆ. ಹಾಗಾಗಿ ಆ ಯತ್ನದಲ್ಲಿ 6.60 ಮೀ.ಗೆ ಅವರು ತೃಪ್ತಿಪಡಬೇಕಾಯಿತು.
`ನಿರೀಕ್ಷಿಸಿದಷ್ಟು ದೂರ ಜಿಗಿಯಲು ಸಾಧ್ಯವಾಗಲಿಲ್ಲ ನಿಜ. ಆದರೆ ಅರ್ಹತೆಗೆ ಇದೇ ಕೊನೆಯಲ್ಲ. ಜಪಾನ್‌ನ ಕೋಬ್‌ನಲ್ಲಿ ಜುಲೈ 7ರಿಂದ 10ರವರೆಗೆ ನಡೆಯಲಿರುವ ಏಷ್ಯನ್ ಚಾಂಪಿಯನ್‌ಷಿಪ್‌ನಲ್ಲಿ ಆ ಅರ್ಹತೆ ಗೆರೆ ಮುಟ್ಟುತ್ತೇನೆ ಎಂಬ ವಿಶ್ವಾಸವಿದೆ~ ಎಂದು ಮಯೂಖಾ `ಪ್ರಜಾವಾಣಿ~ಗೆ ತಿಳಿಸಿದರು.
`ಆದರೂ ಈ ಪ್ರಯತ್ನ ನನಗೆ ತೃಪ್ತಿ ತಂದಿದೆ. ಅರ್ಹತೆ ಪಡೆಯುವಷ್ಟು ದೂರ ಜಿಗಿಸುವ ಸಾಮರ್ಥ್ಯ ನನ್ನಲ್ಲಿದೆ~ ಎಂದರು.
`ನಾನು ಮಯೂಖಾಳಿಂದ 6.75 ಮೀ.ಸಾಧನೆ ನಿರೀಕ್ಷಿಸಿದ್ದೆ. ಆದರೆ ತಾಂತ್ರಿಕ ಅಂಶಗಳತ್ತ ಆಕೆ ಗಮನ ಹರಿಸಬೇಕು. ಅದನ್ನು ಸರಿಪಡಿಸುವ ವಿಶ್ವಾಸ ನನ್ನಲ್ಲಿದೆ~ ಎಂದು ಕೋಚ್ ಜಿ.ಆರ್.ಶ್ಯಾಮ್ ಕುಮಾರ್ ತಿಳಿಸಿದರು.
